Eya go dikagare

Eya go menyu wa bobedi

Dihlatse tša Jehofa

Sepedi

Go Šetše go Agilwe Diholo tša Mmušo tše 1 000, e Bile go sa Agwa tše Dingwe

Go Šetše go Agilwe Diholo tša Mmušo tše 1 000, e Bile go sa Agwa tše Dingwe

Ka August 2013, Dihlatse tša Jehofa kua Philippines di dirile semaka ge di fetša go aga Holo ya Mmušo ya bo-1 000 lenaneong la tšona la moswananoši la go aga. Go swana le dinageng tše dingwe tše dintši, diphuthego tša Philippines ka dinako tše dingwe di hlaela tšhelete goba batho bao ba nago le bokgoni bja go aga Diholo tša tšona tša Mmušo ntle le go thušwa ke batho ba bangwe. Ka mengwaga e mentši, batho ba bangwe ba be ba kopanela malapeng a Dihlatse tše dingwe, mola ba bangwe ba be ba kopanela meagong e menyenyane yeo e dirilwego ka dikota tša bamboo.

Koketšego e tšwelago pele ya Dihlatse tša Jehofa e dirile gore go nyakege Diholo tša Mmušo tše oketšegilego kua Philippines le dinageng tše dingwe tše dintši. Ka baka leo, ka 1999 Sehlopha se Bušago sa Dihlatse tša Jehofa se ile sa hloma lenaneo la go aga Diholo tša Mmušo dinageng tšeo di diilago. Ka go dumelelana le lenaneo le, Dihlatse tša lefelong leo di neela ka mo di ka kgonago ka gona gomme meneelo yeo ya hlakanywa le e mengwe ya dinaga tše dingwe. Go rulaganywa batho ka dihlopha bao ba nago le bokgoni bja go aga go thuša diphuthego go aga Diholo tša tšona tša Mmušo. Ka November 2001, lenaneo le la lefase ka bophara le ile la thoma go dirišwa kua Philippines.

Iluminado ke setho sa phuthegong ya Marilao kua Bulacan, moo Holo ya Mmušo ya bo-1 000 e agilwego gona. O itše: “Ruri ke bone borwarre bja Bokriste. Baithaopi ba bantši ka tsela ye—banna le basadi, batho ba bagolo le bana. Re be re šoma mmogo letšatšing le le fišago. Le ge re be re lapile mafelelong a letšatši le letelele la mošomo, e be e le lethabo feela go bona mošomo woo re o dirilego re le mmogo.”

Batho bao e sego Dihlatse le bona ba be ba kgahlilwe ke maiteko a baithaopi ba. Mong wa lori yeo e bego e tliša santa le lekgwara lefelong leo holo yeo e bego e agwa go lona, o itše: “Lena batho okare le ditšhoši—le ba bantši kudu! Batho ka moka ba a thuša. Le ka mohla ga sa nka ka bona selo sa go swana le se.”

Holo ya Mmušo yeo e Fedilego

Baithaopi ba ile ba fetša go aga ka dibeke tša ka tlase ga tše tshelelago go tloga ge ba be ba thoma ka leboto. Go aga Holo yeo ya Mmušo ka lebelo, ditho tša phuthego di ile tša kgona go tšea karolo modirong wa tšona wa bohlokwa wa go bolela ditaba tše dibotse tša Mmušo wa Modimo.—Mateo 24:14.

Ellen, e lego setho se sengwe sa phuthego yona yeo o re: “Re be re sa kgone go lekana ka moka ga rena ka Holong ya Mmušo ya kgale gomme ba bangwe ba ile ba swanela go dula ka ntle. Holo ya Mmušo e mpsha ke e botse e bile re kgona go dula go yona ka go iketla, ka gona ka moka re holwa kudu ke thuto le kgothatšo yeo re e hwetšago dibokeng tša rena.”

Ithute ka mo go oketšegilego

MOROKAMI (KGATIŠO E ITHUTWAGO)

Ba Ile ba Ikgafa ka go Rata Kua Philippines

Ithute ka seo se tutueleditšego ba bangwe go tlogela mešomo ya bona, go rekiša dithoto tša bona, go phela bophelo bjo bonolo le go hudugela ditikologong tšeo di lego lekatana tša kua Philippines.