Eya go dikagare

Eya go menyu wa bobedi

Dihlatse tša Jehofa

Sepedi

Dihlatse tša Jehofa di Dumela Eng Tabeng ya Dipoloko?

Dihlatse tša Jehofa di Dumela Eng Tabeng ya Dipoloko?

Dipono tša rena le dilo ka moka tšeo re di dirago ge re boloka motho di theilwe go seo Beibele e se rutago, go akaretša le tše di latelago:

  • Ke tlhago gore re kwa bohloko kudu ge motho yo re mo ratago a hlokofetše. Barutiwa ba Jesu ba ile ba lla ge ba be ba hlokofaletšwe ke batho bao ba ba ratago. (Johane 11:33-35, 38; Ditiro 8:2; 9:39) Ka gona ga re diriše nako ya poloko go dira mokete. (Mmoledi 3:1, 4; 7:1-4) Go e na le moo, re e bona e le nako ya go bontšha kwelobohloko go bao ba llago.​—Baroma 12:15.

  • Bahu ga ba tsebe selo. Go sa šetšwe gore re ba morafo ofe goba gore setšo sa rena ke sefe, re phema meetlo yeo e theilwego tumelong yeo e sego ya mangwalo ya gore bahu ba a phela le gore ba ka thuša batho bao ba phelago. (Mmoledi 9:5, 6, 10) Meetlo yeo re e phemago e akaretša meletelo, meletlo e megolo yeo e dirwago ka morago ga poloko le meletlo ya go gopola letšatši la poloko, go phasa badimo, go bolela le batho bao ba hwilego le go ba kgopela dilo tše itšego gotee le meetlo ya bahlolo le bahlologadi. Re phema meetlo ye ka moka, ka gobane re kwa taelo ya Beibele yeo e rego: “Le itlhaole le lese go kgwatha selo se se sa hlwekago.”—2 Bakorinthe 6:17.

  • Go na le kholofelo ka bahu. Beibele e re ruta gore bahu ba tlo tsoga le gore go tlo tla nako yeo lehu le ka se sa bago gona. (Ditiro 24:15; Kutollo 21:4) Go etša ge kholofelo ye e ile ya thuša Bakriste ba lekgolong la pele la nywaga, le rena e re thuša go phema mekgwa e feteletšego ya go lla ge re hlokofaletšwe.​—1 Bathesalonika 4:13.

  • Beibele e re eletša gore re be le boipoetšo. (Diema 11:2) Ga re dumele gore poloko e swanetše go ba sebaka sa “bomponeng” e le ge o bontšha batho maemo a gago setšhabeng goba gore o eme bjang ka tša ditšhelete. (1 Johane 2:16) Ga re dire dipoloko tša go bitša tšhelete e ntši kudu tšeo morero wa tšona e lego go tloša batho bodutu goba ra reka mapokisi a go tura le diaparo tša go tura gore re bonwe ke batho.

  • Ga re leke go gapeletša ba bangwe ditumelo tša rena tša mabapi le dipoloko. Tabeng ye, re latela molao wa motheo wo o rego: “Yo mongwe le yo mongwe wa rena o tla ikarabela go Modimo.” (Baroma 14:12) Lega go le bjalo, ge e ba re hweditše sebaka, re leka go hlalosa ditumelo tša rena “ka moya o boleta le ka tlhompho e tseneletšego.”—1 Petro 3:15.

Poloko ya Dihlatse tša Jehofa e bjang?

Lefelo: Ge e ba ba gabo motho yo a hlokofetšego ba kgetha go dira poloko, e ka swarelwa le ge e le kae moo ba nyakago. E ka swarelwa Holong ya Mmušo, mmušareng, ka gae, moo go fišetšwago bahu goba mabitleng.

Polelo ya Poloko: Go newa polelo ya go homotša bao ba hlokofaletšwego yeo e hlalosago seo Beibele e se bolelago ka lehu le kholofelo yeo re nago le yona ya gore bahu ba tlo tsoga. (Johane 11:25; Baroma 5:12; 2 Petro 3:13) Motho yo a neago polelo a ka bolela ka dika tše dibotse tša motho yo a hlokofetšego, mohlomongwe a gatelela dithuto tšeo re ka ithutago tšona mohlaleng o mobotse wa motho yoo.—2 Samuele 1:17-27.

Go ka opelwa kopelo yeo e theilwego Beibeleng. (Bakolose 3:16) Polelo ya poloko e phethwa ka thapelo yeo e homotšago.​—Bafilipi 4:6, 7.

Tšhelete goba dikoleke: Ga re lefiše ditho tša bodumedi bja rena bakeng sa ditirelo tša bodumedi, go akaretša dipoloko, le gona dibokeng tša rena ga go tšewe dikoleke.​—Mateo 10:8.

Bao ba Bago Gona: Batho bao e sego Dihlatse tša Jehofa ba ka tla polokong yeo e swaretšwego Holong ya Mmušo. Go swana le diboka tša rena tše dingwe, motho le ge e le mang a ka tla ge re na le poloko.

Na Dihlatse tša Jehofa di ya mahung a batho ba madumedi a mangwe?

Tabeng ye, Hlatse e nngwe le e nngwe e itirela phetho e diriša letswalo la yona leo le tlwaeditšwego ka Beibele. (1 Timotheo 1:19) Lega go le bjalo, ga re tšee karolo meletlong ya bodumedi yeo re bonago e sa dumelelane le Beibele.​—2 Bakorinthe 6:14-17.

Ithute ka mo go Oketšegilego

DIPOTŠIŠO TŠA BEIBELE DI A ARABJA

Ke ka Baka La’ng Batho ba Ehwa?

Karabo ya Beibele ya potšišo ye e nea khomotšo le kholofelo.

DIPOTŠIŠO TŠA BEIBELE DI A ARABJA

Go Direga’ng ge o Ehwa?

Na bahu ba tseba seo se diregago?

DIPOTŠIŠO TŠA BEIBELE DI A ARABJA

Na Nako ya Rena ya go Hwa e Rulagantšwe e sa le Pele?

Ke ka baka la’ng Beibele e bolela gore go na le “nako ya go hwa”?