Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! MARCH 2013

 THUŠO BAKENG SA LAPA | GO GODIŠA NGWANA

Kamoo o ka Beelago Ngwana wa Gago yo a Lego Mahlalagading Melao

Kamoo o ka Beelago Ngwana wa Gago yo a Lego Mahlalagading Melao

TLHOHLO

Ngwana wa gago yo a lego mahlalagading o re melao yeo o e beago e thata kudu. Wena o ikwa ka tsela e fapanego ka ge o nyaka go mo šireletša. O ipotša gore, ‘Ge e ba ke nyefiša melao, o tla fo tsena mathateng!’

O ka beela ngwana wa gago yo a lego mahlalagading melao e lekalekanego. Lega go le bjalo, sa pele o swanetše go kwešiša seo se ka bago se mo dira gore a thome go ganetšana le melao.

LEBAKA LEO KA LONA SEO SE DIREGAGO

Nonwane: Bafsa ka moka bao ba lego mahlalagading ba rabela kgahlanong le melao; seo ke karolo yeo e sa phemegego ya ge ba le mahlalagading.

Therešo: Mofsa yo a lego mahlalagading a ka no se rabele ge batswadi ba gagwe ba bea melao e lekalekanego gomme ba boledišana le yena ka yona.

Gaešita le ge go ka ba go akaretšwa dintlha tše dintši borabeleng, batswadi ka go se tsebe ba ka bo kgothaletša ge e ba melao ya bona e sa sepedišane le mabaka goba ngwana e se sa le wa go fo botšwa. Ela hloko dintlha tše di latelago:

  • Go se fetofetoge le maemo. Ge e ba batswadi ba bea molao gomme o sa ahlaahlwe, melao yeo e ka bonagala e le ya go laola mofsa yoo go e na le go mo šireletša. Ka baka leo, ka sephiring a ka dira ditiro tšona tšeo batswadi ba gagwe ba mo thibelago go di dira.
  • Ga e sa le wa go fo botšwa. Polelwana e rego, “Ka gobane ke re’alo” e ka hlalosetša ngwana yo monyenyane ka mo go lekanego, eupša bafsa bao ba lego mahlalagading ba nyaka tlhaloso e oketšegilego—ba nyaka mabaka. Go ba gona, go se go ye kae, ngwana wa gago yo a lego mahlalagading a ka thoma go dula a nnoši le go itirela diphetho tše dikgolo. Go kaone kudu gore a thome go naganišiša dilo gabotse le go dira diphetho tše dibotse gona bjale, ge a sa dutše a le ka tlase ga tlhokomelo ya gago.

Eupša o ka dira’ng ge e ba ngwana wa gago yo a lego mahlalagading a dula a bonagala eka o tenwa ke melao ya gago?

 SEO O KA SE DIRAGO

Thoma ka go lemoga seo ngwana a se hlokago—le seo a tlogago a se nyaka—e lego mellwane. Ka gona bea melao, gomme o kgonthišetše gore ngwana wa gago yo a lego mahlalagading o a e kwešiša. Puku ya Letting Go With Love and Confidence e re: “Ge bafsa bao ba lego mahlalagading ba beelwa mellwane yeo e kwagalago gomme ba letetše gore batswadi ba ba hlahle ka tsela e lekalekanego, ba ka no se itshware ka tsela yeo e hlobaetšago.” Ka mo go fapanego, batswadi ba bangwe bao ba bonago go sa nyakege gore ba bee melao ba ka fetiša kgopolo ya gore ga ba na taba. Le gona seo se lebiša borabeleng.—Molao wa motheo wa Beibele: Diema 29:15.

Ka gona, o ka bontšha bjang tekatekano? Nea ngwana wa gago yo a lego mahlalagading sebaka sa go itlhalosa mabapi le melao ya lapa. Ka mohlala, ge e ba a kgopela gore nako yeo a e beetšwego ya go fihla gae e fetošwe, mo theetše ge a le gare a bea taba ya gagwe. Mofsa yo a lego mahlalagading yo a tsebago gore o tloga a kwešišitšwe go ka direga gore a hlomphe le go sepedišana le phetho yeo o e dirago—gaešita le ge a sa dumelelane le yona.—Molao wa motheo wa Beibele: Jakobo 1:19.

Lega go le bjalo, pele o dira phetho, gopola se: Gaešita le ge bafsa bao ba lego mahlalagading ba ena le tshekamelo ya go kgopela tokologo e oketšegilego go feta yeo e ba swanetšego, batswadi le bona ba ka ba le tshekamelo ya go ba nea tokologo e nyenyane go yeo ba bego ba ka ba nea yona. Ka gona naganišiša ka kgopelo ya ngwana wa gago yo a lego mahlalagading. Na o iponagaditše a ena le boikarabelo? Na maemo a nyaka gore o fetofetoge le ona? Ikemišetše go fetoga le maemo ge go nyakega.—Molao wa motheo wa Beibele: Genesi 19:17-22.

Ka ntle le go theetša maikwelo a ngwana wa gago yo a lego mahlalagading, gape kgonthišetša gore o tsebiša ngwana wa gago yo a lego mahlalagading ka dilo tše di go tshwenyago. Ka go dira bjalo, mo gongwe o ka mo ruta gore a se ke a nagana ka dikganyogo tša gagwe a nnoši eupša a naganele le maikwelo a batho ba bangwe.—Molao wa motheo wa Beibele: 1 Bakorinthe 10:24.

Mafelelong, dira phetho gomme o hlalose mabaka a gago a go e dira. Gaešita le ge a sa thabele phetho yeo, mohlomongwe o thabela go ba le batswadi bao ba mo theetšago e bile ba nyaka go tseba gore o ikwa bjang. Gopola gore o ruta ngwana wa gago yo a lego mahlalagading gore a dire dilo bjang ge e šetše e le motho yo mogolo. Ka go bea melao e lekalekanego le go e ahlaahla le ngwana wa gago yo a lego mahlalagading, o tla mo thuša gore a gole e be motho yo mogolo yo a nago le boikarabelo.—Molao wa motheo wa Beibele: Diema 22:6.

Ithute ka mo go oketšegilego

Boledišana le Ngwana wa Gago yo a Lego Mahlalagading—Ntle le go Ngangišana le Yena

Ngwana wa gago yo a lego mahlalagading o hlagolela go itseba seo a lego sona gomme o nyaka go bulelwa sebaka sa gore a bolele dipono tša gagwe. O ka thuša bjang?

Go Boledišana le Bafsa Bao ba Lego Mahlalagading

O ka boledišana bjang le mofsa yo a lego mahlalagading yoo a sa arabego ge o mmotšiša dipotšišo?

Kamoo o ka Rutago Ngwana wa Gago

Go laya go akaretša se se fetago melao le kotlo.