Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Ba Nyaka go Šoma ba sa Patelwe

Ba Nyaka go Šoma ba sa Patelwe

Nywageng ya ka godimo ga e 28 e fetilego, Dihlatse tša Jehofa tše di fetago tše 11 000 di ile tša tlogela magae a tšona gaešita le dinaga tša gabo tšona go yo thuša ka modiro wa go aga dinageng tše 120. Ka mehla, Dihlatse tše ka moka di ile tša diriša bokgoni le matla a tšona ntle le kgapeletšo, di sa patelwe.

Ba bantši ba ile ba itefelela dinamelwa gore ba fihle moo go agwago. Ba bangwe ba ile ba šoma ka matšatši a bona a go khutša. Ba bangwe ba ile ba kgopela mešomong ya bona gore ba se šome ka nako e itšego gomme ba ile ba fokoletšwa tšheletše e ntši ya mogolo.

Ba be ba sa gapeletšwe ke motho go dira seo, eupša ba ile ba ikgafa ka go rata gore ba tšwetše pele boboledi bja lefaseng ka bophara bja ditaba tše dibotse tša Mmušo. (Mateo 24:14) Ba agile diofisi, meago ya bodulo le mafelo a go gatiša Dibeibele le dikgatišo tšeo di theilwego Beibeleng. Dihlatse tša Jehofa gape di agile Diholo tša Kopano tšeo di nago le ditulo tše di fihlago go 10 000 le Diholo tša Mmušo tše di nago le ditulo tše di ka fihlago go 300.

Modiro wo o sa tšwela pele. Ge bašomi ba fihla moo go agwago gona, ofisi ya lekala ya lefelong leo e ba nyakela madulo, dijo, moo ba ka hlatswago diaparo le dilo tše dingwe tšeo ba ka di hlokago letšatši le letšatši. Dihlatse tša lefelong leo le tšona di tšea karolo ka lethabo modirong wa go aga.

Ka 1985, go ile gwa hlongwa lenaneo la go aga la ditšhabatšhaba go rulaganya le go laola modiro wo. E le gore ba tšee karolo modirong wo, baithaopi e swanetše go ba Dihlatse tša Jehofa tšeo di lego magareng ga nywaga e 19 le e 55 gomme ba tseba bonyenyane mošomo o tee wa go aga. Gantši kabelo ye e ka tšea dibeke tše pedi go iša go dikgwedi tše tharo, eupša tše dingwe di ka gagabela go ngwaga goba go feta moo.

Basadi ba baagi ba ba tlwaeditšwe mešomo e bjalo ka go tšhumelela ditšhipi tše di tiilego tša marulelo, go tsenya dithaele goba go gohla leboto le go le penta. Ba bangwe ba thuša ka go direla bašomi dijo goba go ba hlwekišetša mafelo a bodulo.

Ge baithaopi ba boela magaeng a bona, ba bangwe ba ngwala mangwalo go leboga gore ba ile ba kgopelwa gore ba tle ba šome. Banyalani ba bangwe ba ngwadile gore: “Re rata go le leboga kudu ka tokelo yeo re bilego le yona ya go šoma lekaleng la Budapest. Dihlatse tša Hungary di be di re rata kudu e bile di leboga seo re se dirago! Go laelana le bona ka morago ga go ba le bona kgwedi ka moka go be go le thata. Eupša re a tseba gore gantši go kgaogana ga go bose! Re holofela gore re tla ba le bona gape nakong e tlago. Re ka se tsoge re lebetše dikgwedi tšeo re di feditšego re le kabelong e nngwe le e nngwe.”