Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Dirwa ga Dibeibele Kua Japane

Go Dirwa ga Dibeibele Kua Japane

Dihlatse tša Jehofa di hlomile motšhene o mofsa wa go dira dipuku bogatišetšong bja tšona kua Ebina, Japane, e le gore di fihlelele palo e nyakegago ya Dibeibele tša letlakala la ka ntle le thata le tša deluxe.

Mathomong, lekala la Japane le be le ipotšiša ge e ba se se tla atlega ka ge tšhišinyego ya lefase le tsunami tša March 11, 2011, di dirile gore mohlagase o kgaolwe kua Japane.

Lega go le bjalo, mošomo woo o ile wa kgatlampana ka September 2011. Mo e ka bago dikgwedi tše tharo ka morago, dikopi tša mathomo tša Phetolelo ya Lefase le Lefsa ka se-China di ile tša gatišwa motšheneng wo o mofsa wa go dira dipuku.

Motšhene wo woo o laolwago ka khomphutha ke wa botelele bja dimithara tše ka bago tše 400. Ge Dibeibele di dutše di sepela motšheneng, di a tlengwa, tša tsenywa letlakala la ka ntle, tša pitlaganywa, tša pakwa ke moka tša bewa ka mapokising ao a tswaletšwego gomme tša bewa godimo ga mapolanka a go bea merwalo.

Tirišano e Atlegišitše Modiro

Dilo di ile tša rulaganywa ka kelohloko e le gore mošomo wo o atlege. Ka mohlala, motšhene wa go dira dipuku o be o swanetše go phuthelwa ke moka wa laišwa ka mapokising a magolo a tšhipi a 34 gomme o romelwe go tšwa Yuropa go ya Japane.

Go ile gwa romelwa batho ba lesome go tšwa ofising ya lekala ya Dihlatse tša Jehofa ya United States gore ba ye Japane go yo thuša ka go beakanya motšhene woo. Ba bangwe ba ile ba dula dikgwedi tše tshela ba ruta bašomi ba Japane kamoo motšhene woo o swanetšego go dirišwa le go hlokomelwa ka gona.

Motšhene wo o mofsa o ile wa kgahla intaseteri ya tša metšhene ya go dira dipuku ya Japane le intaseteri ya tša kgatišo. Ka March 19, 2012, batho ba fetago lekgolo go tšwa diintasetering tšeo ba ile ba etela lekala la Japane. Ba ile ba kgahlwa ke seo ba se bonego moo.

Pele ba boela gae, yo mongwe le yo mongwe o ile a newa kopi ya Phetolelo ya Lefase le Lefsa yeo e gatišitšwego motšheneng woo o mofsa.

Ga bjale lekala la Japane ke le lengwe la makala ao a tšweletšago Dibeibele tša matlakala a ka ntle a thata bakeng sa Dihlatse tša Jehofa go swana le United States le Brazil.

‘Nka se sa Hlwa ke Ipshinne ka Mošomo’

Dihlatse le batho ba bangwe bao ba tšwago dikhamphaning tše dingwe bao ba thušitšego ka modiro wo ba ile ba thabela go šoma gotee. Mošomi yo mongwe yo e sego Hlatse o itše: “Ge ke na le lena ke ikwa ke le gae ga mahlaku.

Letšatšing la mafelelo la modiro wo, mošomi yo mongwe yo e sego Hlatse o itše: “Ruri nka se sa hlwa ke ipshinne ka mošomo go swana le kamoo ke ipshinnego ka gona mo Watchtower!

 

Ithute ka mo go oketšegilego

Go Gatiša Dikgatišo Lefaseng ka Bophara go Thuša Batho go Tseba Modimo

Dihlatse tša Jehofa di na le mafelo a go gatiša a 15 lefaseng ka bophara, go tšweletša dikgatišo tšeo di theilwego Beibeleng ka maleme a ka bago a 700.