Eya go dikagare

Eya go menyu wa bobedi

Dihlatse tša Jehofa

Sepedi

Pego ya Seboka sa Ngwaga le Ngwaga sa 2014

Mengwaga e 100 ya go Buša ga Mmušo!

Pego ya Seboka sa Ngwaga le Ngwaga sa 2014

Ka October 4, 2014, batho ba 19 000 ba be ba bokane sebokeng sa ngwaga le ngwaga sa bo-130 sa Watch Tower Bible and Tract Society of Pennsylvania. Lenaneo le be le swaretšwe Holong ya Kopano ya Dihlatse tša Jehofa kua Jersey City, New Jersey, U.S.A., mafelo a mangwe a mmalwa a be a kgokagantšwe ka bidio.

Mark Sanderson, e lego setho sa Sehlopha se Bušago sa Dihlatse tša Jehofa, e be e le modulasetulo wa seboka se. Mantšung a gagwe a go bula, Ngwanabo rena Sanderson o ile a gatelela gore seboka sa ngwageng wo ke se bohlokwa kudu historing ka ge go ketekwa mengwaga e 100 go hlomilwe Mmušo wa Mesia.

Ngwanabo rena Sanderson o ile a sekaseka dilo tše tharo tše bohlokwa tšeo Mmušo o kgonnego go di dira mengwageng e lekgolo ya mathomo ya go buša ga wona:

  • Mošomo wa boboledi lefaseng ka bophara. Ka tšhegofatšo ya Jehofa, batho ba gagwe ba šomile ka thata go phatlalatša ditaba tše dibotse tša Mmušo. Palo ya bagoeledi e oketšegile kudu go tloga go bagoeledi ba dikete tše sego kae ka 1914 go ya go dimilione tše fetago tše seswai ngwageng wa tirelo wa 2014. Re tla tšwela pele re dira boboledi ka mafolofolo go fihla Jehofa a re modiro o phethilwe.

  • Go šireletšwa ga balata ba Mmušo e le sehlopha. Balaodi ba bodumedi le ba dipolotiki ba ile ba re ganetša o šoro ba leka le go fediša Dihlatse tša Jehofa ka mo go feletšego. Lega go le bjalo, Jehofa o ile a šireletša barapedi ba gagwe e le sehlopha. Diphenyo tše dintši tša semolao tšeo di akaretšago tša kua Kgorongkgolo ya Tsheko ya United States le Kgoro ya Tsheko ya Ditokelo tša Batho ya Yuropa, di kgonthišeditše gore Jehofa o sa dutše a re hlokometše go fihla le lehono.

  • Go kopanya batho ba mehuta ka moka. Mmušo wa Modimo o kopantše batho ba tšwago ditšong, ditšhabeng le malemeng a fapanego, gomme wa ba thuša go fenya ditlhohlo tše dintši le go ba thuša go ba batee borapeding ba gagwe. Ngwanabo rena Sanderson o boletše gore: “Wo ke mohlolo wo o ka dirwago ke Jehofa Modimo feela.” O ile a bolela leboelela kamoo bao ba bego ba le gona ba ikwelego ba le bohlokwa ka gona go ba gona sebokeng se sa bohlokwa historing.

Lelokelelo la Dibidio tša Eba Mogwera wa Jehofa.

Lelokelelo la dibidio tše tša bana tšeo re di thabetšego ka mengwaga e mebedi, e bile sehlogo seo se latetšego lenaneong la seboka se. Sa pele, Ngwanabo rena Sanderson o ile a bapala bidio yeo e hlalosago tsela yeo bana go tšwa dikarolong tše fapanego tša lefase ba ikwago ka yona ka dibidio tše. Bao ba bego ba theeditše lenaneo ba ile ba kgongwa kudu ke mantšu a ditebogo ao a tšwago dipelong tša bana ba le kamoo ba thabišwago ke seo ba ithutago sona dibidiong tše.

Go ile gwa bontšhwa bidio e mpsha yeo e lego lelokelelong la dibidio tše. E na le sehlogo seo se rego: “Jehofa o tla go Thuša Gore o be le Sebete.” Bidio ye ya metsotso e 12 e phediša kanegelo ya Beibele ya mosetsana wa Moisiraele yo ka sebete a ilego a bolela ka Jehofa go mosadi wa Naamane. (2 Dikgoši 5:1-14) Bidio ye e beilwe go jw.org ka Mošupologo, October 6, 2014, gomme e hwetšagala ka maleme a fetago a 20.

