Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Kopanywa ga Diofisi tša Makala tša Dihlatse tša Jehofa

Go Kopanywa ga Diofisi tša Makala tša Dihlatse tša Jehofa

Go tloga ka September 2012, diofisi tša makala tše fetago 20 tša Dihlatse tša Jehofa di ile tša tswalelwa gomme modiro wa makala ao ga bjale o hlokomelwa ke makala a magolo.

Go oketša go seo, go na le makala a mafsa kua Serbia le Macedonia. Go na le mabaka a mabedi ao a dirilego gore go be le diphetogo tše.

1. Thekinolotši e nolofaditše mošomo

Morago bjale, go kaonefatšwa ga thekinolotši ya go boledišana le ba bangwe le go phrintha go dirile gore go se nyakege batho ba bantši makaleng a mangwe. Ka ge go šoma batho ba sego kae makaleng a magolo, go ile gwa ba le madulo bakeng sa bao ba bego ba šoma makaleng a manyenyane dinageng tše dingwe.

Ga bjale makaleng ao a kopantšwego go na le Dihlatse tše di nago le phihlelo tšeo di hlokomelago mošomo wa go ruta ka Beibele. Ka mohlala, mošomo wa go botša batho ka Beibele kua Costa Rica, El Salvador, Guatemala, Honduras, Nicaragua le Panama o hlokometšwe ke lekala la Mexico. Ka baka leo, diofisi tša makala dinageng tšeo tše tshela di tswaletšwe.

Dihlatse tše 40 go tšwa makaleng ao a tshela di ile tša romelwa lekaleng la Mexico. Tše ka bago tše 95 di ile tša šala dinageng tša gabo tšona gore di šome ka nako e tletšego e le baboledi ba ditaba tše dibotse.

Dihlatse tše dingwe dinageng tšona tšeo tša Bogareng bja Amerika di ile tša thoma go šoma diofising tša bofetoledi di hlokometšwe ke lekala la Mexico. Ka mohlala, kua Panama mo e ka bago Dihlatse tše 20 di fetolela dikgatišo tša Morokami ka maleme a lefelong leo. Lefelong leo peleng e bego e le ofisi ya lekala ya Guatemala, Dihlatse tše dingwe tše 16 ga bjale di fetolela dikgatišo ka maleme a mane a moo. Ka gona, kua Bogareng bja Amerika, go kopanywa ga makala go fokoditše ditho tša ofisi ya lekala go tloga go tše 300 gore e be tše 75.

2. Bašomi ba ba na le nako e ntši ya go bolela le batho ka Beibele

Ka baka la go kopanywa ga makala, baboledi bao ba nago le phihlelo bao ba bego ba šoma makaleng a manyenyane ga bjale ba na le nako e ntši ya go bolela le batho ka Beibele.

Hlatse e nngwe kua Afrika, yeo e ilego ya abelwa mošomo wa go bolela le batho ka Beibele, e ngwadile gore: “Go fetoša tsela yeo ke bego ke phela ka yona gore e dumelelane le maemo a mafsa go ile gwa nthatafalela dikgweding tša mmalwa tša mathomo. Eupša, go bolela le batho ka Beibele letšatši le letšatši go a nthabiša e bile go ntlišetša ditšhegofatšo tšeo ke bego ke sa di nagane. Ga bjale, ke ithuta Beibele le batho ba 20, gomme ba bangwe ba bona ba tla dibokeng tša phuthego.