Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  January 2013

 PONO YA BEIBELE

Paradeise

Paradeise

Paradeise ke Eng?

SEO BATHO BA SE BOLELAGO

Ba bangwe ba nagana gore Paradeise e fo ba nonwane. Batho ba bangwe ba dumela gore ke lefase le lebotse la khutšo la boikgopolelo leo le swanago le serapa moo batho ba lokilego ba phelago ka mo go sa felego gomme ba dira mediro e thabišago le yeo e nago le mohola.

SEO BEIBELE E SE BOLELAGO

Lentšu “paradeise” le ile la dirišwa go šupa legae la batho la pele, e lego serapa sa Edene. (Genesi 2:7-15) Beibele e bontšha serapa seo e le lefelo la kgonthe moo batho ba babedi ba pele ba bego ba phela go se na bolwetši le lehu. (Genesi 1:27, 28) Ka ge ba ile ba se kwe Modimo, batho bao ba babedi ba pele ba ile ba lahlegelwa ke legae la bona la paradeise. Lega go le bjalo, diporofeto tše dintši tša Beibele di hlalosa gore batho ba tla thabela go phela Paradeiseng yeo e tsošološitšwego.

KE KA BAKA LA ENG GO SWANETŠE GO BA BOHLOKWA GO WENA?

Ge e ba Modimo a na le lerato, gona e be e tla ba mo go kwagalago gore o tla putsa barapedi ba gagwe ba botegago ka bophelo bjo bobotse lefelong le le swanago le Paradeise. E bile e be e tla ba mo go kwagalago gore a lemoše batho ka seo ba swanetšego go se dira e le gore ba amogelwe ke Modimo. Beibele e bolela gore o ka amogelwa ke Modimo ka go ithuta ka yena le ka go kwa ditaelo tša gagwe.—Johane 17:3; 1 Johane 5:3.

“Jehofa Modimo a bjala serapa kua Edene, . . . gomme gona moo a bea motho yo a mmopilego.”—Genesi 2:8.

 Paradeise e kae?

SEO BATHO BA SE BOLELAGO

Ba bangwe ba dumela gore Paradeise e legodimong, mola ba bangwe ba dumela gore e tla ba gona nakong e tlago mo lefaseng.

SEO BEIBELE E SE BOLELAGO

Paradeise ya mathomo yeo batho ba bego ba dula go yona e be e le mo lefaseng. Modimo o kgethile lefase gabotse gore e be legae la batho la sa ruri. Beibele e bolela gore Modimo o dirile polanete ya rena gore e be gona ka mo go sa felego. (Psalme 104:5) E bolela gape gore: “Magodimo [ke] a Jehofa, eupša lefase o le neile bana ba batho.”—Psalme 115:16.

Ka gona, ga go makatše gore Beibele e bolela ka kholofetšo ya lefase la Paradeise. Go lona, Modimo o tla šegofatša batho ka bophelo bjo bo sa felego. Go tla rena kwano le khutšo. Bohloko le tlaišego di tla be di se sa le gona. E bile batho ba tla kgona go thabela ka botlalo dilo tše di makatšago tša polanete ya lefase.—Jesaya 65:21-23.

“Tente ya Modimo e bathong, . . . gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kutollo 21:3, 4.

Ke bomang bao ba tlago go phela Paradeiseng?

SEO BATHO BA SE BOLELAGO

Madumedi a mantši a ruta gore batho ba lokilego ke bona feela bao ba tlago go phela Paradeiseng. Eupša go na le kgakanego e kgolo mabapi le gore “go loka” go bolela eng. Ba bangwe ba nagana gore go lekane go fo tšea karolo ditirelong tša bodumedi le dithapelong tša mekgwa ya tirelo ya bodumedi.

SEO BEIBELE E SE BOLELAGO

Beibele e ruta gore “baloki” ba tla phela Paradeiseng. Eupša ke mang yo Modimo a mmonago a lokile? Ga se motho yo a tšeago karolo ditirelong tša bodumedi bja gagwe mola a hlokomologa thato ya Modimo. Beibele e re: “Na Jehofa o kgahlwa kudu ke dibego tša go fišwa le dihlabelo go phala go kwa lentšu la Jehofa? Tseba gore go kwa go phala sehlabelo.” (1 Samuele 15:22) Re ka fo re, “baloki” bao ba tlago go phela ka mo go sa felego Paradeiseng ke bao ba kwago ditaelo tša Modimo bjalo ka ge di ngwadilwe ka Beibeleng.

SEO O KA SE DIRAGO

Go kwa ditaelo tša Modimo go akaretša se se fetago go fo tšea karolo ditirelong tša bodumedi. O ka kgahliša goba wa nyamiša Modimo ka boitshwaro bja gago bja letšatši le letšatši. O ka ithuta go kgahliša Modimo ka go hlahloba Beibele ka kelohloko. Le gona ga go thata go mo kgahliša. Beibele e re “ditaelo tša gagwe ga di boima.” (1 Johane 5:3) Modimo o fagahletše go go putsa bakeng sa go kwa ga gago ka go go nea tokelo ya go phela Paradeiseng.

“Baloki bona e tla ba beng ba lefase, ba tla dula mo go lona ka mo go sa felego.”—Psalme 37:29.