JW Language.

Ngwanabo rena Sanderson o tsebišitše ka lenaneo le le lefsa leo le šomago didirišweng tša elektroniki, leo le tlago go thuša Dihlatse tša Jehofa tšeo di nyakago go ithuta leleme le lengwe bakeng sa go katološa bodiredi bja tšona. Lenaneo le le na le mantšu le dipolelwana tše fetago tše 4 000 ka maleme a 18. Go dirwa ditokišetšo tša gore go tsenywe mantšu le dipolelwana tše oketšegilego, dithero tša tirelong ya tšhemo le dilo tše dingwe.

JW Broadcasting.

Bao ba bego ba theeditše lenaneo ba ile ba thabišwa ke go kwa ka seteišene se sefsa sa thelebišene sa inthaneteng sa Dihlatse tša Jehofa, seo se tlago ba gona ka Seisemane feela go bona ge e ba se tla atlega. Seteišene se seo se lego ntlongkgolo ya lefase ka bophara kua Brooklyn, New York, U.S.A., se tla gaša mananeo ao a tla bontšhago dibidio tša rena, mmino le diterama tša mmalo wa Beibele. Go oketša mo, kgwedi e nngwe le e nngwe go tla ba le lenaneo leo le swarwago ke setho sa Sehlopha se Bušago goba mothuši wa e nngwe ya dikomiti tša sona.

Ngwanabo rena Sanderson o ile a bapala dikarolo tša mathomo tša bidio ya lenaneo le la thelebišene. Karolo ya mathomo ya lenaneo le e be e swerwe ke Stephen Lett wa Sehlopha se Bušago, gomme e bontšhitše mošomo wo o dirilwego ge go be go lokišetšwa seteišene se se sefsa sa thelebišene. JW Broadcasting e thomile go gašwa ka October 6, 2014, gomme e ka hwetšwa go tv.jw.org.

“Mmušo—Mengwaga e 100 le go ya Pele.”

Samuel Herd wa Sehlopha se Bušago o ile a laodiša bidio yeo e bego e bontšha kamoo Mmušo wa Modimo o tšwetšego pele o re thuša go gola le go kaonefatša tsela ya rena ya go dira boboledi. Bidio ye e be e bontšha histori, ditiragatšo le diphihlelo tša bao e bilego Dihlatse ka nako e telele, dikgato tšeo di ilego tša tšwewa go tšweletša le go bontšhwa ga “Photo-Drama of Creation”; go dirišwa ga phonograph, dikarata tša bohlatse, megwanto ya go phatlalatša boitsebišo, dikoloi tša go ba le segodišamodumo le dikolo tša go re tlwaeletša bodiredi.

Re holega bjang ka go naganišiša ka seo Mmušo o kgonnego go se dira ka mengwaga e 100 ya mathomo? Go naganišiša ka wona go tla dira gore e be wa kgonthe go rena gape go tla oketša tebelelo ya rena mabapi le seo Mmušo o tlago go se dira nakong e tlago.

Dikopelo tša Borapedi.

David Splane wa Sehlopha se Bušago o ile a thabiša kudu bao ba bego ba theeditše lenaneo ge a be a tsebiša ka tokišetšo ya go kaonefatša puku ya rena ya dikopelo ya Opelela Jehofa. E tla dirwa ka matlakala a ka ntle a go swana le a Phetolelo ya Lefase le Lefsa le mathoko a mmala wa silifera. Go dirišwa ga ditlabakelo tša maemo a godimo go bontšha kamoo mmino e lego karolo ya bohlokwa kudu borapeding bja rena.

Ngwanabo rena Splane o ile a tsebiša gape le ka dikopelo tše mmalwa tšeo di tla oketšwago pukung ya rena ya dikopelo. Lega go le bjalo ga go hlokagale gore re emele puku ya dikopelo yeo e kaonefaditšwego gore e gatišwe pele re ka thoma go diriša dikopelo tše tše difsa. Di tla lokollwa go jw.org ge di le gona.

