Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Polasa Yeo e Fepago ba Dimilione

Polasa Yeo e Fepago ba Dimilione

Mengwaga e masomenne e fetilego, ka February 2, 1973, go ile gwa hlongwa metšhene ya go gatiša kua Wallkill, New York, U.S.A., e le gore go gatišwe dimakasine tša Morokami le Phafoga!

Nywaga e lesome pejana, Dihlatse tša Jehofa di ile tša reka polasa moo gore di kgone go fepa batho bao ba šomago ntlongkgolo ya tšona kua Brooklyn, New York. Eupša ga bjale, polasa yeo e tla dirišetšwa go tšweletša mohuta o mongwe wa dijo, e lego dijo tša moya.—Mateo 24:45-47.

Watchtower Farms, Wallkill, New York, mathomong a bo-1970

Philip Wilcox, yoo ka nako yeo e bego e le molebeledi wa lefelo la bogatišetšo, o gopola seo se diregilego letšatšing la mathomo la go dirišwa ga metšhene ya go gatiša kua Wallkill, o re: “Go ile gwa re tšea mo e ka bago kgwedi gore re beakanye metšhene ya lebelo le legolo ya go gatiša yeo e bitšwago rotary. Bjale metšhene yeo e be e loketše go ka šoma gomme re ile ra thoma go leka go e šomiša. Ka ponyo ya leihlo, re be re gatiša dimakasine tše dikete tše sego kae. Re ile ra di romela bogatišetšong bja rena bja Brooklyn, moo di ilego tša romelwa e le dikgopelo tše di yago diphuthegong. Re be re ikemišeditše gore re se senye le ge e le makasine o tee.”

Dihlatse tša Jehofa di ile tša aga moago wo o mofsa gore di tlaleletše mošomo wa tšona o mogolo wa go gatiša, woo ga bjale o lego Brooklyn. Mathomong a bo-1970, go be go nyakega dikgatišo tše dintši tšeo di theilwego Beibeleng go feta tšeo di bego di tšweletšwa mosegare ka moka, ka gona bana babo rena bao ba bego ba šoma bogatišetšong bja Brooklyn ba ile ba thoma go šoma bošego e le gore ba ka kgona go fihlelela palo yeo e nyakegago ya dikgatišo.

Ka godimo: Ka January 1973 go hlongwa motšhene wa mathomo wa M.A.N. kua Wallkill. Ka tlase: Go tsenywa pampiri ka gare ga motšhene wa M.A.N.

Ge moago wa mathomo wa go gatiša o be o fetšwa go agwa kua Wallkill, o ile wa kgona go tsenya metšhene e mene ya go gatiša, lefelo la go romela dipuku le Holo ya Mmušo. Lega go le bjalo, pele ga ge moago wo o ka šoma ka botlalo, go ile gwa thongwa moago o mongwe wa bobedi, e lego moago o mogolo woo o kgomagantšwego le wa mathomo. Palo e nyakegago ya dikgatišo tše di theilwego Beibeleng e oketšegile kudu moo go ilego gwa nyakega metšhene e mengwe e tshelelago ya go gatiša gore e tsenywe moagong wa bobedi le pele ga ge moago woo o ka fetšwa go agwa.

Go theoša le nywaga, thekinolotši ya go gatiša e tšwetše pele gomme palo e nyakegago ya dikgatišo tša rena tše di theilwego Beibeleng e oketšegile kudu. E le gore re sepedišane le diphetogo tšeo, re ile ra kaonefatša le go katološa bogatišetšo bja Wallkill ka makga a mmalwa. Metšhene ya go gatiša ka lebelo e ile ya tšea legato la metšhene ya kgale ya go gatiša ya mengwaga ya bo-1980.

Ka 2004, bogatišetšo bja Brooklyn bo ile bja tswalelwa, gomme ka lekga la pele dipuku di ile tša thoma go tšweletšwa kua Wallkill. Ka 2010, go gatišwa ga dimakasine go ile gwa hudušetšwa leboa ofising ya lekala ya Dihlatse tša Jehofa kua Canada. Motšhene wo o mofsa o ka kgona go gatiša dimakasine tše 200 000 ka iri.

Ka godimo: Ka 2005 ge lokišeletšwa matlakala a dipuku gore a tle a tsenywe motšheneng wa go dira dipuku kua Wallkill. Ka tlase: Watchtower Farms, Wallkill, New York, ka 2013

Lehono, bogatišetšo bja Wallkill bo tletše ka metšhene, e bile go šomišwa thekinolotši ya morago bjale moo go šomago banna le basadi bao ba ithaopago ba 281. Ngwagola, ba ile ba tšweletša dipuku le Dibeibele tše fetago dimilione tše 17. Go oketša go mafelo a Amerika Leboa a go gatiša, e lego Wallkill, Canada le Mexico, Dihlatse tša Jehofa di na le mafelo a mangwe a go gatiša a 12, ao a lego Afrika, Asia, Australia, Yuropa le Amerika Borwa—seo se thuša go kgotsofatša dinyakwa tša moya tša batho ba dimilione.—Mateo 5:3.

 

Ithute ka mo go oketšegilego

Bethele ke Eng?

Bethele ke lefelo la moswananoši leo go lona go dirwago modiro wa bohlokwa kudu. Ithute ka bao ba šomago moo.