Eya go dikagare

Eya go menyu wa bobedi

Dihlatse tša Jehofa

Sepedi

Go Gatiša Dikgatišo Lefaseng ka Bophara go Thuša Batho go Tseba Modimo

Go Gatiša Dikgatišo Lefaseng ka Bophara go Thuša Batho go Tseba Modimo

Lefaseng ka bophara, batho ba bala dikgatišo tša Dihlatse tša Jehofa. Dimilione tša batho di bala dikgatišo tše ka mokgwa wa elektroniki go etša ge wena o dira gona bjale. Lega go le bjalo, o ka makatšwa ke go tseba gore re na le metšhene e mentši ya go gatiša. Go tloga ka 2013, re gatišitše dikgatišo tšeo di theilwego Beibeleng ka maleme a ka bago a 700 gomme tša išwa dinageng tše 239.

Dikhamphani tše dingwe di be di re gatišetša pele ga 1920. Ngwageng wona woo re ile ra thoma go gatiša tše dingwe tša dimakasine le dipukwana tša rena moagong o monyenyane woo o bego o hirilwe kua Brooklyn, New York. Ga bjale re na le mafelo a go gatiša a 15 ao a lego Afrika, Amerika Borwa, Amerika Leboa, Asia, Australia le Yuropa.

Puku ya Rena e Bohlokwa Kudu

Puku e bohlokwa kudu yeo re e gatišago ke Beibele. Ka 1942, Beibele ya mathomo e feletšego yeo e gatišitšwego metšheneng ya rena e be e le King James Version ya Seisemane. Go tloga ka 1961, Dihlatse tša Jehofa di fetoletše le go tšweletša Beibele e feletšego ya Phetolelo ya Lefase le Lefsa ya Mangwalo a Makgethwa. Ka 2013, re be re šetše re tšweleditše dikopi tša Beibele ye tše fetago tše dimilione tše 184 ka maleme a 121.

Dipalopalo tšeo re di gatišago ga di anege ditaba ka botlalo. Dibeibele tšeo re di tšweletšago di tiile kudu. Matlakala a tšona a phrinthwa pampiring yeo e se nago acid yeo e fetolago pampiri gore e be e serolwana gomme matlakala ao a tlengwa ka kelohloko. Se se dira gore re kgone go tšweletša Beibele e tiilego yeo e ka dirišwago letšatši le letšatši.

Dikgatišo tše Dingwe

Re printha gape le dikgatišo tše dingwe tšeo di thušago batho go kwešiša Beibele. Ela hloko dipalopalo tše dingwe tša 2013:

  • Morokami, makasine wa rena woo o dirišwago kudu, o gatišitšwe ka maleme a fetago a 210 gomme wa phatlalatšwa kudu lefaseng go feta dimakasine tše dingwe. Go gatišitšwe dikopi tše 45 000 000 tša tokollo e nngwe le e nngwe ya wona ya matlakala a 16.

  • Phafoga! yeo gantši e sepedišwago le makasine wa Morokami—ke ya bobedi yeo e phatlalatšwago ka boati gomme e gatišwa ka maleme a 99. Go gatišwa dikopi tše di ka bago tše 44 000 000 tša tokollo e nngwe le e nngwe ya yona.

  • Ke Eng Seo ge e le Gabotse Beibele e se Rutago? ke puku ya letlalo la boleta ya matlakala a 224 yeo e hlametšwego go thuša babadi ba yona go kwešiša dithuto tša motheo tša Beibele. Go tloga ka 2005, go gatišitšwe dikopi tše fetago tše dimilione tše 214 ka maleme a fetago a 240.

  • Theetša Modimo ke poroutšha ya matlakala a 32 yeo e hlametšwego go thuša batho bao ba sa kgonego go bala gabotse. E ruta ditherešo tše bonolo tša Beibele ka diswantšho tše dibotse le mantšu a makopana. Go gatišitšwe dikopi tše fetago dimilione tše 42 ka maleme a fetago a 400.

Go tlaleletša dikgatišong tšeo go šetšego go boletšwe ka tšona, Dihlatse tša Jehofa di gatiša gape le dipuku, diporoutšha le dipampišana tšeo di thušago barutwana ba Beibele go nyakišiša ka dipotšišo tša bona tša Beibele, go lebeletšana le mathata a bophelo le go ba le malapa a thabilego. Ka 2012 mafelo a go gatiša a Dihlatse tša Jehofa a tšweleditše dimakasine tše di fetago dibilione tše 1,3 gotee le dipuku le Dibeibele tše dimilione tše 80.

Ka 2012 mafelo a go gatiša a Dihlatse tša Jehofa a tšweleditše dimakasine tše di fetago dibilione tše 1,3 gotee le dipuku le Dibeibele tše dimilione tše 80

Batho bao ba etelago mafelo a rena a go gatiša ba makatšwa ke go bona batho bao ba šomago ka thata bao ba tšweletšago dikgatišo tše. Banna le basadi ba ka moka ba gafa nako le matla a bona. Bontši bja bona ge ba etla Bethele, yeo e bolelago gore “Ntlo ya Modimo,” ba tla ba sa tsebe selo ka go gatiša. Lega go le bjalo, ge ba fihla mo ba a tlwaetšwa e bile ba šoma le batho bao ba ba rutago mošomo gomme seo sa dira gore mošomo o tšhabe diatla. Ka mohlala, go tlwaelegile go bona masogana a mengwageng ya bo-20 a diriša metšhene yeo e gatišago ka lebelo yeo e kgonago go tšweletša dimakasine tše 200 000 tša matlakala a 16 ka iri.

Tšhelete ya go Dira tše ka Moka Etšwa Kae?

Mošomo woo o dirwago ke Dihlatse tša Jehofa lefaseng ka bophara o thekgwa ka meneelo ya boithatelo. Tokollo ya August 1879 ya Zion’s Watch Tower, yeo ga bjale e bitšwago Morokami e boletše gore : “Re dumela gore ‘Zion’s Watch Tower’ e thekgwa ke JEHOFA, gomme ge se se le ka tsela ye le ka mohla e ka se ke ya kgopela goba ya lopa batho gore ba e thekge.” Re sa dutše re ikwa ka tsela yeo.

Ke ka baka la’ng re gafa nako, tšhelete le go dira maiteko a makaaka modirong wo? Ka baka la gore go sa šetšwe gore o bala e nngwe ya Dibeibele goba dipuku tše dimilione tšeo di gatišitšwego ke rena goba o bala dikgatišo tše Inthaneteng, re holofela gore di tla go thuša go batamela Modimo.