Eya go dikagare

Eya go menyu wa bobedi

Dihlatse tša Jehofa

Sepedi

Ke ka Baka La’ng Dihlatse tša Jehofa di sa Dumele go Tšhelwa Madi?

Ke ka Baka La’ng Dihlatse tša Jehofa di sa Dumele go Tšhelwa Madi?

Dikgopolo tše di tlwaelegilego tše di fošagetšego

Maaka: Dihlatse tša Jehofa ga di dumele go alafiwa goba go hwetša thušo ya dingaka.

Therešo: Re nyakela rena le ba malapa a rena kalafo e kaonekaone yeo e hwetšagalago. Ge re babja, re ya dingakeng tšeo di nago le bokgoni bja go alafa gotee le go dira diophareišene ntle le go tšhela madi. Re leboga tšwelopele yeo e dirilwego go tša kalafo. Ge e le gabotse, dikalafo tšeo di sa dirišego madi tšeo di bego di hlametšwe go thuša balwetši ba Dihlatse ga bjale di dirišwa go thuša batho ka moka. Gona bjale dinageng tše dintši, molwetši le ge e le ofe a ka kgetha go phema mathata ao a tlišwago ke go tšhelwa madi a bjalo ka malwetši ao a lego mading, mathata a tshepedišo ya mmele ya go iphemela malwetšing gotee le diphošo tšeo di dirwago ke batho.

Maaka: Dihlatse tša Jehofa di dumela gore tumelo e ka fodiša motho.

Therešo: Ga re fodiše batho ka tumelo.

Maaka: Go phema tšhelo ya madi go bitša tšhelete e ntši kudu.

Therešo: Dikalafo tšeo di sa akaretšego tšhelo ya madi ga di bitše tšhelete e ntši kudu. *

Maaka: Dihlatse tše dintši go akaretša le bana, ba hwa ngwaga le ngwaga ka baka la go gana go tšhelwa madi.

Therešo: Taba ye ga go na moo e theilwego gona. Gantši dingaka di dira diophareišene tše di raraganego tše bjalo ka diophareišene tša pelo, tša malokollo goba mokokotlo le tša go bjalollwa ditho ntle le gore molwetši a tšhelwe madi. * Balwetši, go akaretša le bana bao ba sa tšhelwego madi gantši ba fola go swana le bao ba dumelago go tšhelwa madi goba kaone go ba feta. * Boemong le ge e le bofe, ga go motho yo a ka bolelago a kgodišegile gore molwetši o tla hwa ka baka la ge a gana go tšhelwa madi goba o tla phela ka ge a dumetše go tšhelwa madi.

Ke ka baka la’ng Dihlatse tša Jehofa di sa dumele go tšhelwa madi?

Ye ke taba ya bodumedi e sego ya tša kalafo. Testamente e Mpsha le ya Kgale di re laela ka go lebanya gore re ile madi. (Genesi 9:4; Lefitiko 17:10; Doiteronomio 12:23; Ditiro 15:28, 29) Le gona Modimo o lebelela madi a emela bophelo. (Lefitiko 17:14) Ka gona ga re gane go tšhelwa madi e le feela ka gobane re kwa Modimo eupša lebaka le lengwe ke gore re a mo hlompha ka ge e le Monei wa bophelo.

Go fetoga ga dipono ka taba ya go tšhelwa madi

Diophareišene tše di raraganego di ka dirwa ka katlego ntle le go tšhelwa madi

Kgale dingaka le baoki ba be ba lebelela mekgwa ya go phema go tšhelwa madi e le yeo e feteletšego e bile e le ya go nyaka go ipolaya, eupša se se fetogile nywageng ya morago bjale. Ka mohlala, ka 2004, sehlogo seo se ilego sa gatišwa ka pukung ya go ithutela tša kalafo se boletše gore “mekgwa e mentši yeo e hlametšwego go dirišwa go balwetši ba Dihlatse tša Jehofa e tla dirišwa go batho bohle nywageng e tlago.” * Ka 2010, sehlogo sa ka pukung ya Heart, Lung and Circulation se boletše gore “‘go dirwa ophareišene ntle le go tšhelwa madi’ ga se gwa swanelwa go dirwa feela go Dihlatse tša Jehofa, eupša dingaka di swanetše go naganela go diriša mokgwa wo ka mehla.”

Ga bjale dingaka tše diketekete lefaseng ka bophara di diriša mekgwa ya go seketša madi ge di dira diophareišene tše di raraganego, di dira seo ntle le go tšhela balwetši madi. Mekgwa e bjalo ya go alafa ntle le tšhelo ya madi e dirišwa le dinageng tšeo di hlabologago e bile e kgopelwa ke balwetši ba bantši bao e sego Dihlatse tša Jehofa.

^ ser. 8 Bona puku ya Transfusion and Apheresis Science, Bolumo 33, No. 3, letl. 349.

^ ser. 10 Bona puku ya The Journal of Thoracic and Cardiovascular Surgery, Bolumo 134, No. 2, matl. 287-288; puku ya Texas Heart Institute Journal, Bolumo 38, No. 5, letl. 563; puku ya Basics of Blood Management, letl. 2 le puku ya Continuing Education in Anaesthesia, Critical Care & Pain, Bolumo 4, No. 2, letl. 39.

^ ser. 10 Bona puku ya The Journal of Thoracic and Cardiovascular Surgery, Bolumo 89, No. 6, letl. 918 le puku ya Heart, Lung and Circulation, Bolumo 19, letl. 658.

^ ser. 14 Puku ya Continuing Education in Anaesthesia, Critical Care & Pain, Bolumo 4, No. 2, letlakala 39.

 

Ithute ka mo go oketšegilego

DIPOTŠIŠO TŠA BEIBELE DI A ARABJA

Beibele e Re’ng ka go Tšhelwa Madi?

Go ya ka Beibele Modimo o neile taelo ya gore re ‘ile madi.’ Se se šoma bjang lehono?