Eya go dikagare

Eya go menyu wa bobedi

Dihlatse tša Jehofa

Sepedi

Mengwaga e Lekgolo ya Mmino Woo o Tumišago Modimo

Mengwaga e Lekgolo ya Mmino Woo o Tumišago Modimo

“Ke nyaka gore o ye phapošing ya go gatiša mantšu kua Columbia, New York City gomme o opele e nngwe ya dikopelo tša rena. Ge o fihla moo ba tla gatiša kopelo yeo. O se ke wa botša motho taba ye.”

William Mockridge

Morago kua ka 1913, William Mockridge o ile a phethagatša kabelo yeo e sa tlwaelegago e tšwago go Charles Taze Russell. * Kopelo yeo e tsebjago e le “The Sweet By-and-By,” e ile ya tšweletšwa e bapala ka lebelo la tekanyo ya 78 rpm. Ka morago William o ile a lemoga gore kopelo yeo e be e tla dirišwa ge go lokollwa “Photo-Drama of Creation,” e lego pontšho ya diswantšho tša dipolelo tša Beibele tšeo di gatišitšwego le mmino woo o sepedišanago le difilimi le diswantšho tša mmala tšeo di lego go di-slide tša galase. “Photo-Drama” e ila ya bapalwa ka lekga la mathomo kua New York City ka January 1914.

Rekhoto ya William e be e le e nngwe ya tše fetago tše 50 yeo e ilego ya bapalwa mafelong a fapafapanego ka Seisemane ge go be go bontšhwa “Photo-Drama.” Le ge bontši bja mmino woo o be o tšweleditšwe ke ba bangwe, direkhoto tše mmalwa go akaretša le tša William di be di hlamilwe le go opelwa ke Barutwana ba Beibele go tšwa pukung ya Hymns of the Millennial Dawn, e lego e nngwe ya puku ya dikopelo tša bona.

Go Ela Mantšu Hloko

Ka mengwaga e mentši, Dihlatse di be di diriša dikopelo tša borapedi tšeo di bego di ngwadilwe ke batho ba bangwe. Lega go le bjalo, ge go be go nyakega di ile tša fetoša mantšu a dikopelo tšeo go bontšha gore di be di kwešiša Mangwalo.

Ka mohlala, e nngwe ya dikopelo tšeo yeo e ilego ya bapalwa nakong ya “Photo-Drama” e be e bitšwa “Our King Is Marching On,” e lego kopelo yeo e bego e mpshafaditšwego ya “Battle Hymn of the Republic.” Mantšu a mothalading wa pele a kopelo ya “Battle Hymn” a thoma ka gore: “Mine eyes have seen the glory of the coming of the Lord.” Lega go le bjalo, Barutwana ba Beibele ba ile ba fetoša mantšu a gore a balege ka tsela ye: “Mine eyes can see the glory of the presence of the Lord.” Phetogo ye e bontšhitše seo ba se dumelago ka pušo ya Jesu Kriste gore e be e sa akaretše feela go tla ga gagwe eupša e bontšha lebaka le le swailwego la go ba gona ga gagwe.—Mateo 24:3.

Go lokollwa ga puku ya dikopelo ya Singing and Accompanying Yourselves With Music in Your Hearts ka 1966 go ile gwa dirwa e le boiteko bja go fediša mmino woo o bego o etšwa methopong e mengwe le madumeding a mangwe. Gona ngwageng woo, Dihlatse di ile tša kgobokanya sehlopha se senyenyane sa baletši ba diletšo gomme gwa gatišwa dikopelo ka moka tše 119. Dihlatse di ile tša diriša dikopelo tšeo ge di opela dibokeng tša tšona le go thabela go di theetša ge di le magaeng a tšona.

Ka 2009, Dihlatse tša Jehofa di ile tša lokolla puku e mpsha ya dikopelo ya Opelela Jehofa. Dikopelo tša mantšu tša dikoša tše di ile tša gatišwa ka maleme a mantši. Ka 2013 Dihlatse di ile tša thoma go tšweletša dibidio tša mmino tša bana ka lekga la pele. Bidio e nngwe e bitšwa Rapela ka Nako e Nngwe le e Nngwe. Bao ba etelago Wepesaete ya jw.org ba taonelouta dikopelo tše ka makga a dimilione kgwedi le kgwedi.

Ba bantši ba ile ba leboga mmino wo. Mosadi yo mongwe yoo a bitšwago Julie o ngwadile ka puku ya dikopelo ya Opelela Jehofa gore: “Dikopelo tše tše mpsha di kgahliša kudu! Ge ke le noši, ke bapala tšeo di bontšhago kamoo ke tlogago ke ikwa ka gona. Ka baka leo, ke bona tswalano ya ka le Jehofa e matlafala e bile ke ikemišeditše kudu go feta le ge e le neng pele gore ke mo nee sohle seo ke nago le sona.”

Mma yo a bitšwago Heather o ngwadile se latelago ka bidio ya Rapela ka Nako e Nngwe le e Nngwe yeo e ilego ya kgoma bana ba gagwe, wa mengwaga e šupago le e senyane, “E ba thušitše go rapela, e sego feela mathomong a letšatši goba ge ba na le rena eupša nako le nako ge ba ikwa ba nyaka go boledišana le Jehofa.”

^ ser. 3 Charles Taze Russell (1852–1916) o ile a etelela pele Barutwana ba Beibele, ka ge Dihlatse tša Jehofa di be di tsebja bjalo nakong yeo.

Ithute ka mo go oketšegilego

MODIRO WA GO GATIŠA

Mmino wa Maleme a Mantši

Ithute ka ditlhohlo tšeo di bilego gona ge go fetolelwa mantšu a koša ka maleme a mantši.

BOPHELO BJA BETHELE

Pontšho ya Histori ya Ntlokgolo ya Lefase ka Bophara

Ithute ka histori e kgahlišago ya mehla ya pele ya Bokriste le bohwa bja moya bja Dihlatse tša Jehofa. Lefelo la pontšho moo go se nago mosepediši leo le nago le dingwalwa tše makgolo, dinepe le dilo tše dingwe tša bokgabo.