Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Ga Bjale Puku ya Genesi e Gona ka Polelo ya Diatla ya Amerika

Ga Bjale Puku ya Genesi e Gona ka Polelo ya Diatla ya Amerika

DIFOA di ile tša dira seka sa go phaphatha matsogo ge di ekwa tsebišo e kgahlišago e rego: “Le tla thabela go tseba gore ga bjale go fetolelwa Mangwalo a itšego a Seheberu [Testamente ya Kgale]. Ga bjale [bidio] ya puku ya Genesi e šetše e feditšwe!

Tsebišo yeo e dirilwe polelong ya mafelelo ya dikopano tšeo di sa tšwago go swarwa ke Dihlatse tša Jehofa ka Polelo ya Diatla ya Amerika (ASL).

Ka 2005, Dihlatse tša Jehofa di ile tša thoma go fetolela Phetolelo ya Lefase le Lefsa ya Mangwalo a Makgethwa ka Polelo ya Diatla ya Amerika, gomme go thomilwe ka puku ya Mateo. Ka 2010, dipuku ka moka tše 27 tšeo di tsebjago e le Testamente e Mpsha di be di feditšwe go fetolelwa ka Polelo ya Diatla ya Amerika.

Go oketša moo, Dihlatse tša Jehofa di fetoletše dikarolo tše itšego tša Beibele ka dipolelo tše dingwe tše hlano tša diatla.

Ke ka baka la’ng go dirwa mošomo o mokaakaa? Dihlatse tša Jehofa di lemogile gore dipuku tše dintši di ngwadilwe ka maleme ao difoa tše dintši di sa a tsebego. Phetolelo ya Beibele ya polelo ya diatla yeo e nepagetšego, e kwagalago le ya tlhago e thuša difoa tše dintši go kwešiša seo se bolelwago le gore di be le tswalano ya kgauswi le Modimo. Ke’ng seo batho ba se boletšego ka go fetolelwa moo ga Beibele?

Lesogana le lengwe la sefoa le itše: “Ge puku ya Mateo e lokollwa nywageng e mmalwa e fetilego, ke ile ka lemoga gore ye ke tsela yeo Jehofa Modimo a mpontšhago ka yona gore o a nthata, le gona go lokollwa ga puku ya Genesi go bontšhitše seo le go feta. O leka ka gohle gore ke mo tsebe.

Mosadi yo mongwe wa sefoa o ile a bolela seo se lego pelong ya gagwe ka gore: “Polelo ye ya diatla e a kwešišega! Ke ikwa ke thoma go rata Beibele. Ke lemogile gore Jehofa o nyaka ke bala Lentšu la gagwe le go le kwešiša, temana ka temana, e le gore ke mo tsebe gabotse. Ka tsela yeo le kwešišegago ka yona le kgoma pelo ya ka gomme le nthuša gore ke bolele le yena ke mo tšhollele se lego pelong ya ka.