Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Lesolo la Lefase ka Bophara la go Tsebatša JW.ORG

Lesolo la Lefase ka Bophara la go Tsebatša JW.ORG

Ka August 2014, Dihlatse tša Jehofa di ile tša fa batho pampišana yeo e bolelago ka Wepesaete ya jw.org. Ka baka la se palo ya bao ba etelago Wepesaete e ile ya oketšega ka diperesente tše fetago tše 20 ka August, seo se bolelago gore batho ba dimilione tše 65 ba ile ba tsena Wepesaeteng ye. Mo e ka bago batho ba 10 000 lefaseng ka moka ba kgopetše dithuto tša mahala tša Beibele ka Wepesaete ye, e lego koketšego ya diperesente tše 67 go feta palo ya bao ba kgopetšego go rutwa Beibele ka July! Lesolo le le thušitše batho ba bantši.

Go thuša bao ba nyakago dikarabo tša dipotšišo tše bohlokwa ka bophelo

Hlatse e nngwe Canada e ile ya dumediša Madeline gomme ya mmontšha pampišana ya, Re ka Hwetša Kae Dikarabo tša Dipotšišo tša Bohlokwa Bophelong? Madeline o re ge a be a rapela a le mathuding a ntlo ya gagwe bošegong bjo bo fetilego o ile a kgopela Modimo go hwetša dikarabo tša dipotšišo tše bjalo. Nakong e fetilego o be a kgopetše dikereke tše mmalwa gore di mo rute Beibele, eupša ga go motho yo a boilego go yena. E se kgale o ile a thoma go ithuta Beibele le Dihlatse tša Jehofa.

Go thuša bao ba sa tsebego Beibele

Rowena yo a dulago Philippines, o ile a bolela le monna yo a bolelago se-China yo a bego a eme ka pele ga lebenkele la dijo. O ile a mo fa pampišana gomme a mmotša gore Dihlatse tša Jehofa di ikemišeditše go ruta batho Beibele mahala.

Monna yo o ile a re ke la mathomo a bona Beibele. Seo ba boletšego ka sona ka morago se ile sa mo šušumeletša go ya kopanong ya Dihlatse tša Jehofa. Ka morago, o ile a re o nyaka go ithuta mo go oketšegilego ka Beibele le gona o tla e taonelouta Wepesaeteng ya rena.

Go thuša difoa

Guillermo, e lego Hlatse ya sefoa ya Sepania, o ile a kopana le Jorge yo le yena e lego sefoa yo a bego a tsena sekolo le yena. Jorge o ile a re o sa tšwa go hlokofalelwa ke mmagwe gomme o be a tshwenyega le go ipotšiša dilo tše dintši. Guillermo o ile a mo fa pampišana yeo e bego e sepedišwa gomme a mo hlalosetša kamoo a ka hwetšago dikarabo tša dipotšišo tša gagwe Wepesaeteng ya jw.org ka polelo ya diatla. Le gona Guillermo o ile a laletša Jorge gore a tle Holong ya Mmušo (lefelo la Dihlatse la borapedi). O ile a tla gomme go tloga ka nako yeo Jorge ga se aka a kgaotša go tla le ge a be a dula bokgole bja dikhilomithara tše 60.

Go thuša bao ba dulago mafelong a lego kgole le toropo

Dihlatse tše nne di ile tša diriša tšhelete ya tšona go tšea leeto la diiri tše tshela ka sekepe go tloga Greenland go fihla lefelong le nago le badudi ba 280. Ge ba fihla moo, ba ile ba ruta batho Beibele, ba fa batho dipampišana gomme ba ba bontšha bidio go jw.org ka Segreenland. Le gona ba ile ba thoma go ithuta Beibele le banyalani ba bangwe. Ga bjale ba ithuta le bona ba diriša founo gabedi mo bekeng.

Dihlatse tša Nicaragua le tšona di ile tša dira se swanago. Di ile tša rulaganya go fa batho bao ba bolelago Semayangna dipampišana sethokgweng sa Caribbean. Ka morago ga go sepela diiri tše 20 ka pese ya leratha ditseleng tše tletšego mekoti ba sa eme, ba ile ba sepela ka maoto ka diiri tše 11, ka dinako tše dingwe ba sepela ka gare ga maraga. Ge ba fihla, ba ile ba fa batho dipampišana gomme ba ba bontšha dibidio ka leleme la Semayangna, gomme ba ba bantši ba lefelong leo ba ile ba ba thabela.

Ge Estela a be a le motsaneng o lego sethokgweng sa Amazon seo se lego Brazil, o ile a fa monna yo a bego a iphetela pampišana. Monna yoo o ile a tšea pampišana yeo gomme a e tsenya ka potleng eka ga a na taba le yona. Ge a eya gae, entšene ya sekepe e ile ya senyega gomme a kgakgelwa ka nokeng. Ge a be a letetše batho gore ba tle ba mo thuše, o ile a bala pampišana yeo. O ile a tsena Wepesaeteng ya jw.org ka founo ya gagwe, gomme a bala dihlogo tše mmalwa le go taonelouta dibidio. Matšatši a sego kae ka morago, monna yo o ile a gahlana le monna wa Estela a mo kgopela gore a mo lebogele go Estela ka pampišana yeo a mo filego yona. O itše: “Dihlogo tšeo ke di badilego ge ke be ke sa letetše thušo, di ile tša dira gore ke se fele pelo go fihlela ba nthuša. Bana ba ka ba rata dibidio tša Kabelo. Ke sa tlo tsena Wepesaeteng ya jw.org.”

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?