Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Nea Bohlatse Metsaneng Yeo e Lego Kgauswi le Noka ya Xingu

Go Nea Bohlatse Metsaneng Yeo e Lego Kgauswi le Noka ya Xingu

Mathomong a July 2013, sehlopha sa Dihlatse tša Jehofa tše 28 se ile sa tloga toropong ya São Félix do Xingu kua Brazil go ya go Maindia a Cayapo le Yuruna. Sehlopha se se be se sesa ka seketswana sa botelele bja dimithara tše 15, gomme se ile sa tšea leeto la go sesa se lebile moo Noka ya Xingu e elago e etšwa gona, yeo e elelago dikhilomithara tše 2 092 go ya ka leboa go fihla Nokeng ya Amazon.

Sehlopha se se tšere leeto le ka morero wa gore se yo botša batho bao ba dulago metsaneng e lego kgauswi le noka ka Mmušo wa Modimo. Ka letšatši la boraro, se ile sa fihla motsaneng wa Kokraimoro. Baeng ba ba ile ba amogelwa ka go myemyela le ka matsogo a mabedi. Mosadi yo mongwe yo ba gahlanego le yena o be a ba bitša ka matsogo gore ba lebe go yena kapejana. Motho wa moo yoo a bego a ba bontšha lefelo o ile a ba hlalosetša seo mosadi yo a bego a ba botša sona gore: “Tsela ye mosadi yo a le bitšago ka yona e bolela gore: ‘E tlang ka moka ga lena. Re nyaka go le tseba ka moka!’ ”

Dihlatse tše di ile tša bolela le batho ka moka—di boletše le ba bangwe ka Sepotokisi e bile di bolela le ba bangwe ka go fo šupašupa. Diswantšho tša mebala ya go taga tša dikgatišo tše di theilwego Beibeleng tšeo Dihlatse tše di bego di tlile le tšona di thušitše kudu e bile batho ba bantši ba metsaneng yeo ba ile ba amogela dikgatišo, kudukudu poroutšha ya Theetša Modimo.

Gerson, e lego mmulamadibogo yoo a kgethegilego kua São Félix do Xingu, o gopola kamoo modudi yo mongwe wa metsaneng yeo a amogetšego Puku ya ka ya Ditaba tša Beibele ka gona: “O ile a e lebelela gomme a e ngaparela ka matsogo a mabedi; o be a sa nyake go e bea fase le ka motsotswana.”

Dihlatse tše tša Jehofa di tlogeletše badudi ba metsaneng yeo ya kgauswi le noka dipuku, dimakasine le diporoutšha tše e ka bago tše 500. Motsaneng wa Kawatire, badudi ba ile ba theetša ka kgahlego e kgolo dikholofetšo tša Beibele tša lefase la paradeise. Tonjaikwa yo a bego a theeditše wa motsaneng wa Maindia a Cayapo yo a ratago go amogela baeng o itše: “Batho Paradeiseng ba tlo phela go swana le rena.”

Batho ba bantši toropong ya São Félix do Xingu ba be ba tseba ka leeto le. Simone, yo le yena a bego a le leetong leo o boletše gore batho ba bangwe ba tikologong ya gabo ba be ba na le dipelaelo tša ge e ba yena le batho bao a bego a sepela le bona ba be ba ka dumelelwa go tsena metsaneng yeo. Lega go le bjalo, ga se gwa ba le bothata. Simone o re: “Re ile ra amogelwa ka diatla tše pedi e bile re boletše le batho ka moka.”

Ithute ka mo go oketšegilego

Ba Ile ba Ikgafa go tšwa Pelong—Kua Brazil

Bala ka diphihlelo tše di kgothatšago tša bao ba ilego ba hudugela lefelong le lengwe e le gore ba hlankele Modimo ka botlalo.