Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Nka Dira Eng ge ke Nyaka go ba Hlatse ya Jehofa?

Nka Dira Eng ge ke Nyaka go ba Hlatse ya Jehofa?

Jesu o boletše ka megato yeo o ka e gatago gore o be Hlatse ya Jehofa go Mateo 28:19, 20. Ditemana tšeo di bolela ka dilo tšeo motho a swanetšego go di dira gore e be molatedi wa Kriste. E nngwe ya dilo tšeo ke go bolela goba go ruta batho ka Jehofa.

Mogato wa pele: Ithute seo Beibele e se rutago. Jesu o laetše balatedi ba gagwe gore ‘ba dire batho barutiwa le go ba ruta.’ (Mateo 28:19, 20) Lentšu leo le fetoletšwego e le “morutiwa” le bolela gore “morutwana.” Dithuto tša Jesu Kriste tšeo di hwetšwago ka Beibeleng, di bolela ka seo o swanetšego go se tseba gore o phele bophelo bjo bo thabišago le bjo bo kgotsofatšago. (2 Timotheo 3:16, 17) Re tla thabela go ithuta le wena Beibele re diriša lenaneo la rena la thuto ya Beibele ya mahala.Mateo 10:7, 8; 1 Bathesalonika 2:13.

Mogato wa bobedi: Diriša seo o ithutago sona. Jesu o rile bao ba ithutago ba swanetše ‘go boloka dilo tšohle tšeo a ba laetšego tšona.’ (Mateo 28:20) Se se bolela gore thuto ya gago ya Beibele ga se ya swanela go no ba go ipshina ka go bala, o swanetše gore o dire diphetogo tšeo di nyakegago tseleng yeo o naganago ka yona le boitshwarong bja gago. (Ditiro 10:42; Baefeso 4:22-29; Baheberu 10:24, 25) Ke moka batho bao ba bolokago ditaelo tša Jesu ba tutueletšega go dira phetho ya go mo latela ka go neela maphelo a bona go Jehofa Modimo.Mateo 16:24.

Mogato wa boraro: Kolobetšwa. (Mateo 28:19) Ka Beibeleng, kolobetšo e swantšhwa le go bolokwa. (Bapiša le Baroma 6:2-4.) E ba bjalo ka leswao la go bontšha gore o hwile tseleng ya gago ya pele ya bophelo gomme o thoma bophelo bjo bongwe. Kolobetšo ya gago e bontšha gore o dumela phatlalatša gore o gatile megato e mebedi yeo Jesu a boletšego ka yona le gore o kgopela Modimo gore a go nee letswalo le le hlwekilego.Baheberu 9:14; 1 Petro 3:21.

Ke tla tseba bjang ge e ba ke loketše go kolobetšwa?

Boledišana le bagolo ba phuthego. Ba tla boledišana le wena go bona gore o kwešiša seo se bolelwago ke kolobetšo, o diriša seo o ithutilego sona le gore o neetše bophelo bja gago go Modimo ka go rata.Ditiro 20:28; 1 Petro 5:1-3.

Na megato ye e swanetše go gatwa le ke bana bao batswadi ba bona e lego Dihlatse?

Ee. Re dira seo Beibele e se laelago ge e re re godiše bana ba rena “ka tayo le temošo ya Jehofa.” (Baefeso 6:4) Lega go le bjalo, ge bana ba godile, ba swanetše go itirela phetho ya ge e ba ba tla ithuta seo Beibele e se rutago, ba se amogela le go se diriša pele ba ka kolobetšwa. (Baroma 12:2) Ge e le gabotse, motho yo mongwe le yo mongwe o swanetše go ikgethela bodumedi.Baroma 14:12; Bagalatia 6:5.

Ithute ka mo go oketšegilego

O ka Lemoga Borapedi bja Therešo Bjang?

Na go na le bodumedi bjo tee feela bja therešo? Ela hloko maswao a mahlano ao a bontšhago borapedi bja therešo.

Na Dihlatse tša Jehofa di Dumela Gore Bodumedi bja Tšona ke Bjona Feela bja Therešo?

Na Jesu o itše go na le ditsela tše dintši tšeo di lebišago phološong?