Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Aloga ga Klase ya bo-138 ya Sekolo sa Beibele sa Watchtower sa Gilead

Go Aloga ga Klase ya bo-138 ya Sekolo sa Beibele sa Watchtower sa Gilead

Ka March 14, 2015, klase ya bo-138 ya Sekolo sa Beibele sa Watchtower sa Gilead e ile ya aloga lefelong la thuto la Dihlatse tša Jehofa Patterson, New York. Batho ba fetago 14 000 ba ile ba bogela lenaneo le ge le dutše le tšwela pele, go akaretša le bao ba bego ba kgokagantšwe ka bidio mafelong a fapafapanego. Lenaneo le thomile ka mmino wa ketapele wa dikopelo tša rena tša Mmušo tše difsa, tšeo di ilego tša opelwa ke bohle bao ba bego ba le gona. *

Geoffrey Jackson, e lego setho sa Sehlopha se Bušago sa Dihlatse tša Jehofa, e be e le modulasetulo wa lenaneo. Mantšung a gagwe a go bula o ile a kgothaletša barutwana go se ikgobokeletše tsebo yeo ba e hweditšego eupša ba e dirišetše go hola ba bangwe.—2 Timotheo 2:2.

Ngwanabo rena Jackson o ile a bolela ka mohlala wa Moshe. Ka lebaka le letelele, tente ya Moshe e be e le lefelo la borapedi setšhabeng sa Isiraele. Lega go le bjalo, ka morago ga gore taberenakele e fele, e ile ya ba lefelo la borapedi bja therešo. Moshe o be a sa dumelelwa go tsena karolong ya Sekgethwakgethwa ya taberenakele; moperisita yo a phagamego ke yena a nnoši a bego a dumeletšwe go tsena lefelong le. Lega go le bjalo, ga go na mo go bontšhago gore Moshe o ile a belaetšwa ke phetogo ye. Go ena le moo, o ile a thekga Arone kabelong ya gagwe e mpsha ya go ba moperisita yo a phagamego ka pelo ka moka. (Ekisodo 33:7-11; 40:34, 35) Re ithuta eng? Ngwanabo rena Jackson o ile a re: “Tšeelang godimo ditokelo ka moka tšeo le di abetšwego, eupša le se ke la ikgobela tšona.”

“Na le tla Tšhošwa ke go Gwaša ga Letlakala?” Se e be e le sehlogo sa polelo yeo e neilwego ke Kenneth Flodin, yo e lego mothuši Komiting ya go Ruta ya Sehlopha se Bušago. O ile a dumela gore barutwana ba tla kopana le maemo ao a ka bonagalago a tšhoša, go swana le ditlaišo goba dikabelo tše thata. A diriša polelwana e lego go Lefitiko 26:36, o ile a kgothatša barutwana go se lebelele maemo ao e le a boima go ka lebeletšana le wona eupša ba a lebelele e le letlakala la go gwaša. Ngwanabo rena Flodin o ile a gatelela mohlala wa moapostola Paulo, yo a ilego a kgotlelela ditlhohlo tše dintši ka baka la ge a ile a bota Jehofa.—2 Bakorinthe 1:8, 10.

“Ke Eng Seo le se Nyakago?” Mark Sanderson, e lego setho sa Sehlopha se Bušago sa Dihlatse tša Jehofa, o ile a nea polelo e latelago lenaneong. O ile a bolela ka molaotheo wo o lego go Diema 13:12, wo o rego: “Go diega ga selo seo se letetšwego go bolaiša pelo.” Ka manyami, batho ba bantši ba fetša bophelo bja bona ka moka ba nyamišitšwe ke gore ba ipeela dipakane tšeo ba ka se tsogego ba di fihleletše, go swana le go huma le go tuma.

Mehleng ya Jesu, batho ba bangwe ba ile ba ba le pono e fošagetšego ka seo ba bego ba se letetše ka Johane Mokolobetši. (Luka 7:24-28) Ka mohlala, ba ka ba ba be ba holofetše go bona radifilosofi yoo a bego a tla ba botša dilo tšeo di kwešago ditsebe tša bona bose ka dithuto tše di bego di tsebja ke bohle. Ge eba go be go le bjalo, ba be ba tla nyamišwa kudu ke seo ba tlago go se hwetša, ka gore Johane o be a ruta molaetša o tiilego wa therešo. Ba bangwe ba ka ba ba be ba letetše go bona monna yo a aperego gabotse. Eupša Johane o be a apere diaparo tša batho feela ba diilago. Lega go le bjalo, bao ba bego ba itletše go tlo bona moporofeta ba be ba ka se nyame le gatee, ka gore Johane e be e se moporofeta feela eupša o be a tla kgorela Mesia tsela!—Johane 1:29.

