Eya go dikagare

Eya go menyu wa bobedi

Dihlatse tša Jehofa

Sepedi

Ge ke Ithuta Beibele le Dihlatse tša Jehofa, na ke Gapeletšega go ba yo Mongwe wa Tšona?

Ge ke Ithuta Beibele le Dihlatse tša Jehofa, na ke Gapeletšega go ba yo Mongwe wa Tšona?

Aowa, ga o gapeletšege go ba Hlatse ya Jehofa. Batho ba dimilione ba thabela go ithuta Beibele le rena e se ditho tša bodumedi bja rena. Morero wa go ithuta le wena ke go go bontšha seo Beibele e se rutago. Go tšwa go wena gore o dira’ng ka seo o ithutago sona. Re a tseba gore motho o swanetše go ikgethela bodumedi.​—Joshua 24:15.

Na nka diriša Beibele ya ka ge ke ithuta le lena?

Ee. Le ge rena re rata go diriša Phetolelo ya Lefase le Lefsa ya Mangwalo a Makgethwa ya leleme la mehleng yeno, ga re na bothata ge motho a kgetha go diriša Beibele ya gagwe. Eupša re ka go nea Beibele ya Phetolelo ya Lefase le Lefsa mahala ge e ba o rata. Mo e nyakilego go ba phetolelo e nngwe le e nngwe ya Beibele e ka go ruta molaetša woo o tlago go go phološa le wo o neago kholofelo.

Ke ka baka la’ng le ithuta Beibele le batho bao e sa bego Dihlatse tša Jehofa?

  • Ka gobane re rata Jehofa Modimo, yoo a nyakago gore Bakriste ba rute batho ba bangwe seo ba ithutilego sona. (Mateo 22:37, 38; 28:19, 20) Re bona e le tokelo e kgolo kudu go ba “bašomigotee le Modimo” modirong wa go ruta batho seo Beibele e se rutago.​—1 Bakorinthe 3:​6-9.

  • Lebaka le lengwe ke gore re rata baagišani ba rena. (Mateo 22:39) Re thabišwa ke go botša ba bangwe dilo tše di kgahlišago tšeo re ithutilego tšona.​—Ditiro 20:35.