Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Leswao la Watchtower—Seka sa Kgale se Bohlokwa sa Brooklyn

Leswao la Watchtower—Seka sa Kgale se Bohlokwa sa Brooklyn

Ka mengwaga e fetago e 40, mengwalo e mehwibidu ya botelele bja dimithara tše 4.6, yeo e lego godimo ga ntlokgolo ya Dihlatse tša Jehofa ya lefase ka bophara e be e dutše e bonega bošego le mosegare e le seka seo se tlwaelegilego go badudi ba New York City, bao bontši bja bona ba ithekgilego ka lona gore ba bone nako le thempheretšha.

Eboni, yo a kgonago go bona leswao le go tšwa foleteng ya gagwe kua Brooklyn, o itše: “Ke mo gobotse go lebelela nako le thempheretšha lefasetereng pele ga ge ke eya mošomong. Le dira gore ke boloke nako e bile le nthuša gore ke apare go ya ka maemo a leratadima.

Na leswao le leo le bontšhago nako le thempheretšha le tla ba gona mengwaga e mengwe e 40? Ga go bonagale go le bjalo. Ka ge Dihlatse tša Jehofa di rulaganya go hudušetša ntlokgolo ya tšona ka leboa la New York, bao e tlago go ba beng ba moago wo ke bona ba tlago go dira phetho yeo.

Mathomong go be go na le leswao leo le ilego la hlongwa ke mong wa pele wa moago mengwageng e 70 e fetilego. Dihlatse tša Jehofa di fetošitše sebopego sa leswao le ka morago ga gore di reke moago wo ka 1969.

Leswao le le nyaka go dula le lokišwa. Go theoša le nywaga, masogana a fapafapanego a ile a lokiša leswao le, e ka ba bošego goba mosegare.

Yo mongwe yo a bego a šoma bošego o gopola ka gore: “Mantšiboeng a mangwe re ile ra founelwa ke molaodi wa seteišene sa thelebišene sa ditaba. O be a re botša gore sešupanako sa rena se be se lahlile nako ka metsotswana e 15. O be a nyaka gore re se lokiše e le gore a tle a bolele ka sona lenaneong la gagwe mantšiboeng ao. Go se go ye kae, molokiši yo a bego a lapile kudu o šomile ka thata gore a se lokiše.

Leswao le le ile la fetošwa ka makga a mmalwa gore le šome gabotse le go dula le nepagetše. Magareng a bo-1980, go ile gwa akaretšwa karolo e bontšhago di-Celsius go oketša go yeo e bontšhago nako le dithempheretšha.

Ka 2009, ditleloupu tšeo di šomišago mohlagase o montši di ile tša tšeelwa legato ke tšeo di o seketšago, e lego tšeo di swarelelago kudu e bile di seketša Diranta tše fetago tše 40 000 ka ngwaga ge di lokišwa. Lehono leswao le le šomiša karolo e nyenyane ya mohlagase go feta woo e bego e o šomiša peleng.