Eya go dikagare

Eya go menyu wa bobedi

Dihlatse tša Jehofa

Sepedi

Go Aloga ga Sehlopha sa bo-134 sa Gilead—“Ekišang Tumelo ya Bona”

Go Aloga ga Sehlopha sa bo-134 sa Gilead—“Ekišang Tumelo ya Bona”

Klase ya bo-134 ya Sekolo sa Beibele sa Watchtower sa Gilead e alogile ka Mokibelo wa March 9, 2013, lefelong la tša thuto la Dihlatse tša Jehofa kua Patterson, New York. Sekolo se se tlwaetša baebangedi bao ba nago le phihlelo ba Dihlatse tša Jehofa gore ba kgone go atlega bodireding bja bona. Bagwera, ba leloko, gotee le baeng ba bangwe ba bile gona lenaneong le la go aloga, gomme go bile le batho ba 9 912 lenaneong.

Mark Sanderson, e lego setho sa Sehlopha se Bušago sa Dihlatse tša Jehofa, e be e le modulasetulo wa lenaneo le. O gopoditše batheetši ka go bulwa ga Sekolo sa Gilead, moo go diregilego nywaga e 70 e fetilego ka February 1, 1943. Tiragalong yeo, mopresitente wa sekolo seo Nathan Knorr, o ile a bolela ka morero wa sekolo seo ge a be a re: “Go sa dutše go sa na le batho ba ka godimo ga makgolo a dikete bao ba ka fihlelelwa [ka ditaba tše dibotse tša Mmušo wa Modimo] ge feela go ka ba le badiri ba bantši tšhemong. Ka botho bja Morena, go tla ba le ba bantši.” Na e ka ba Ngwanabo rena Knorr o be a bolela maaka?

Ela hloko mohlala wo. Gateetee ka morago ga go thoma ga sekolo se, Ngwanabo rena Knorr o ile a etela Mexico go yo nyakana le mafelo ao baromiwa ba tlwaeditšwego ba Gilead ba ka romelwago go wona. Nakong ya ketelo ya gagwe, diphuthego ka moka tšeo di bego di le dikhilomithara tše 240 go tloga Toropong ya Mexico di ile tša laletšwa sebokeng gomme ba 400 ba ile ba ba gona. Ga bjale, go šetše go fetile nywaga e ka bago e masomešupa ga e sa le go tloga mola dialoga tša mathomo tša Gilead di fihlago kua Mexico, batho bao ba fetago ba 200 000 ba be ba ka tla sebokeng se ge e ba lefelo le le be le ka laletšwa gape lehono!

“Ke Eng se o se Swerego ka Seatleng sa Gago?” Anthony Griffin, e lego setho sa Komiti ya Lekala la United States, o ile a tla ka sehlogo se seo se theilwego go Ekisodo 4:2. Pegong ye, Modimo o botšišitše Moshe gore: “Ke eng se o se swerego ka seatleng sa gago?” Moshe o ile a araba ka gore: “Ke lepara.” Jehofa o ile a diriša lepara leo e le seka sa bolaodi le thomo yeo a e neilego Moshe. (Ekisodo 4:5) Moshe o ile a atlega ge a be a diriša bolaodi bja gagwe go tagafatša Modimo, eupša o ile a se kgahliše Modimo ge a be a itagafatša gotee le go galefela bana babo, ka ge a dirile seo kua “Meriba.”—Numeri 20:9-13.

Ngwanabo rena Griffin o swantšhitše lepara la Moshe le tlwaetšo ye ya moya yeo barutwana ba Gilead ba e amogelago, a kgothaletša barutwana gore ba se e dirišetše go laola ba bangwe. Go e na le moo, o ile a ba eletša gore: “Dirišang seo le ithutilego sona go reta le go godiša Jehofa, ka go re’alo le tla tšwela pele le le tšhegofatšo go bao le ba hlankelago.”

“Gopolang Manna.” Stephen Lett wa Sehlopha se Bušago o gateletše dithuto tše di latelago tše nne tšeo re ka ithutago tšona go manna ao ka mohlolo Modimo a a neilego Baisiraele kua lešokeng.

  • Tšwelang pele le šoma ka thata. (Numeri 11:8) Gore ba fepše ke manna, Baisiraele ba be ba swanetše go a topa kapejana gomme ba a lokišeletše go jewa.—Ekisodo 16:21.

  • Le ka mohla le se ke la ngongoregela ditokišetšo tša Jehofa. (Numeri 11:5, 6) Baisiraele ba ile ba belaela ka manna, eupša Modimo o ile a lebelela seo e le go ngongoregela yena. Go swana le manna, dijo tša moya tšeo re di hwetšago ga se ka mehla di thabišago, eupša ka mehla di a re fepa. Re swanetše go leboga kudu ditokišetšo tše dingwe le tše dingwe tšeo Jehofa a re neago tšona.

  • Kgodišegang ka mo go feletšego gore Jehofa o tla le hlokomela. Modimo o ile a nea Baisiraele manna letšatši le letšatši ka go se kgaotše go akaretša le go ba nea dikarolo tše pedi tša manna pele ga Sabatha. (Ekisodo 16:22-26) Ka mo go swanago, re holofela gore Modimo o tla re nea dilo tšeo re di hlokago.—Mateo 6:11.

