Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! 2008-10

Tsogo e a Kgonega!

Tsogo e a Kgonega!

KA FILIMING e nngwe nywageng e mmalwa e fetilego, lesogana le lengwe le ile la bontšhwa le eme lebitleng la moratiwa wa lona. Le itše: “Ka mehla mma o be a re go hwa ke karolo ya bophelo.” Ke moka, ge khamera e retologela go se nene mantšung ao a ngwadilwego lebitleng, o ile a oketša ka gore: “Ruri ke duma eka go ka ba go se bjalo.”

Mantšu a a hlalosa kamoo batho ba dimilione tše dikete bao ba lahlegetšwego ke baratiwa ba bona lehung ba ikwago ka gona. Ruri lehu ke lenaba le šoro! Lega go le bjalo, Modimo o holofetša gore: “Lehu le tla fedišwa e le lenaba la mafelelo.” (1 Bakorinthe 15:26) Eupša ke ka baka la’ng re e-hwa, go sa šetšwe bokgoni bja rena bja go phela ka mo go sa felego? Lehu le tla fedišwa bjang?

 Lebaka Leo ka Lona re Tšofalago le go hwa

Mabapi le Jehofa Modimo, Mmopi wa rena, Beibele e re: “[Ke] yoo tiro ya gagwe e lego e phethegilego.” (Doiteronomio 32:4, PK; Psalme 68:4) Motho wa pele e lego Adama o be a bopilwe a phethagetše gomme a e-na le bokgoni bja go phela ka mo go sa felego Edene, e lego tšhemo ya mo lefaseng ya Paradeise yeo Modimo a bego a mmeile go yona. (Genesi 2:7-9) Ke ka baka la’ng Adama a ile a lahlegelwa ke legae leo la Paradeise gomme a tšofala le go hwa?

Lebaka le bonolo: Adama o paletšwe ke go kwa taelo ya gore a se je seenywa sa sehlare se itšego. Modimo o be a lemošitše Adama ka mo go kwagalago ka kotlo ya go dira bjalo, a re: “O tlo hwa lehu.” (Genesi 2:16, 17) Adama o ile a tlatša mosadi wa gagwe e lego Efa go se kweng taelo yeo, ka go realo Modimo a ba raka Edene. Lebaka leo ka lona Modimo a ilego a gata mogato gatee-tee ke la bohlokwa. Beibele e re: “[Adama] A se kê a iša seatla a buša a fula sehlare sa bophelô [seo se lego tšhemong], a ja, a phela ka xo sa felexo.”—Genesi 3:1-6, 22.

Adama le Efa ba ile ba hwa ka baka la go se kwe ga bona, eupša ke ka baka la’ng ditlogolo tša bona di tšofala le go hwa? Ka baka la gore di abetše sebe go Adama gomme sebe se feleleditše ka go se phethagale le lehu go tšona ka moka. Beibele e hlalosa gore: “Ka motho o tee [Adama] sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.”—Baroma 5:12.

Go a Kgonega Gore re Phele Gape

Bjalo ka ge re badile pejana, “lehu le tla fedišwa”—ee, le tla fedišetšwa sa ruri! (1 Bakorinthe 15:26) Eupša bjang? Beibele e hlalosa lebaka, ge e re: “Ka tiro e tee ya tokafatšo, mafelelo go mehuta ka moka ya batho ke go bolelwa ga bona ba lokile bakeng sa bophelo.” (Baroma 5:18) Ke’ng seo se dirago gore go kgonege gore re be le boemo bjo bo lokilego go Modimo gomme re hwetše bophelo bjo bo sa felego?

Ke tokišetšo ya go fediša sebe seo batho ka moka ba se abetšego go motho wa pele e lego Adama. Beibele e hlalosa gore: “Mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) Mabapi le tokišetšo ya go bolela batho ba lokile bakeng sa bophelo, Jesu o itše: “Modimo o ratile lefase [la batho] kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Nagana ka lerato le tseneletšego leo Modimo a re ratago ka lona, gotee le la Morwa wa gagwe, Jesu Kriste, yo a tlaišegilego kudu bakeng sa rena. Moapostola Paulo o ngwadile gore: ‘Morwa wa Modimo o nthatile gomme a ikgafela nna.’ (Bagalatia 2:20) Lega go le bjalo, ke ka baka la’ng Jesu e le motho a nnoši yo a bego a ka “nea moya wa gagwe gore e be topollo” bakeng sa rena gomme ka go rialo a re phološa ditla-moragong tše bolayago tša sebe?—Mateo 20:28.

