Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na Dihlatse tša Jehofa di Gapeletša Batho go Tlogela Madumedi a Bona?

Na Dihlatse tša Jehofa di Gapeletša Batho go Tlogela Madumedi a Bona?

Aowa, ga go bjalo. Makasine wa rena wa Morokami o boletše gore: “Go gapeletša batho gore ba tlogele bodumedi bja bona ke phošo.” * Re phema se ka gobane:

  • Jesu ga se a ka a gapeletša batho go amogela dithuto tša gagwe. O be a tseba gore ke ba sego kae feela bao ba tla go amogela molaetša wa gagwe. (Mateo 7:13, 14) Ge ba bangwe ba barutiwa ba gagwe ba be ba kgopišwa ke seo a bego a se bolela, o ile a ba tlogela gore ba sepele go e na le go ba gapeletša gore ba dule.—Johane 6:60-62, 66-68.

  • Jesu o rutile balatedi ba gagwe gore ba se gapeletše batho go tlogela madumedi a bona. Go e na le go leka go gapeletša batho go amogela ditaba tše dibotse tša Mmušo, barutiwa ba gagwe ba be ba swanetše go nyaka bao ba bego ba tla di amogela.—Mateo 10:7, 11-14.

  • Go ya bodumeding bjo bongwe ka kgapeletšo ga go na mohola ka ge Modimo a amogela borapedi bjo bo tšwago pelong.—Doiteronomio 6:4, 5; Mateo 22:37, 38.

Na modiro wa rena ke go tlogediša batho madumedi a bona?

Ke therešo gore re bolela molaetša wa Beibele “go fihla karolong ya kgole ya lefase,” re dira se “phatlalatša le ka ntlo le ntlo” ka ge re laetšwe ke Beibele. (Ditiro 1:8; 10:42; 20:20) Go swana le Bakriste ba pele, ka dinako tše dingwe re bewa molato wa go tlogediša batho madumedi a bona. (Ditiro 18:12, 13) Lega go le bjalo, ditatofatšo tše ke tša maaka. Ga re gapeletše motho go dumela seo re se dumelago. Go e na le moo, re dumela gore batho ba swanetše go hwetša tsebo gore ba kgone go dira phetho e bohlale.

Ga re gapeletše batho gore ba tlogele madumedi a bona, ga re dire mediro ya dipolitiki re khutile ka bodumedi le ge e le go nea batho dilo tšeo ba di hlokago e le go ba goketša gore e be ditho tša bodumedi bja rena. Se se fapane le ditiro tša mohuta wo tše di sa hlomphego Kriste tša bao ba ipitšago Bakriste. *

Na motho o na le tokelo ya go tlogela bodumedi bja gagwe?

Moporofeta Aborahama o ile a tlogela bodumedi bja leloko la gabo

Ee, Beibele e bontšha gore batho ba na le tokelo ya go tlogela bodumedi bja bona. E bolela ka ba bantši bao ba kgethilego go se be madumeding a ba leloko la bona, bao ka go rata ba ilego ba kgetha go rapela Modimo wa therešo. Aborahama, Ruthe, batho ba bangwe ba Athene le moapostola Paulo ke ba bangwe ba mmalwa ba batho bao ba ilego ba dira seo. (Joshua 24:2; Ruthe 1:14-16; Ditiro 17:22, 30-34; Bagalatia 1:14, 23) Go oketša moo, Beibele e boletše le ka bao ba ilego ba kgetha go lahla bodumedi bjo bo amogelwago ke Modimo.—1 Johane 2:19.

Tokelo ya go tlogela bodumedi e thekgwa ke Universal Declaration of Human Rights, e lego sengwalwa sa melao yeo e šireletšago ditokelo tša batho yeo United Nations e rego ke “motheo wa molao wa ditšhabatšhaba wa ditokelo tša batho.” Sengwalwa seo se boletše gore motho yo mongwe le yo mongwe o na le “tokologo ya go fetola bodumedi bja gagwe goba go fetola seo a se dumelago” le “tokologo ya go nyaka tsebišo, go e hwetša le go fetišetša tsebišo yeo le dikgopolo go ba bangwe,” go akaretšwa le dikgopolo tša bodumedi. * Ke therešo gore ditokelo tše di nea motho boikarabelo bja go hlompha ditokelo tša batho ba bangwe ge ba kgomarela seo ba se dumelago le go gana dikgopolo tšeo ba sa dumelelanego le tšona.

