Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Sehlopha se Bušago se Kgothatša Dihlatse Kua Russia le Ukraine

Sehlopha se Bušago se Kgothatša Dihlatse Kua Russia le Ukraine

“Re ile ra ikwa re bontšhitšwe lerato le legolo”. Ye e bile tsela yeo mosadi yo mongwe kua Ukraine a ikwelego ka yona ge a be a theeditše lengwalo le bohlokwa leo le badilwego ke Stephen Lett wa Sehlopha se Bušago sa Dihlatse tša Jehofa. E be e le yo mongwe wa Dihlatse tše 165 000 tšeo di bego di theeditše Ngwanabo rena Lett nakong ya ge a etetše naga yeo ka mafelobeke a di-10 le di-11 May, 2014.

Dipolelo tše di theilwego Beibeleng le lengwalo leo le badilwego di ile tša fetolelwa ka maleme a mahlano le go fetišetšwa ka kgokaganyo Diholong tša Mmušo tše ka bago 700 go dikologa le Ukraine.

Mafelobekeng wona ao, Mark Sanderson, e lego setho sa Sehlopha se Bušago, o ile a bala lengwalo leo e le karolo ya lenaneo leo le bego le swaretšwe bana babo rena kua Russia. Lenaneo leo le ile la fetolelwa ka maleme a 14, gomme batho ba 180 413 go tšwa diphuthegong tše fetago 2 500 kua Belarus le Russia ba be ba kgokagantšwe.

Lengwalo le, leo le tšwago go Sehlopha se Bušago, le be le lebišitšwe diphuthegong ka moka tša Russia le Ukraine. Ngwanabo rena Sanderson o ile a le bala ka Serussia, e lego seo se ilego sa tutueletša ofisi ya Lekala ya Russia go ngwala gore: “Bana babo rena le dikgaetšedi ba kgomilwe kudu ke gore Sehlopha se Bušago se kgahlegela kudu karolo ye ya tšhemo ya lefase. Ka moka ga rena re ile ra ikwa eka re gokaretšwe ka borutho ke Sehlopha se Bušago.”

Lengwalo leo le be le ngwaletšwe go homotša le go matlafatša Dihlatse tša lefelong leo le bego le na le khuduego ya dipolitiki. Le ile a kgothaletša bana babo rena go tšwela pele “e se karolo ya lefase” ka go kgomarela boemagare mabapi le ditaba tša lefase tša dipolitiki.—Johane 17:16.

Ka go re’alo, Sehlopha se Bušago se kgothaleditše Dihlatse tšeo go kgomarela tswalano ya kgauswi le Jehofa ka thapelo, go ithuta le go naganišiša ka lentšu la Modimo. Batheetši ba ile ba gopotšwa gore go sa šetšwe diteko tše ba ka lebeletšanago le tšona, ba ka kgodišega ka kholofetšo e tšwago go Modimo yeo e hwetšwago go Jesaya 54:17 e rego: “Sebetša le ge e le sefe seo se rulelwago go lwa le wena se ka se atlege.”

Sehlopha se Bušago se ile sa phetha lengwalo la sona ka mantšu a: “Re le rata kudu ka moka ga lena. Hle kgodišegang gore ka mehla re dula re naganne ka lena le gore re lopa Jehofa ka thapelo bakeng sa lena.”

Ofisi ya Lekala ya Dihlatse tša Jehofa ya Ukraine ge e hlalosa ka ketelo yeo e ngwadile gore: “Bana babo rena ba be ba thabišitšwe kudu ke tlhokomelo e lerato ya Sehlopha se Bušago. Ketelo ya Bana babo rena Lett le Sanderson kua Ukraine le Russia ka mafelobeke a swanago, e bile kgonthišetšo ya botee bja batho ba Modimo e bile e bontšhitše bana babo rena kamoo Jehofa le Jesu ba ba hlokometšego ka gona. Ka moka ga rena re a dumela gore ketelo ye e tlile ka nako ya maleba e bile re ikwa re matlafaleditšwe go tšwela pele re hlankela Jehofa go sa šetšwe mathata ao re ka kopanago le ona.”

Ithute ka mo go oketšegilego

Khutšo ya Lefase—Go Re’ng e le Toro Feela?

Maiteko a batho a go tliša khutšo ya lefase a paletšwe. Ela hloko mabaka a mmalwa.