Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Tiragalo Yeo e Bontšhitšwego Dikarolong tše Dintši tša Lefase ka Inthanete

Tiragalo Yeo e Bontšhitšwego Dikarolong tše Dintši tša Lefase ka Inthanete

Ka Mokibelo wa October 5, 2013, batho ba 257 294 go tšwa dinageng tše 21 ba be ba bogetše seboka sa bo-129 sa ngwaga le ngwaga sa Watch Tower Bible and Tract Society of Pennsylvania, e ka ba ba be ba le gona ka go lebanya goba ba se bogetše ka Inthanete. Moragonyana mafelobekeng ona ao, Dihlatse tše dingwe di ile tša bogela ge lenaneo le bapalwa gape. Batho bao ka moka ba bego ba le gona le go bogela lenaneong leo e be e le ba 1 413 676 go tšwa dinageng tše 31. Seboka sa lenyaga e bile se segolo kudu sa Dihlatse tša Jehofa, se feta lenaneo le le kgethegilego leo le bego le swerwe kua Mexico le Bogareng bja Amerika ka April 28, 2013, leo le bego le bogetšwe ke batho ba 1 327 704.

Go thoma ka bo-1920, Dihlatse tša Jehofa di be di gaša dikopano tša tšona go batho ba dinageng tše dingwe di diriša mogala goba diradio tše dikgolo. Ga bjale, thekinolotši ya Inthanete e dira gore le bao ba lego kgole ba kgone go kwa le go bogela ditiragalo ge di dutše di direga goba gateetee ge di se na go direga. William, yoo e lego Hlatse ya Jehofa kua United States, o be a le gona kopanong yeo e bego e le kua Richmond, Virginia, ka 1942 gomme o be a theeditše lenaneo leo le kgokagantšwego ka mogala. Ge a bapetša kopano yeo le lenaneo la seboka sa lenyaga sa ngwaga le ngwaga o re: “O holwa kudu ke lenaneo ge o le bogetše. Se ga se bapetšwe le selo.”

Ditho tša makala a mmalwa a Dihlatse tša Jehofa di šomile ka lebaka le le fetago ngwaga go lokišeletša go kgokaganya lenaneo ka Inthanete, di dirile se ka go gafa diiri tše ntši. Mafelobekeng a ge lenaneo le le tlo kgokaganywa, ditsebi tša thekinolotši di be di hlokometše lenaneo leo di le metšheneng yeo e laolago kgokaganyo yeo kua Brooklyn, New York gomme di šoma bošego ka moka, lenaneo le le be le bontšhwa mafelong a 15 ao a šianago ka dinako. Ryan, yoo a bego a thuša ka go lokišetša le go hlokomela metšhene yeo e bego e dirišwa go kgokaganya ka Inthanete, o itše: “Ga se ra ka ra robala, eupša go tseba gore lenaneo le le be le tlo hola batho ba bantši kudu go ile gwa re kgothatša.”

Go bogetšwe lenaneo toropong ya Katherine, Northern Territory kua Australia