Na go tlogela bodumedi bja gago ke go nyatša setšo goba meetlo?

Aowa. Beibele e kgothaletša gore batho ka moka ba hlomphane go sa šetšwe gore ke ba bodumedi bofe. (1 Petro 2:17) Go oketša moo, Dihlatse tša Jehofa di kwa taelo ya Beibele ya go godiša batswadi ba tšona le ge ba le madumeding a fapanego.—Baefeso 6:2, 3.

Go dutše go le bjalo, ga se batho ka moka bao ba dumelelanago le seo Beibele e se bolelago. Mosadi yo mongwe yo a goletšego Zambia o hlalositše gore: “Setšhabeng sa gešo, ge motho a tlogela bodumedi bja gagwe . . . go be go lebelelwa e le go se botege, go eka lapa la gabo motho le setšhaba.” Mosadi yo o ile a ba le bothata bjo ge e sa le yo monyenyane ge a be a thoma go ithuta Beibele le Dihlatse tša Jehofa gomme ka morago a kgetha go tlogela bodumedi bja gagwe. O re: “Batswadi ba ka ba mpoditše leboelela gore ke be ke sa ba kgahliše le gatee le gore ke be ke ba nyamiša. Ke ile ka hwetša se se le thata kudu ka ge go amogelwa ke batswadi ba ka go bolela mo gontši go nna. . . . Go kgetha go botegela Jehofa ka go se kwanantšhe go e na le go botegela ditšo tša bodumedi ga go bolele gore ga ke botegele lapa lešo.” *

^ ser. 2 Bona tokollo ya Morokami wa January 1, 2002, letlakala 12, serapa 15.

^ ser. 8 Ka mohlala, mo e ka bago ka ngwaga wa 785 C.E., mmušiši Charlemagne o ile a ntšha taelo ya gore batho ba naga ya Saxon bao ba bego ba gana go kolobetšwa gore e be Bakriste ba bolawe. Gape, Peace of Augsburg e lego tumelelano ya khutšo yeo dihlopha tšeo di bego di sa kwane di ilego tša e saena ka 1555 C.E. dinageng tšeo di bego di bušwa ke Roma, e ile ya bolela gore mmuši yo mongwe le yo mongwe wa tikologo e swanetše go ba setho sa kereke ya Roma Katholika goba ya Lutere le gore yo mongwe le yo mongwe ka tlase ga pušo ya mmuši yo o swanetše go ba bodumeding bja gagwe. Bao ba bego ba gana go latela taelo ya mmuši mabapi le kgetho ya bodumedi ba be ba kgopelwa go hudugela nageng e nngwe.

^ ser. 11 Ditokelo tše swanago le tše di tšwelela le ka go African Charter on Human and Peoples’ Rights, the American Declaration of the Rights and Duties of Man, the 2004 Arab Charter on Human Rights, the ASEAN (Association of Southeast Asian Nations) Human Rights Declaration, the European Convention on Human Rights, le the International Covenant on Civil and Political Rights e lego melao yeo ka moka e šireletšago ditokelo tša batho. Lega go le bjalo, le ditšhaba tšeo di ipolelago gore di nea batho ditokelo tše bjalo di fapana ka tsela yeo di phethagatšago boitlamo bja tšona bja go hlompha ditokelo tše.

^ ser. 14 Jehofa ke leina la Modimo wa therešo ka ge le utolotšwe ka Beibeleng.

Ithute ka mo go oketšegilego

Na Dihlatse tša Jehofa di Thuba Malapa Goba di a a Aga

Dihlatse tša Jehofa ka dinako tše dingwe di latofatšwa ka gore di thuba malapa. Na ruri Dihlatse di baka diphapano?

Ditaba tše Dibotse ka Bodumedi ke Dife?

Na go tla tla nako yeo ka yona batho ka moka ba tlago go kopana gotee go rapela Modimo wa therešo?