Eya go dikagare

Eya go menyu wa bobedi

Dihlatse tša Jehofa

Sepedi

Re go Laletša Gore o Etele Meago ya Bethele ya United States

Re go Laletša Gore o Etele Meago ya Bethele ya United States

Ka morago ga go etela meago ya Dihlatse tša Jehofa kua United States banyalani ba bangwe bao ba tšwago sehlakahlakeng sa Vanuatu ba ile ba re: “Re sa gopola gabotse ketelo ya rena e kgahlišago ya go etela Bethele yeo re ka se tsogego re e lebetše.” Ngwaga le ngwaga batho bao ba fetago dikete tše 70 ba ikwa ka tsela e swanago.

Na o kile wa etela meago ya Bethele ya United States? Ge e ba o se wa dira bjalo, gona o laletšwa gore o dire bjalo.

Ke eng seo o tlago go se bona meagong ye e megolo e meraro?

Ntlokgolo ya Lefase ka Bophara, Brooklyn, New York. Batho bao ba bontšhago lefelo ba tla go hlahla gomme o tla ithuta kamoo go rulagantšwego le go thekga modiro wa lefase ka bophara wa go bolela ditaba tše dibotse. Le gona o ka bona mafelo a mabedi a dipontšho. Pontšho e nngwe e na le sehlogo se rego: “A People for Jehovah’s Name,” e hlalosa histori ya batho ba Jehofa go thoma lekgolong la pele la ngwaga go fihla mehleng yeno. Mola e nngwe e na le sehlogo se rego: “The Bible and the Divine Name,” e bontšha diphetolelo tše dintši tša Beibele tšeo di nago le leina la moswananoši la Modimo.

Thuto ya Pušo ya Modimo, Patterson, New York. Ithute ka dikolo tšeo di lego moo tše bjalo ka Sekolo sa Beibele sa Watchtower sa Gilead le Sekolo sa Ditho tša Komiti ya Lekala le Basadi ba Bona. Le gona o tla bona dipontšho le dibidio tšeo di bolelago ka modiro wo o dirwago diofising tšeo gotee le Lefapha la Bokgabo, la Tirelo ya Dibidio le di-CD, la Molao le la Tirelo.

Go Phrintha le go Romelwa ga Dipuku le Dipukwana, Wallkill, New York. Batho bao ba bontšhago lefelo ba tla go bontšha kamoo Dibeibele le dipuku le dipukwana tšeo di theilwego Beibeleng di phrinthwago, di dirwago le go romelwa diphuthegong tša United States, Caribbean le dikarolong tše dingwe tša lefase.

Go bona meago ye go tšea nako e kaaka’ng?

Go bona meago ya Brooklyn go tšea mo e ka bago iri; Patterson, e tšea mo e ka bago diiri tše pedi gomme Wallkill yona e tšea mo e ka bago iri le seripa.

Ke bomang bao ba bontšhago batho meago ye?

Ke bao ba šomago mafapheng a fapafapanego a Bethele. Ba lebelela se e le karolo ya bona ya go thekga modiro wa rena wa lefase ka bophara wa go ruta ka Beibele. Go thoma ka May 2014, go be go na le batho ba fetago ba 5 000 bao ba šomago meagong ye e megolo e meraro gomme ba fetago 3 600 ba tlwaeditšwe go bontšha batho lefelo. Go bontšha batho lefelo go dirwa ka maleme a ka bago a 40.

Motho o swanetše go patela bokae gore a bone lefelo?

Ke mahala.

Na o swanetše go ba Hlatse ya Jehofa gore o etele mafelo a?

Aowa. Ba bantši bao ba etelago moo ga se Dihlatse. Dihlatse le bao e sego Dihlatse ba tla bona kamoo go thekgwago modiro wa lefase ka bophara wa Dihlatse tša Jehofa.

Mosadi yo mongwe wa Momoseleme yo a tšwago India o ile a etela Patterson. Ka morago ga gore a bone lefelo le o itše: “Nka thabela go ba karolo ya modiro wo. Ke leboga kudu gore le ile la ntlhompha kudu gore ke bone lefelo le.”

Na bana ba a dumelelwa gore ba bone mafelo a?

Ee ba a dumelelwa! Go etela mafelo a go ka kgoma bana kudu. John, moeng yo a tšwago United States, o ngwadile gore: “Bana bao ba bego ba le sehlopheng sa rena ga ba kgaotše go bolela ka ketelo ya bona ya go ya Bethele ge re be re le moo. Pele ga ge ba etela moo, ba be ba sa tsebe gore go hlankela Bethele go bjang, eupša go hlankela moo bjale e šetše e le pakane ya bona.”

Na go a kgonega gore motho a etele meago ye ya Dihlatse tša Jehofa yeo e lego dinageng tše dingwe?

Ee. Go a kgonega go etela meago ye. E le gore o hwetše lefelo la moo o ka etelago gona, bona letlakala la Boitsebišo la Go Bona Diofisi le Meago leo le lego Wepesaeteng ya rena. Re go laletša ka borutho gore o tle o bone le go etela e nngwe ya diofisi tša makala tša Dihlatse tša Jehofa.