Eya go dikagare

Eya go menyu wa bobedi

Dihlatse tša Jehofa

Sepedi

Dihlatse tša Jehofa di Boledišana le Batho ka Beibele Kua Paris

Dihlatse tša Jehofa di Boledišana le Batho ka Beibele Kua Paris

Ka di-30 tša November go fihla ka di-12 tša December 2015, go be go na le seboka sa mokgatlo wa Ditšhaba tše Kopanego sa mabapi le go fetoga ga boemo bja leratadima (United Nations Conference on Climate Change [COP21]). Go be go kopane batho ba ba tšwago dinageng tše 195 kua Paris, France, gore ba boledišane ka go fetoga ga boemo bja leratadima. Sebokeng seo, go be go na le batho ba e ka bago ba 38 000, go akaretša bahlankedi ba mmušo, borasaense, ditsebi tša tikologo le borakgwebo. Batho ba bangwe ba diketekete ba ile ba ya lefelong la batho bohle la boitsebišo leo le bego le le kgauswi le moo, go ithuta ka mo go oketšegilego mabapi le go fetoga ga boemo bja leratadima.

Le ge Dihlatse tša Jehofa di sa ya sebokeng seo eupša le tšona di na le taba le tikologo. Re bona seo ka ge bontši bja tšona bo ile bja tšea karolo lesolong le le kgethegilego la go boledišana le batho kua Paris ka kholofelo yeo e theilwego Beibeleng ya go tlo phela lefaseng leo le hlwekilego.

Ge Hlatse e nngwe e be e le ka senamelweng sa batho bohle, e ile ya boledišana le monna yo a tšwago Peru yo a bego a apere diaparo tša Seperu. Monna yoo o ile a hlalosa gore, le ge a phetše gabotse mmeleng e bile a dula thabeng e botse eupša o tshwenyegile ka bokamoso bja lefase la rena. O be a thabišitšwe ke gore Hlatse yeo e be e mmotša ka kholofetšo ya bokamoso bjo bo kgahlišago, ka gona o ile a myemyela gomme a tšea karata gore a tsene wepesaeteng ya rena ya www.jw.org.

Ge Dihlatse tše pedi di be di le ka tereneng, di ile tša boledišana le rasaense wa tikologo wa Amerika. O ile a makatšwa ke go kwa gore Dihlatse tša Jehofa di ile tša hwetša setefikeiti sa Four Green Globes go tšwa khamphaning ya Green Building Initiative ka makga a mabedi, ka ge di ile tša hlama le go aga meago e mebedi e mefsa ya diofisi tša lekala ya Dihlatse tša Jehofa kua Wallkill, New York, yeo e sa senyego tikologo. Le yena o ile a tšea karata ya JW.ORG a thabile.

Batho ba bantši ba ile ba tshepiša gore ba tla tsena wepesaeteng ya rena ka ge ba be ba kgahlilwe ke gore Dihlatse tša Jehofa di na le taba le tikologo. Ge motho yo mongwe yo a tšwago Canada a be a ekwa gore Dihlatse tša Jehofa di ile tša šireletša lefelo leo go dulago dinonyana tšeo di nyakilego go swana le dithaga ntlongkgolo e mpsha ya Dihlatse tša Jehofa kua Warwick, New York, o itše: “Pele ke e ba mošireletši wa tikologo, ke be ke ithuta ka dinonyana. Ke be ke sa tsebe gore Dihlatse tša Jehofa di rata diphedi tša nageng kudu. Ke tlo bala dikgatišo tša lena gomme ka tsena le wepesaeteng ya lena gore ke ithute ka mo go oketšegilego ka lena!”