Ngwanabo rena Sanderson o ile a kgothaletša barutwana go diriša thuto ye ka go nyaka dilo tša maleba. Go ena le go nyaka maemo le go swarwa ka tsela e kgethegilego dikabelong tša bona, ba swanetše go tshwenyega ka go diriša tlwaetšo yeo ba e hweditšego go hola ba bangwe. Ba ka dira se ka go abelana le ba bangwe seo ba ithutilego sona mo Gilead, ka go matlafatša tumelo ya bana babo bona le dikgaetšedi le go ba rata. Ngwanabo rena Sanderson o okeditše ka gore: “Lekang go ba bahlanka ba ikokobeditšego ba bana babo lena le dikgaetšedi gomme le dire sohle go phetha thato ya Jehofa, ka go rialo le ka se nyame le gatee.”

“Fepang Bao ba Swerego ke Tlala.” Se ke sehlogo sa polelo ya James Cauthon, yo e lego mohlahli wa Lefapha la Dikolo tša Pušo ya Modimo. Ngwanabo rena Cauthon o boletše gore batho ka moka ba nyoretšwe go bontšhwa lerato, go tšeelwa godimo le go lemogwa. Jesu le yena o be a ena le senyakwa se gomme tatagwe o ile a se kgotsofatša ka go bolela mantšu a borutho nakong ya kolobetšo ya gagwe.—Mateo 3:16, 17.

Jehofa o re file maatla a go kgothatša le go matlafatša ba bangwe ka mantšu a rena, e bile o letetše gore re diriše maatla a. (Diema 3:27) Ngwanabo rena Cauthon o ba kgothaditše gore ba “Itlwaetše go lebelela se sebotse go ba bangwe le go ba reta.” Go reta barapedi gotee le rena go tšwa pelong go tla ba thuša go tseba gore maiteko a bona ga se a lefeela.

“Go Ikgafa ka mo go Feletšego.” Mark Noumair, yo e lego mothuši wa Komiti ya go Ruta o ile a nea polelo ye. O ile a diriša mohlala wa moapostola Paulo go kgothatša barutwana gore ba se kgotsofalele feela go dira ka mo go lekanetšego. Go ena le moo, go swana le Paulo, ba tla hwetša lethabo la kgonthe ka go ikgafela ba bangwe ka mo go feletšego.—Bafilipi 2:17, 18.

Le ge a be a lebeletšane le diteko, Paulo ga se a ka a nyama. Ka ge a ile a katana go fihla lehung la gagwe, Paulo o ile a ikgafa go fihla mafelelong. O ile a rereša ge a be a bolela gore: “Ke feditše go kitima lebelo.” (2 Timotheo 4:6, 7) Ngwanabo rena Noumair o kgothaleditše barutwana go ekiša Paulo ka go thekga ka botlalo modiro wa Mmušo dikabelong tša bona.

Diphihlelo. Michael Burnett, yo e lego mohlahli wa sekolo sa Gilead, o ile a latela ka diphihlelo, mo barutwana ba ilego ba diragatša diphihlelo tšeo ba ilego ba di thabela tirelong ya tšhemo nakong ya ge ba le Patterson.

Nako le nako, barutwana ba be ba e ba le dipoelo tše dibotse ka ge ba be ba dula ba phafogetše dibaka tša go bolela le batho ka Beibele le go katanela go ba botša molaetša wo ka “leleme leo le kgomago pelo”—e lego go boledišana le batho ka maleme a bona. Ka mohlala, morutwana yo mongwe o ile a botšwa gore lefelo leo ba bego ba e ya go bolela le batho Beibele go lona go be go bolelwa Sepanishi kudu. Ka gona pele a eya go bolela ka Beibele, o ile a ithuta mantšu a se makae a Sepanishi a diriša lenaneo la JW Language. Ka lona letšatši leo o ile a gahlana le monna yo a bolelago leleme le. A diriša mantšu ao a ithutilego wona, o ile a thoma poledišano yeo e ilego ya feleletša ka thuto ya Beibele le monna yo le ditho tše nne tša lapa labo.

Dipoledišano. William Turner Jr., yo e lego mothuši Komiting ya Tirelo ya Sehlopha se Bušago o ile a boledišana le barutwana ka diphihlelo tšeo ba bilego le tšona pele ba e tla sekolong sa Gilead gotee le tlwaetšo yeo ba e hweditšego mo.

