Eya go dikagare

Eya go menyu wa bobedi

Dihlatse tša Jehofa

Sepedi

Go Arogana le Hotele ya Bossert

Go Arogana le Hotele ya Bossert

Ka November 2012, Dihlatse tša Jehofa di ile tša rekiša Hotele ya Bossert. Di ile tša nea mong wa hotele yeo yo mofsa dinotlelo, ke moka go swana le baeng bao ba tlwaelegilego hoteleng yeo, e ile ya ba nako ya gore Dihlatse di arogane le yona. Tšhelete yeo di e rekišitšego ka yona e tla dirišetšwa go thekga modiro wa lefase ka bophara wa go ruta ka Beibele wa Dihlatse tša Jehofa.

Dihlatse di rekišitše moago wa mabato a 14 wo o agilwego ka mokgwa wa Setaliana ka gobane ntlokgolo ya tšona e tla hudušwa Brooklyn, New York gomme ya išwa meagong e mefsa kua Warwick, New York. Go letetšwe gore go hudušwa moo go tšee nywaga e mmalwa.

Histori ya Nywaga e Lekgolo

Louis Bossert, e lego modudi wa New York yo a rekišago dikota, o ile a aga Hotele ya Bossert ka 1909. E be e hlametšwe gore e fo ba “lefelo la bodulo,” moo go bego go tla dula baeng le badudi ba sa ruri. Ka ge e ile ya tlala ka pela, o ile a e katološa ka 1914, moo meago e ilego ya godišwa gabedi. Ka 1916 go ile gwa oketšwa ka moago wa ka godimo wa go jela wo o bitšwago Marine Roof.

Ka bo-1980, Dihlatse tša Jehofa di ile tša reka moago woo gomme tša o mpshafatša gore go kgone go dula bašomi ba ntlongkgolo. Bašomi ba ile ba fetoša diphapoši tša Hotele yeo tša go binela ba di dira diphapoši tša go jela gomme moago wa ka godimo wa go jela ba o dira phapoši ya go iketla ya badudi ba moo le baeng ba bona.

Ga e sa le go tloga ka 2010, moagong woo go ile gwa dula Dihlatse tša Jehofa tšeo di bego di tlo bona meago ya ntlokgolo di etšwa dinageng ka moka.

Mong wa Hotele yeo yo mofsa o ikemišeditše go mpshafatša moago woo gomme a o šomiše gape e le hotele. Go fetošwa ga meago ya Bossert go tloga go beng setudio se senyenyane le phapoši e tee ya go robalela gore e be hotele ya mabaibai go ile gwa ba ba bonolo ka thekgo ya baagi bao ba nago le phihlelo.

Go Tsošološa Moago o Mobotse Kudu

Pele Dihlatse tša Jehofa di hudugela Bossert, moago wo o be o sa hlokomelwe ngwaga ka moka. Mmala wa wona wa ka ntle o mošweu o be o na le ditšhila e bile mokgabišo woo o bego o le marulelong o be o senyegile gomme o se sa bogega. Mafasetere a be a senyegile e bile a thubegile. Dinonyana di be di ikhweleditše madulo marulelong a wona. Ka gona go ile gwa thongwa mošomo o mogolo wa go mpshafatša. Dihlatse tša Jehofa tšeo di tšwago dikarolong ka moka tša United States di ile tša gafela nako le bokgoni bja tšona mošomong wo, woo o ilego wa fetšwa ka 1991.

Nakong ya ge di mpshafatša, Dihlatse di ile tša hlwekiša le go lokiša mokgabišo wa maswika wo o bego o dikologile moago wo. Di ile tša tloša mokgabišo wo o bego o le marulelong tša bea o mofsa wo o nyakilego o swana le ona. Go ile gwa tsenywa mafasetere a mafsa a lepolanka.

Dihlatse di ile tša ba tša mpshafatša moago woo ka gare, ge e le bogorogelo bja baeng bjona bo ile bja kgabišwa kudu. Gore di lokiše maboto a moago woo ao a dirilwego ka mmabole, go ile gwa rekwa leswika la go tšwa Italy. Bašomi ba ile ba ba ba lokiša siling yeo e bego e sentšwe ke meetse.

Go ile gwa ba thata go lokiša dipilara tša tšhipi tšeo di bego di le bogorogelong bja baeng. Ge e le gabotse di be di poleisteretšwe ka scagliola, e lego mokgwa wa kua Italy wo o nyakilego o swana le mmabole. Lega go le bjalo, batho ba bantši bao ba ilego ba reka lefelo le ba ile ba penta dipilara tše ka makga a mantši. Ga go le o tee wa baithaopi yoo a bego a tseba mokgwa wa go diriša scagliola. Yunibesithi ya kgauswi e ile ya re nea puku yeo e bego e hlalosa mekgwa ya go hlama selo se seo se swanago le mmabole. Ka baka la thušo yeo, baithaopi ba ile ba fetša dibeke ba mpshafatša dipilara tšeo gore di swane ganyenyane le tša mathomong.

Ge moago o fetšwa go mpshafatšwa ka 1991, o be o le o mobotse e bile o ka dirišwa. Ka ge batho ba bone maiteko ao a rena, moago wa Bossert o ile wa newa Sefoka sa Lucy G. Moses Preservation ka baka la ge o ile wa tsošološwa ka bothakga.