  • Le ka mohla go se kwe ga se gwa ka gwa tliša ditšhegofatšo. (Ekisodo 16:19, 20, 25-28) Baisiraele bao ba ilego ba leka go topa manna ka Sabatha ba ile ba galefiša Jehofa, le gona bao ka matšatši a tshelelago a beke ba bego ba boloka manna bakeng sa letšatši le le latelago ba be ba hwetša a etšwa diboko e bile a nkga gampe.

Ke moka ngwanabo rena Lett o ile a kgothaletša barutwana go gopola seo ba ithutago sona go manna, ka baka la gore Jehofa o tla ba ‘bulela mašoba a legodimo gomme a ba tšhollela tšhegofatšo ka boati.’—Maleaki 3:10.

“Itokišetšeng go Phela Lefaseng le Lefsa.” William Samuelson, yoo a okametšego Lefapha la Dikolo tša Pušo ya Modimo, o hlalositše gore ka moka ga rena re nyaka go ba lefaseng le lefsa, e bile re le fagahletše, eupša na e ka ba re tloga re itokišeleditše lona? Se se nyaka gore re ‘hlaphogelwe monaganong.’—1 Petro 4:7.

Re bontšha go hlaphogelwa monagano ka tsela yeo re lebelelago go se phethagale ga rena. Ga se ra swanela go bea Sathane goba lefase leo le laolwago ke yena molato ka baka la diphošo tša rena ka moka, mohlomongwe re nagana gore re tla lokiša mafokodi a rena lefaseng le lefsa ka morago ga ge Modimo a tlošitše ditutuetšo tšeo tše mpe. Ga bjale, re ka lwantšha dika tše sa kgahlišego tše bjalo ka boithati, ka go katanela go ‘apara semelo se sefsa.’—Baefeso 4:24.

“Tlogelang go Ingwalela Terama ya Bophelo.” Mark Noumair, e lego mohlahli wa sekolo sa Gilead, o ile a diriša papišo ya pene go bolela ka “tshekamelo ya go ingwalela terama ya bophelo.” Re ‘tlogela go ngwala’ ka go dumelela Jehofa gore a re ngwalele seo re swanetšego go se dira.

Kgoši Saulo ke mohlala wa temošo tabeng ye. O thomile bogoši bja gagwe a na le boikokobetšo e bile e le monna wa go ipoetša. (1 Samuele 10:22, 27; 11:13) Lega go le bjalo, ka moragonyana ke ge a šetše a “ingwalela terama ya bophelo,” ka go dira seo a bego a nagana gore se lokile e bile a ikgodiša. Modimo o ile a mo lahla ka ge a se a ka a kwa.—1 Samuele 14:24; 15:10, 11.

Le ge barutwana ba ba ile ba botega go fihla gona bjale, Ngwanabo rena Noumair o ile a ba gopotša gore ba swanetše go tšwela pele ba dira modiro wa Modimo ka tsela ya Gagwe. O ile a ba kgothaletša gore: “Le se ke la nagana gore ka ge le dirišwa ke Modimo, seo se le dira ba bakaone.” Ka mohlala, Moshe o paletšwe ke go latela ditaelo tša Modimo ge ka mohlolo a be a ntšha meetse leswikeng. Meetse a ile a tšwa, eupša Jehofa ga se a mo šegofatša.—Numeri 20:7-12.

“Go Ekiša Lentšu le le Hlabošago la Morongwa yo a Fofago Gare ga Legodimo.” Mohlahli wa Gilead, e lego Sam Roberson, o be a theile polelo ya gagwe go Kutollo 14:6, 7. Ka morago ga moo o ile a diragatša e mengwe ya mediro ya bona ya morago bjale ya go bolela ka Mmušo. Ka mohlala, ge morutwana yo mongwe a be a sa oka dihlabi tša go buiwa, o ile a nea bohlatse go mooki wa sepetlele. Ka ge mooki yoo a be a etšwa Peru, morutwana yoo o ile a thoma poledišano ka go mmontšha seswantšho sa modiro wa go nea bohlatse kua Chachapoyas, Peru, a diriša Wepesaete ya jw.org. Mafelelong go ile gwa thongwa thuto ya Beibele le yena le monna wa gagwe.

“O Ntahleditše ... mo ke Ilego ka Lahletšega.” (Jeremia 20:7) Allen Shuster, e lego Setho sa Komiti ya Lekala la United States, o ile a boledišana le banyalani ba babedi go tšwa klaseng. Barutwana ba ile ba ikwa eka ba ‘lahleditšwe’ ke Jehofa. Ka tsela efe? Ba ile ba thoma go nagana gore sekolo sa Gilead se thata. Lega go le bjalo, ge diklase di tšwela pele, ba ile ba makatšwa ke thušo yeo ba e hweditšego yeo e dirilego gore ba atlege. Kgaetšedi Marianne Aronsson o ile a bontšha gore o leboga tlwaetšo ya Gilead ka gore: “Le ka mohla nka se palelwe ke go kgetha seo ke swanetšego go ithuta sona—ke lemogile gore temana e nngwe le e nngwe ya Beibele ke lehumo.”