Barutwana ba ile ba bolela dintlha tše di kgothatšago tšeo ba ithutilego tšona sekolong. Ka mohlala, morutwana yo mongwe o boletše seo a ithutilego sona pegong yeo e lego go Luka kgaolo 10. Barutiwa ba Jesu ba 70 bao ba bego ba romilwe ke Jesu ba ile ba thaba ge ba bile le dipoelo tše dibotse ge ba be ba boledišana le batho ka Beibele. Le ge e le gore Jesu o ile a thaba, o ile a ba ruta gore lethabo la bona ga se la swanela go ithekga ka dipoelo tšeo ba di hwetšago bodireding eupša le ithekgile ka go tseba gore Jehofa o thabišwa ke maiteko a bona. Se se re gopotša gore lethabo la kgonthe ga se la ithekga ka maemo a rena eupša le ithekgile ka go tseba gore Jehofa o a re amogela.

Ngwanabo rena Turner o ile a diriša mantšu a lego go Bafilipi 1:6 go kgonthišetša barutwana gore Jehofa o šetše a ‘thomile modiro o mobotse’ ka bona le gore o tla tšwela pele a ena le bona.

“Dulang le Lebeletše Jehofa.” Samuel Herd, wa Sehlopha se Bušago o ile a nea polelo ya thwadi lenaneong. O boletše gore re ka se kgone go bona Jehofa. Ka gona go kgonega bjang gore re lebelele Jehofa?

Tsela e nnoši yeo re ka bonago Jehofa ke ka go hlahloba dilo tšeo a di bopilego, tšeo di re rutago ka yena. Go oketša moo, Jehofa o ‘edišitše mahlo a dipelo tša rena.’ (Baefeso 1:18) Ge re dutše re bala Beibele, ke moo re ithutago ka Jehofa. Gomme ge re dutše re ithuta ka Jehofa, re batamela kgauswiuswi le yena.

Re nyaka go šetša kudu Diebangedi, ka ge di re thuša go bona gabotse kamoo Jehofa a lego ka gona ka ge go bontšhwa mantšung le ditirong tša Morwa wa gagwe. Jesu o ile a bonagatša gabotse dika tša Jehofa moo a ilego a bolela gore: “Yo a bonego nna o bone le Tate.”—Johane 14:9.

Ngwanabo rena Herd o ile a kgothaletša batheetši gore ba se bone Jehofa feela ka go lebelela mohlala wa Jesu eupša ba swanetše go ekiša seo ba se bonago. Ka mohlala, ka ge Jesu a ile a katanela go fepa ba bangwe, le rena re nyaka go šoma ka thata go abela ba bangwe molaetša wa Beibele wo re o hweditšego.

Mafelelo a go lebelela Jehofa ke afe? Re ka holofela Jehofa go swana le Mopsalme yo a ngwadilego gore: “Ke beile Jehofa pele ga ka ka mehla. Ka gobane o ka letsogong la ka la le letona, nka se šišinywe.”—Psalme 16:8.

Phetho. Ka morago ga gore barutwana ba hwetše di-diploma tša bona, yo mongwe wa dialoga tše o ile a bala lengwalo le tšwago pelong la ditebogo go tšwa klaseng. Ke moka Ngwanabo rena Jackson o ile a phetha ka go botša dialoga tše gore ga se tša swanela go ikwa eka selo se sengwe le sengwe seo di tlago go se ruta e swanetše go ba se se makatšago goba se sefsa. Selo se segolo ke gore, dialoga tše di tla be di gopotša bana babo bona le dikgaetšedi ka dilo tšeo ba šetšego ba di tseba. Ngwanabo rena Jackson o ile a gatelela bohlokwa bja boikokobetšo. Go ena le gore ba nyake gore batho ba ba tšeele godimo goba go dula ba nyaka go retwa ka baka la tlwaetšo ya Gilead, dialoga di swanetše go dire gore batho ba bone molaetša wa Beibele gotee le dikgatišo tša rena tšeo di theilwego Beibeleng. Ka gona, go ena le gore ba nyamiše bao ba ka se tsogego ba hweditše sebaka sa go tla sekolong sa Gilead, barutwana ba ba tla kgothatša barapedi gotee le bona ka go ba thuša gore ba holwe ke ditokišetšo tša go ithuta Beibele tšeo ba ka kgonago go di fihlela. Ka moka bao ba bilego gona lenaneong ba tlogile ba kgothaditšwe le go ikemišetša go hlankela bana babo bona le dikgaetšedi.

^ par. 2 Dikopelo tše difsa di ile tša newa bao ba tlago go ba gona lenaneong le pejana bekeng yeo.

^ par. 32 Ga se dinaga ka moka tšeo di bontšhitšwego mmapeng.

^ par. 34 Ga se dialoga ka moka tšeo di lokeleditšwego.

Ithute ka mo go oketšegilego

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?