Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! FEBRUARY 2013

Madireng a Lefase

Madireng a Lefase

Isiraele

Wepesaete ya Haaretz.com e bega gore bana bao ba “belegwego ba ena le bothata bjo itšego bja tša maphelo bjoo bo ka bago bo ile bja bonwa nakong ya ge ba be ba hlahlobja ba se ba hlwa ba belegwa” ga ba sa kgona go gatela balaodi ba tša maphelo mogato wa molao wa go ba lefiša bakeng sa seo ba rego ke “bophelo bjo e sego bjona.” Lega go le bjalo, batswadi ba ka gata mogato wa go lefiša bakeng sa “go belegwa mo go sa swanelago” e le ge ba tsoma go phumolwa megokgo bakeng sa “ditshenyegelo tše oketšegilego tša go godiša ngwana yo a golofetšego le go kgotsofatša dinyakwa tša [gagwe] bophelong bja gagwe ka moka.”

Australia

Kua Australia, banna le basadi bao ba ratanago ba 8 go ba 10 ba dula mmogo pele ba ka nyalana.

Gerika

Dipalopalo tšeo di tšweleditšwego ke mokgatlo wa Greek Ministry of Health di bontšhitše gore palo ya batho bao ba ipolayago kua Gerika e oketšegile ka 40 lekgolong dikgweding tše hlano tša mathomo tša ngwaga wa 2011, ge di bapetšwa le dikgwedi tše di swanago tša ngwaga wa 2010. Koketšego yeo e bile ka nako e tee le mathata a morago bjale a tša ditšhelete.

United States

Go ya ka mokgatlo wa Natural Resources Defense Council, mo e nyakilego go ba 40 lekgolong ya dijo nageng yeo ka bophara di a senywa. Ka mohlala, go akanyetšwa gore mo e ka bago 7 lekgolong ya dibjalo ga di ke di bunwa, gore 17 lekgolong ya dijo tšeo di solwago mabenkeleng a go jela di dula di sa jewe, le gore malapa a lahla mo e ka bago 25 lekgolong ya dijo tšeo a di rekago.

Madagascar

Morago bjale go utolotšwe gore go na le leobu le lenyenyane kudu lefaseng kua Madagascar. E mengwe ya mekgaditswane ye e menyenyane kudu e metsotho e ka lekana le lenala la monwana, ka ge e gola botelele bja dimilimithara tše 29. Ka baka la ge bophelo bja yona bo le kotsing, mekgaditswane ye e ka ba e le kotsing ya go ka fedišetšwa sa ruri.