Ke Jesu a nnoši yo a bego a ka nea bophelo bja gagwe e le topollo ka gobane ke yena motho a nnoši yo a sa kago a abela sebe go motho wa pele e lego Adama. Ke ka baka la’ng go le bjalo? Ka gobane bophelo bja Jesu bo ile bja fetišetšwa popelong ya Maria yo e bego e le kgarebe ka mohlolo go tšwa legodimong. Ka gona, bjalo ka ge morongwa a boditše Maria, morwa wa gagwe e be e le “yo mokgethwa, Morwa wa Modimo.” (Luka 1:34, 35) Ke ka baka leo Jesu a bitšwago “Adama wa mafelelo” gomme a sa kago a abela sebe go “motho wa pele Adama.” (1 Bakorinthe 15:45) Bjalo ka motho yo a se nago sebe, Jesu o be a ka kgona go ineela e le “topollo e lekanago”—bophelo bja gagwe bo be bo lekana le bja motho wa pele yo a kilego a phethagala le yo a bego a se na sebe.—1 Timotheo 2:6.

Ka tokišetšo ye ya topollo, Modimo o dirile gore go kgonege gore re hwetše seo Adama wa pele a se lahlilego, e lego bophelo bjo bo sa felego lefaseng la paradeise. Lega go le bjalo, e le gore ba hwetše tšhegofatšo ye, batho ba bantši  ba swanetše go tsošwa bahung. Ruri ye ke tebelelo e kgahlišago! Eupša na go thata go dumela seo?

Motheo wa Tumelo

Na go swanetše go ba thata go dumela gore Jehofa Modimo, Mohlodi wa bophelo, o na le matla a go bopa lefsa motho yo a kilego a phela? Nagana ka bokgoni bja go ima bjo Modimo a dirilego gore mosadi wa pele a kgone go ba le bjona. ‘Adama o ile a tseba Efa’ gomme dikgwedi tše senyane ka morago, motho yo a feletšego yo a swanago le bona o ile a belegwa. (Genesi 4:1) Seo se diregilego ka popelong ya Efa e le gore go bopše dikarolo ka moka tša lesea gomme di kopanywe, se sa dutše se hlaloswa e le mohlolo wo batho ba sa kgonego go o kwešiša!—Psalme 139:13-16.

Batho ka tlwaelo ga ba sa lebelela go belega e le mohlolo, ka ge go belegwa bana ba dikete tše makgolo ka letšatši. Lega go le bjalo, go tsoša motho yo a kilego a phela go sa dutše go lebelelwa ke ba bantši e le selo seo se sa kgonegego. Ge Jesu a be a botša batho bao ba bego ba llela ngwanenyana yo a bego a hwile gore ba kgaotše go lla, ba ile “ba thoma go mo sega ka lenyatšo” ka gobane ba be ba tseba gore o hwile. Eupša Jesu o ile a bolela le ngwanenyana yo a hwilego a re: “‘Tsoga!’ Ka bjako mosetsana a tsoga a thoma go sepela.” Re botšwa gore: “Gatee-tee [bao ba bego ba le gona] ba thaba wa go se kgone go itshwara.”—Mareka 5:39-43; Luka 8:51-56.

Ge Jesu a be a kgopela gore lebitla la mogwera wa gagwe Latsaro le bulwe, Mareta e lego kgaetšedi ya Latsaro o ile a gana, a re: “Ga bjale o swanetše go ba a nkga, gobane ke matšatši a mane.” Lega go le bjalo, go bile le lethabo le legolo ge Jesu a tsoša Latsaro! (Johane 11:38-44) Ba bantši ba ile ba tlwaelana le mehlolo ya Jesu. Ge Johane Mokolobetši a be a le kgolegong, barutiwa ba Johane ba ile ba mmegela mediro ya Jesu gomme ba re: “Bahu ba a tsošwa.”—Luka 7:22.

Go Phela Gape ka Baka la Tsogo

Ke ka baka la’ng Jesu a ile a dira mehlolo yeo mola batho bao a ilego a ba tsoša ba ile ba babja le go hwa gape? O dirile bjalo ka gobane seo se be se hlatsela gore seo Adama wa pele a se lahlilego—bophelo bjo bo sa felego paradeiseng mo lefaseng—se ka tsošološwa e bile se tla tsošološwa. Mehlolo ya tsogo yeo Jesu a e dirilego e bontšhitše kamoo mafelelong batho ba dimilione ba tlago go ba “beng ba naxa” gomme ba “dula mo xo yôna ka mehla le ka mehla.”—Psalme 37:29.

Se se thabišago ke gore re ka ba gare ga bao ba nago le tebelelo yeo e kgahlišago ya go phela ka mo go sa felego ge e ba re bontšha “boineelo go Modimo.” Beibele e re boineelo bjo bjalo “bo na le kholofedišô ya bophelô byono le ya byo bo tl’o xo tla.” Bophelo bjoo “byo bo tl’o xo tla” bo bitšwa gape gore ke “bophelô bya ruri” le ‘bophelo bja kgonthe.’—1 Timotheo 4:8; 6:19; Beibele ya Sepedi.

Anke re ahla-ahleng kamoo bophelo bjo bja kgonthe, bophelo bjo bo tlago go tla lefaseng le lefsa la go loka, bo tlago go ba ka gona.