Tše tharo tša dikopelo tše tše difsa, tšeo ditho tša lapa la Bethele di ithutilego tšona pejana bekeng yeo, di ile tša opelwa sebokeng se sa ngwaga le ngwaga. Ngwanabo rena Splane o ile a hlahla sehlopha sa diopedi seo se bego se opela kopelo e mpsha ya sehlogo seo se rego: “Mmušo o Hlomilwe—A o tle!” Kopelo ye e hlametšwe go swaya mengwaga e 100 ya go tswalwa ga Mmušo. Ka morago ga ge sehlopha sa diopedi se opetše koša, bao ba bego ba theeditše lenaneo ba ile ba opela le bona. Ka morago, sehlopha sa diopedi le bao ba bego ba theeditše lenaneo ba ile ba opela kopelo e nngwe e mpsha ya sehlogo seo se rego: “Re Nee Sebete.

Poledišano.

Gerrit Lösch wa Sehlopha se Bušago o ile a ba le poledišano yeo e bego e gatišitšwe e sa le pele le banyalani ba bararo bao ba nago le phihlelo ya mengwaga e masomesome ya tirelo ya Bethele. Ba ile ba hlalosa ka diphetogo tše dintši tšeo ba ilego ba di bona go theoša le nywaga, tšeo di gatelelago gore batho ba Modimo ba gatela pele. Ngwanabo rena Lösch o ile a bontšha gore Beibele e boletše e sa le pele ka diphetogo tšeo di bego di tla ba gona mokgatlong wa Jehofa le go kgothaletša ka moka go sepedišana le wona.—Jesaya 60:17.

“Diswantšhetšo le Dilo tša Kgonthe.”

Ngwanabo rena Splane o neile polelo ye yeo e hlalosago lebaka leo ka lona dikgatišo tša morago bjale di se sa bolelago ka diswantšhetšo le dilo tša kgonthe go etša ge di be di dira nakong e fetilego.

Nakong e fetilego, banna le basadi ba bantši ba botegago bao ba bolelwago ka Beibeleng ba be ba swantšhetša dihlopha tša Bakriste ba botegago ba mehleng ya rena. Ka mo go swanago, dipego tše dintši tša Beibele di be di tšewa e le boporofeta bja ditiragalo tšeo di akaretšago bahlanka ba Modimo ba mehleng yeno. Ke therešo gore e ka ba mo go kgahlišago go ithuta ka go swana mo. Eupša ke ka baka la’ng morago bjale dikgatišo tša rena ka sewelo di bolela ka diswantšhetšo le dilo tša kgonthe?

Mangwalo a bontšha gore batho ba itšego ka Beibeleng le ditiragalo di be di swantšhetša motho yo mongwe goba selo se sengwe se segolo. Ge Beibele e re botša ka mo go kwagalago ka seswantšhetšo goba selo sa kgonthe, re amogela tlhaloso yeo. Ngwanabo rena Splane o boletše gore: “Eupša mo Beibele e sa bolelego selo, ga re bolele selo le rena.” Re swanetše go phema go fatafata kudu ka taba e itšego. Lega go le bjalo, ge eba re tšea nako e ntši re fatišiša ka taba ya diswantšhetšo le dilo tša kgonthe gotee le phethagalo ya tšona, re ka lahlegelwa ke dithuto tša bohlokwa tšeo Beibele e re rutago letšatši le letšatši—go sa šetšwe gore re na le kholofelo ya legodimong goba ya mo lefaseng.—Baroma 15:4. *

“Na o tla ‘Dula o Phakgame’?”

Polelo ye, yeo e neilwego ke Ngwanabo rena Lett, e kaonefaditše kwešišo ya rena ya seswantšho sa Jesu sa dikgarebe tše lesome. (Mateo 25:1-13) Ga bjale re kwešiša seswantšho se ka tsela ye: Monyadi ke Jesu gomme dikgarebe tše lesome ke balatedi ba Jesu ba tloditšwego. (Luka 5:34, 35; 2 Bakorinthe 11:2) Seswantšho se se bolela ka mehla ya bofelo, le seremo sa yona seo se diregago nakong ya masetlapelo a magolo. Ge a hlalosa dikgarebe tše hlano tša mašilo, Jesu o be a sa bolele gore ba bantši ba balatedi ba gagwe ba tloditšwego ba tla ipontšha ba sa botege gomme se sa dira gore ba tšeelwe ke ba bangwe legato. Go ena le moo, Jesu o be a nea temošo e matla. Go etša ge dikgarebe tše hlano di be di na le temogo gomme tše dingwe tše hlano e le mašilo, motlotšwa yo mongwe le yo mongwe o na le sebaka sa go ikgethela go dula a itokišitše le go phakgama goba go ikgethela go se botege.

