Eya go dikagare

Eya go menyu wa bobedi

Dihlatse tša Jehofa

Sepedi

Go Botša Batho Ditaba tše Dibotse ka Maleme a Gabo Bona Nageng ya Ireland le Brithania

Go Botša Batho Ditaba tše Dibotse ka Maleme a Gabo Bona Nageng ya Ireland le Brithania

Dihlatse tša Jehofa di dira maiteko a magolo a go bolela le batho ka Beibele ka maleme a gabo bona nageng ya Ireland le Brithania. * Maleme ao a akaretša Seisemane, Seirish, Segael sa Scotland le Sewelsh.

Ka September 2012, re ile ra tšweletša Wepesaete ya rena e mpshafaditšwego ya jw.org ka maleme a mantši go akaretša Seirish le Sewelsh, gomme Segael sa Scotland se thomile go ba gona ka August 2014. Re gatiša dipuku tšeo di theilwego Beibeleng ka maleme a fapafapanego. Batho ba arabetše bjang maitekong a?

Moruti wa kereke o ile a amogela pampišana yeo e theilwego Beibeleng ya Segael sa Scotland, ke moka a e balela godimo le semetseng gomme a thoma go rothiša megokgo. Ke eng seo se bego se mo kgomile ka tsela ye? O be a kgahlilwe ke tsela yeo pampišana ye e fetoletšwego ka yona, a botšiša gore: “Ke mang a e fetoletšego? Ruri e tloga e kwagala!”

Mo e ka bago batho ba 750 ba ile ba tsena Wepesaeteng ya jw.org ka Segael sa Scotland kgweding ya mathomo e tšweleditšwe.

Mofahloši wa Yunibesithing ya Ireland, Galway, o ile a botša Hlatse e nngwe gore o be a sa kgahlegele bodumedi. Eupša ge a be a lemoga gore a ka hwetša pukwana yeo e rego Beibele—E na le Molaetša Ofe? ka Seirish, o ile a e kgopela. O be a dumela gore batho ka moka ba swanetše go hwetša dipuku tša Beibele ka maleme a gabo bona, ka gona o ile a reta Dihlatse tša Jehofa ka mošomo wo di o dirilego wa gore batho bao ba bolelago Seirish ba hwetše dipuku tše ka leleme la bona.

Ka morago ga gore motšofadi yo mongwe a amogele pukwana ye e theilwego Beibeleng ka Sewelsh o ile a kgahlega kudu ke moka a re: “Go bolela therešo, ge nkabe le nneile yona ka Seisemane mohlomongwe nkabe ke e ganne, eupša ke kgahlwa ke gore ke e hweditše ka leleme la gešo.”

Ka August 2014, Jw.org ya Sewelsh e ile ya thoma go ba le boitsebišo bjo bo oketšegilego. Se se kgahlišago ke gore palo ya batho bao ba tsenago Wepesaeteng ya rena e ile ya oketšega gabedi kgweding yeo.

“Re Bolela Leleme le Tee”

Ka morago ga gore Jesu a hlathollele barutiwa ba gagwe ba babedi mangwalo, ka lethabo ba ile ba re: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?” (Luka 24:32) Gantši batho ba kgomega kudu ge molaetša wa Beibele o hlaloswa ka mo go kwagalago ka maleme a gabo bona.

Emyr yo a tšwago Wales, o nyetše Hlatse ya Jehofa eupša ga se a ka a kgahlegela bodumedi bja mosadi wa gagwe. Ka morago o ile a gwerana le Hlatse e bitšwago Russell. Emyr o hlalosa seo se fetotšego kgopolo ya gagwe ka gore: “Ke ile ka thoma go tšeela godimo thuto ya Beibele ge Russell a be a etla le puku ya Ke Eng Seo ge e le Gabotse Beibele e se Rutago? * O ile a nnea kopi gomme a re: ‘Puku ye ke ya Sewelsh. Re tlo thoma go ithuta yona go thoma gona bjale.’” Ke ka baka la’ng Emyr a kgahlilwe ke tsela yeo Russell a ilego a mmotša mahlong ka yona? Emyr o hlalosa gore: “Therešo ke gore re bolela leleme le tee, setšo sa rena ke se tee e bile re a kwešišana.” Pelo ya Emyr e ile ya ‘fsa’ ge a be a ekwa molaetša wa Beibele ka leleme la gabo la Sewelsh leo a bego a le kwešiša gabotse.

Dihlatse tša Jehofa di tla tšwela pele go thuša batho go ithuta ka Modimo ka maleme a bona e lego leleme leo le kgomago pelo.

^ par. 2 Sehlogong se Brithania e šupa Engelane, Scotland le Wales.

^ par. 11 Puku ya go ithuta Beibele yeo e tšweleditšwego ke Dihlatse tša Jehofa.

Ithute ka mo go oketšegilego

KE BOMANG BAO BA DIRAGO THATO YA JEHOFA LEHONO?

Kamoo Dikgatišo tša Dihlatse tša Jehofa di Ngwalwago le go Fetolelwa ka Gona

Re tšweletša dikgatišo ka maleme a ka godimo ga a 600. Ke ka baka la’ng re itapiša gakaakaa?

Kgopela Thuto ya Mahala ya Beibele

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?