Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Dibidio Tšeo di Thabišago

Dibidio Tšeo di Thabišago

Tate yo mongwe kua Malaysia ge a hlalosa lelokelelo la dibidio tša dipopaye tša Eba Mogwera wa Jehofa, o itše: “E be eka Jehofa o be a badile seo se lego dipelong tša batswadi.”

Ga e sa le go tloga ka bidio ya pele yeo e lokolotšwego, Dihlatse tša Jehofa di tšweleditše dibidio tša dipopaye tšeo di bolelago ka Kabelo le lapa la gabo. Dibidio tšeo ga bjale di hwetšagalago go jw.org/nso, di ruta bana mekgwa e mebotse ya boitshwaro le go ba ruta seo mangwalo a se bolelago, bjalo ka lebaka leo ba sa swanelago go utswa le kamoo ba ka rapelago Modimo.

Bidio ya pele ya dibidio tše e šetše e fetoletšwe ka maleme a 131 gomme e ruta bana lefaseng ka bophara.

Di a Ratwa

Mma wa bana ba bahlano o ngwadile gore: “Ga e sa le re hwetša DVD ya Theetša, Ekwa Gomme o Šegofatšwe beke e fetilego, re e bogetše ka makga a e ka bago a 50.”

Millie, wa mengwaga 12 wa kua Engelane, o na le buti wa mengwaga e 15 yo a bitšwago Thomas, yo a nago le bolwetši bja Down syndrome. Millie o ngwadile gore: “Thomas o na le dibidio tša Kabelo ka go iPad ya gagwe, gore a kgone go di bontšha bagwera ba gagwe sekolong. O rata dikoša tša tšona e bile o di opela gabotse moo e bile ka dinako tše dingwe ke llago. Go tloga go kgahliša!”

Ava, yo a rego o na le mengwaga e 8, dikgwedi tše 9 le matšatši a 25, o ngwadile gore: “Kabelo le sesi’agwe ba kgona go ruta bana.”

Mikaylah o ngwadile gore: “Ke na le mengwaga e tshela. Ke le leboga ka DVD ya Theetša, Ekwa Gomme o Šegofatšwe. E nthuta go kwa batswadi ba ka ka ge seo se thabiša Jehofa.”

Di a Ruta

Mofsa yo mongwe yo a dirago difilimi tša dipopaye yoo e sego Hlatse ya Jehofa o ile a bogela bidio ya O se ke wa Utswa. O be a tloga a kgahlegile, kudukudu ge a ekwa gore bidio ye e dirilwe ke batho ba sego kae feela. O itše: “Ke tseba batho bao ba šomago dikhamphaning tše dikgolo le tše dinyenyane tša go dira difilimi tša dipopaye gomme ka dinako tše dingwe ke be ke ipotšiša gore go šoma moo go bjang. Eupša mafelelong, mošomo le maiteko a bona a go dira difilimi tše a fo segiša batho ka nakwana gomme gwa felela moo. Dibidio tša lena di kgoma maphelo a bana, di ba ruta phapano magareng ga se se lokilego le se se fošagetšego e bile di ba thuša go dira diphetho tše dibotse. Le dira selo seo se nago le morero, selo seo se thušago batho.”

Batswadi lefaseng ka bophara ba dumelelana le se ntle le go dikadika. Mma yo mongwe o ngwadile gore: “Morwa wa ka wa mengwaga e meraro e lego Quinn, o be a bogetše bidio ya Go Gwerana le Jehofa. Gare ga koša, o ile a ntebelela, a bea letsogwana la gagwe sehubeng gomme a re: ‘Mama, go lebelela bidio ye go a nthabiša.’ ”