Ka go sepedišana le molao wa motheo wa go se fatišiše kudu pegong ya Beibele, e ka se be ga bohlale go fatišiša ka seswantšho se go bona kamoo karolo e nngwe le e nngwe ya sona e sepedišanago le boporofeta. Go ena le moo, re ka dira botse ge re ka ela hloko thuto ya bohlokwa yeo seswantšho se se re rutago yona. Go sa šetšwe gore re batlotšwa goba “dinku tše dingwe,” ka moka ga rena re na le boikarabelo bja gore seetša sa rena se bonege kudu le go ‘dula re phakgame.’ (Johane 10:16; Mareka 13:37; Mateo 5:16) Ga go na yo a ka botegago legatong la rena. Yo mongwe le yo mongwe wa rena o swanetše a “kgethe bophelo” ka go dula a phakgame moyeng le go ba mafolofolo bodireding.—Doiteronomio 30:19.

“Seswantšho sa Ditalente.”

Anthony Morris wa Sehlopha se Bušago o ile a nea polelo e latetšego, go thuša bao ba bego ba theeditše lenaneo go kwešiša tlhaloso ya rena e lokišitšwego ya seswantšho sa ditalente. (Mateo 25:14-30) Ga bjale re kwešiša gore mong wa bahlanka mo seswantšhong se (Jesu) o tla putsa bahlanka (balatedi ba gagwe ba botegago ba tloditšwego ba mo lefaseng) nakong e tlago ge a fihla gomme a ba tsošetša bophelong ka legodimong. Ge a hlalosa seo se tlago diragalela “mohlanka yo kgopo le wa sebodu,” Jesu o be a sa porofete gore balatedi ba gagwe ba tloditšwego ba bantši ba be ba tla tlogela go botega. Go ena le moo, o be a lemoša batlotšwa gore go nyakega gore ba dule ba phakgame le gore ba pheme mekgwa le boemo bja kgopolo bja mohlanka yo kgopo.

Ke thuto efe e bohlokwa yeo re ka e ithutago yona seswantšhong se? Mong wa mohlanka seswantšhong se o neile bahlanka ba gagwe selo sa bohlokwa. Ka mo go swanago, Jesu o neile balatedi ba gagwe selo seo a se tšeago e le sa bohlokwa—modiro wa go ruta le go dira batho barutiwa. O letetše gore ka moka ga rena re tšee karolo ka mafolofolo modirong wa boboledi go ya le ka matla a rena. Ngwanabo rena Morris o ile a reta bao ba bego ba le gona ka go tšea karolo ka mafolofolo medirong ya Mmušo.

“Ke Mang yo a Tlago Hlasela Batho ba Modimo e se Kgale?”

Se e bile sehlogo se se kgahlišago sa polelo ya go phetha lenaneo yeo e bego e newa ke Geoffrey Jackson wa Sehlopha se Bušago. Ngwanabo rena Jackson o ahlaahlile tlhaselo ya nakong e tlago ya batho ba Modimo yeo e tlago tlišwa ke Gogo wa Magogo.—Hesekiele 38:14-23.

Nakong e fetilego, re be re kwešiša Gogo e le leina le lengwe la Sathane Diabolo ka morago ga gore a rakwe legodimong. Lega go le bjalo, Ngwanabo rena Jackson o ile a nea mabaka go tšwa dipotšišong tše bohlokwa tšeo tlhaloso ye e tšwago go tšona. Ka mohlala, Jehofa o boletše e sa le pele gore ge Gogo a fenywa, Jehofa o be a tla gafela Gogo go ‘dinonyana tša mehutahuta le dibata tša naga gore a be dijo tša tšona.’ (Hesekiele 39:4) Jehofa o ile a bolela gape gore: “Gogo le lešaba la gagwe ka moka” ba tla newa lefelo la go bolokelwa mo lefaseng. (Hesekiele 39:11) Eupša dilo tšeo di ka kgonega bjang go sebopiwa sa moya? Sathane o tla lahlelwa sekoting ka mengwaga e 1 000, a ka se jewe ke dinonyana le dibata goba go bolokwa. (Kutollo 20:1, 2) Go feta moo, bofelong bja mengwaga e 1 000, Sathane o tla lokollwa sekoting gomme “o tla tšwela go timetša ditšhaba tšeo di lego dikhutlong tše nne tša lefase, Gogo le Magogo.” (Kutollo 20:7, 8) Go molaleng gore Sathane a ka se kgone go timetša Gogo ge eba e le yena Gogo.