‘Ekišang Tumelo ya Bona.’ David Splane wa Sehlopha se Bušago o ile a nea polelo ya thwadi, a theile sehlogo sa yona go Baheberu 13:7, e rego: “Gopolang bao ba etelelago pele gare ga lena, bao ba le boditšego lentšu la Modimo gomme ge le dutše le akanya kamoo boitshwaro bja bona bo felelago ka gona, le ekiše tumelo ya bona.” Bao ba bego ba ‘etelela pele’ modirong wa Dihlatse tša Jehofa nywaga e 70 e fetilego ba ile ba bontšha bjang gore ba na le tumelo?

Ka September 24, 1942, Nathan Knorr o ile a swara seboka sa mohlakanelwa le balaodi ba mekgatlo e mebedi ya molao yeo e dirišwago ke Dihlatse tša Jehofa gomme a šišinya gore go hlangwe sekolo se sefsa sa Gilead, go tlwaetša baromiwa gore ba etelele pele modiro wa go nea bohlatse mafelong a mafsa. Lega go le bjalo, go be go bonagala go ka se kgonege gore sekolo seo se be gona. Ntwa ya II ya Lefase e be kgatlampana, gomme e dira gore go romela baromiwa dinageng tše dintši go be thata goba go se kgonege. Go oketša moo, ga e sa le go tloga ka bo-1930, maemo a ikonomi a ile a phuhlama gomme mokgatlo o be o na le tšhelete e ka dirišwago bakeng sa sekolo se ka nywaga e mehlano feela. Eupša bana babo rena bao ba ile ba bontšha gore ba na le tumelo ka ge ka moka ba ile ba dumelelana le tšhišinyo ye.

Dialoga tša diklase tša mathomo tša Gilead le tšona di ile tša bontšha gore di na le tumelo yeo re ka e ekišago. Di ile tša kgotsofalela seo di nago le sona gomme tša phema go rata tšhelete. (Baheberu 13:5, 6) Ba bantši ba ile ba nagana gore ba ka se tsoge ba bone malapa a gabo bona ka ge a ka se be le tšhelete e lekanego ya gore a ba lefelele gore ba etele gae. Ge e le gabotse, baromiwa ba bantši ba bone malapa a gabo bona ka morago ga nywaga e 10 goba e 15 ba le kabelong ya bona. Lega go le bjalo, ba be ba kgodišegile gore Jesu o tla tšwela pele a hlokomela bona le malapa a bona go etša ge a be a dutše a dira bjalo.—Baheberu 13:8.

Klase ya mathomo ya Gilead, ka 1943

Ka morago ga gore Ngwanabo rena Splane a hlalose ditlhohlo tšeo ba bangwe ba lebeletšanego le tšona tšhemong ya dinaga tše dingwe pele ba etla sekolong sa Gilead, o ile a botša barutwana gore: “Lena banna le basadi ba bafsa ba rategago le ba karolo ya histori e bohlokwa ya nywaga e 70 ya banna le basadi ba ba tsenego Sekolo sa Gilead. ... Thabelang go hlankela Jehofa kae goba kae.”

Ngwanabo rena Splane o ile a phetha polelo ya gagwe ka go bapala bidio e kopana ya diswantšho tša dialoga tše 77 tša Gilead tšeo ga bjale di hlankelago ofising ya lekala ya Dihlatse tša Jehofa ya United States, go akaretša le dialoga tše pedi tša klase ya mathomo ya 1943. Diswantšho tšeo di be di akaretša dikopelo tša mantšu tšeo di bego di dirišwa borapeding ke Dihlatse tša Jehofa nywageng e 70 e fetilego.

Ka morago ga ge barutwana ba hweditše di diploma tša bona, yo mongwe wa dialoga o ile a bala lengwalo la bona la go leboga sekolo seo. Ke moka Ngwanabo rena Sanderson o ile a phetha lenaneo ka go gatelela gore le ge go fetile nywaga e 70, seo Ngwanabo rena Knorr a se boditšego klase ya mathomo ya Gilead se sa le bohlokwa, ge a be a re: “Go sa šetšwe gore o romelwa kae, o se lebale gore . . . o mogoeledi wa Mmušo; ye ke tokelo e kgolo kudu yeo e kilego ya fiwa diphedi ka moka lefaseng ya go ba mogoeledi yo a tumišago Jehofa ga bjale pele ga Haramagedone. . . . Ge o sa na le tokelo ya go nea bohlatse, nea bohlatse.”

 

Ithute ka mo go Oketšegilego

BODIREDI BJA PHATLALATŠA

Nywaga e Masomešupa ya Sekolo sa Gilead

Ka February 1, 1943, klase ya mathomo ya sekolo se se kgethegilego e ile ya thoma kua leboa la New York. Se ile sa tlwaetša badiredi ba dikete go ruta ba bangwe ka Modimo.