Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! 2008-10

Bophelo Paradeiseng e Tsošološitšwego

Bophelo Paradeiseng e Tsošološitšwego

JESU o boletše ka kgodišego ka tsogo gomme o boditše barutiwa ba gagwe gore ke selo sa kgonthe. O itše: “Nakong ya go bopša lefsa ga dilo [le] tla ja bohwa bja bophelo bjo bo sa felego.” Jesu o be a bolela’ng ge a be a re “nakong ya go bopša lefsa ga dilo”?—Mateo 19:25-29.

Go ya ka pego e swanago le yeo ya mongwadi wa Beibele e lego Luka, Jesu o itše “tshepedišong e tlago ya dilo” barutiwa ba gagwe ba be ba tla “hwetša bophelo bjo bo sa felego.” (Luka 18:28-30) Ke ka baka la’ng Beibele e bolela ka ‘tshepedišo e tlago ya dilo’ e le e swanago le “go bopša lefsa ga dilo”?

Go bonala e be e le go gatelela gore Jehofa Modimo o tla kgonthišetša gore morero wa gagwe wa mathomong wa gore batho ba phele ka mo go sa felego lefaseng la paradeise o tla phethagala. Batho ba tla bušetšwa phethegong yeo e ilego ya thabelwa ke Adama le Efa pele ba dira sebe. Ka gona, tshepedišong e tlago ya dilo” go tla ba le “go bopša lefsa” ga maemo a swanago le a Paradeise ao a bego a le gona tšhemong ya Edene.

Kamoo Paradeise e Tlago go Tsošološwa ka Gona

Ge Jesu a be a le lefaseng o ile a ruta barutiwa ba gagwe go rapelela Mmušo wo Modimo a tlago go o diriša go tsošološa maemo a lokilego lefaseng ka bophara. Jesu o itše re swanetše go rapela ka tsela ye: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Modimo o kgethile Morwa wa gagwe go ba Mmuši wa Mmušo wo woo o tlago go phethagatša morero wa Modimo wa gore maemo a Paradeise a thabelwe lefaseng ka bophara.

Paradeise yeo e lahlegilego ka baka la go se kwe ga batho ba babedi ba pele, e tla tsošološwa

Mabapi le yo Modimo a mo kgethilego e le Mmuši, Beibele e itše: “Gobane ngwana re mo tswaletšwe, morwa re mo neilwe, yoo pušo e lego legetleng la gagwe; gomme leina la gagwe o tlo bitšwa . . . kgoši ya kagišo. Bogolo bja bogoši bja gagwe le khutšo di ka se ke tša fela.” (Jesaya 9:5, 6, PK) Lega go le bjalo, mmušo wo o tla phethagatša bjang thato ya Modimo ka tlase ga ‘bogoši bja Jesu’?

Beibele e araba ka gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

Anke re ahla-ahleng maemo ao a tlago go ba gona lefaseng leo le tsošološitšwego la Paradeise, ee, ‘go bopšeng lefsa ga dilo’ ge Morwa wa Modimo a buša e le ‘Kgoši’ Mmušong wa Tatagwe.

 Kamoo Bophelo Paradeiseng bo Tlago go ba ka Gona

Tsogo ya bahu

“Nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe gomme ba tšwa.”—Johane 5:28, 29.

“Go tla ba le tsogo ya ba lokilego gotee le ba sa lokago.”—Ditiro 24:15.

Go ka se sa ba le bolwetši, botšofadi goba lehu

“Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.”—Jesaya 35:5, 6.

“Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

 Go tla ba le motlalo wa dijo

“Lefase le nthšitše dikenyô tša lôna. Re šexofatšwa ke Modimo, Modimo wa rena.”—Psalme 67:6.

“Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Psalme 72:16.

Go tla ba le dintlo tšeo di kgotsofatšago le mošomo o thabišago bakeng sa bohle

“Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.”—Jesaya 65:21, 22.

 Go ka se sa ba le bosenyi, bošoro goba ntwa

“Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:22.

“Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”—Jesaya 2:4.

Batho ba ka se sa ba le poifo gomme lefase le tla tlala khutšo

“Ba tlo dula bà iketlile, xò se na e a ba thšošaxo.”—Hesekiele 34:28.

“Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:9.

Ruri e tla ba mo go thabišago go phela nakong yeo maemo a bjalo a tla bego a le gona lefaseng ka moka, ge batho ka moka ba rata Modimo e bile ba ratana! (Mateo 22:37-39) O ka kgodišega gore dikholofetšo ka moka tša Modimo di tla phethagala. Modimo o re: “Ke rerile; ke tlo dira.”—Jesaya 46:11.

Go na le dilo tše dintši tšeo go ka nyakegago gore o ithute tšona ka Jehofa Modimo le ka lefase la gagwe le lefsa leo le holofeditšwego. Ka mohlala, go na le bohlatse bofe bja gore lefase leo le lefsa le kgaufsi? Mmušo wa Modimo o tla tšeela mebušo ka moka ya lefase legato bjang? Le gona, ke ditiragalo dife tšeo di tlago go dira gore Mmušo wa Modimo o dire bjalo? Dihlatse tša Jehofa di tla thabela go go thuša go ahla-ahla dipotšišo tše. Bakeng sa tsebišo e oketšegilego, bona letlakala 32 la makasine wo.

Go hlologela ga batho lefase le lefsa la toko ka nywaga e mentši go kgaufsi le go fela. Go batho ba bantši bao ba hwilego, lehu ga se mafelelo a bophelo. Ga se feela gore tsogo e a kgonega—ke thato ya Modimo. Ruri go a kgonega gore batho ba phele gape! Ee, ke ‘bophelo bja kgonthe,’ bophelo “byo bo tl’o xo tla.”—1 Timotheo 4:8; 6:19.