Ngwanabo rena Jackson o hlalositše gore Gogo wa Magogo wa boporofeteng bja Hesekiele o swanetše go swantšhetša, e sego Sathane, eupša go kopana ga ditšhaba tšeo di tlago go hlasela batho ba Modimo nakong e tlago. Ka mo go swanago, tlhaselo ya Gogo e swana le tlhaselo ya “kgoši ya leboa” le tlhaselo ya “dikgoši tša lefase.”—Daniele 11:40, 44, 45; Kutollo 17:12-14; 19:19.

“Kgoši ya leboa” ke mang? Re tla swanela ke go leta go bona gore ke mang. Go sa šetšwe seo, re matlafala tumelo go bona kamoo kwešišo ya rena ka ditiragalo tšeo di sa tlago e tšwela pele e lokišwa ge ditiragalo tše di dutše di batamela ka lebelo. Ga re tšhošwe ke tlhaselo e tlago wela batho ba Modimo, ka ge re tseba gore ge Gogo wa Magogo a hlasela, o tlo fenywa le go fedišwa sa ruri—mola batho ba Modimo ba tla phela ka mo go sa felego. *

Phetho.

Ngwanabo rena Sanderson o ile a tsebiša gore Beibele e nyenyane ya Phetolelo ya Lefase le Lefsa ya Seisemane e a hwetšagala. Go oketša moo, go lokišetšwa gore go be le kgatišo ya go theetšwa ya mmalo wa Beibele, yeo e tlago go ba le mantšu a batho ba fapanego bao ba tla bego ba bala mantšu ao a bolelwago ke batho ba ka Beibeleng. Dikgatišo tše di tla bewa ganyenyane-ganyenyane Wepesaeteng ya jw.org, go thoma ka puku ya Mateo.

Ngwanabo rena Sanderson o ile a tsebiša gore sehlogo sa ngwaga sa 2015 e tla ba Psalme 106:1: “Lebogang Jehofa, gobane o lokile.” O ile a kgothaletša bohle go dula ba nyaka mabaka a go leboga letšatši le lengwe le le lengwe.

Kopelo ya go phetha seboka se e bile kopelo ya boraro ya dikopelo tša rena tše difsa ya sehlogo seo se rego: “Leina la Gago ke Jehofa.” Ditho ka moka tše šupa tša Sehlopha se Bušago di ile tša opela mmogo le sehlopha sa diopedi ge bohle bao ba bego ba le gona ba opela kopelo e mpsha ya go kgahliša—ruri ye e bile phetho ya maleba sebokeng se sa bohlokwa historing!

^ par. 22 Polelo ye le tše dingwe tše pedi tšeo di latetšego di theilwe dihlogong tšeo di tlago tšwelela tokollong ya Morokami wa March 15, 2015.

^ par. 30 Polelo ye e theilwe sehlogong seo se tlago tšwelela tokollong ya Morokami wa May 15, 2015.

Ithute ka mo go oketšegilego

MOROKAMI—KGATIŠO E ITHUTWAGO

Lebogang Jehofa Gomme le Šegofatšwe

Go ba le tebogo go ka go thuša bjang go lebeletšana le diteko?

MOROKAMI—KGATIŠO E ITHUTWAGO

Filimi Yeo e Nago le Nywaga e 100 Yeo e Agago Tumelo

Ngwageng wo filimi ya “Photo-Drama of Creation” e fetša nywaga e 100, e lego filimi yeo e bego e hlametšwe go thuša batho go ba le tumelo go Beibele e le Lentšu la Modimo.

MODIRO WA GO GATIŠA

Mengwaga e Lekgolo ya Mmino Woo o Tumišago Modimo

Dihlatse tša Jehofa di dirišitše bjang mmino le dikopelo borapeding bja tšona?