Eya go dikagare

Eya go menyu wa bobedi

Dihlatse tša Jehofa

Sepedi

Batho Bao ba Ratago go Iketla ba be ba Tlile Moletlong wa Armada

Batho Bao ba Ratago go Iketla ba be ba Tlile Moletlong wa Armada

Go tloga ka di 6 go ya go di 16 tša June 2013, baeng ba dimilione bao ba tšwago lefaseng ka bophara ba be ba kgobokane boemakepeng bja Rouen, bjoo bo lego ka leboa la Fora, go tla moletlong o mogologolo lefaseng wo o kgahlišago wa go sesiša dikepe tše ditelele, moletlo woo o bitšwa gore ke Armada.

Ka morago ga go sesa dikhilomithara tše 120 nokeng ya manyokenyoke ya Seine, go ya motseng o mobotse wa Normandy, dikepe tšeo tše dibotse kudu le tše ditelele kudu mo lefaseng di ile tša ema kgauswi le lebopo la botelele bja dikhilomithara tše šupa moo moletlo wo o bego o tla swarelwa gona. Ka matšatši a fetago a lesome, baeng ba ile ba ipshina ka go namela le go yo bogela tše dingwe tša dikepe tše ditelele tša go tuma tše 45 tšeo di bego di le moletlong woo.

Ke eng seo se dirilego gore batho ba bantši ba mengwaga ya go se swane ba tle moletlong wo wa Armada? Go ya ka morulaganyi le mohlami wa moletlo wo, Armada e ba nea sebaka sa “go bona Dikepe tše tše Dikgolo tše di kgahlišago.” Therešo ke gore go batho ba bantši, ba bagolo le ba banyenyane, dikepe tše tše dikgolo di dira gore ba dume go tšea maeto a matelele le go iketla.

Baeng ba diketekete bao ba bego ba tlile moletlong ba ile ba kwa ka mohuta o mongwe wa bophelo bja go iketla, bjoo bo tlišwago ke go tseba ditherešo tša Beibele. (Johane 8:31, 32) Ge ba dutše ba bogela lefelo le le lebotse la bogologolo la Rouen le diterata tša leemaema le tše di pitlaganego, baeng ba ba ile ba bona diteroli tša go bontšha dikgatišo tšeo di dirišwago ke Dihlatse tša Jehofa tša lefelong leo. Ge baeng goba basesiši ba batamela kgauswi le teroli yeo, ba ile ba kgopelwa go itšeela kgatišo e nngwe le e nngwe ya Beibele yeo e lego moo mahala. Batho ba bantši bao ba fetago ka tsela ba be ba thabela sehlogo seo se rego: “Lefase Leo le se Nago Kgethollo le tla ba Gona Neng?” seo se lego ka makasineng wa Morokami gomme ba laletšwa go tlo theetša polelo yeo e theilwego Beibeleng yeo e tlago go newa ka Sefora, Seisemane goba Sepanishi.

Batho ba tikologong yeo ba ile ba leboga maiteko a. Monna yo mongwe, yoo mathomong a ilego a tlabega ge a bona Dihlatse di eme kgauswi le teroli yeo ya go bontšha dikgatišo o itše: “Ke thabela go le bona mo diterateng. Ke hlompha batho bao ba sa tšhabego go emela tumelo ya bona, le ge ke sa dumele seo le se dumelago.” Bakgalabje ba babedi bao ba gahlanego le bafsa ba Dihlatse ba le modirong wo wa go nea bohlatse phatlalatša ba ile ba re go bona: “Ikgantšheng ka seo le lego sona!”

 

Ithute ka mo go oketšegilego

MOROKAMI

Lefase Leo le se Nago Kgethollo—Le tla ba Gona Neng?

Dikanegelo tša kgonthe di bontšha kamoo Beibele e šetšego e thuša batho go fenya kgethollo. E tla fedišetšwa sa ruri neng?