Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na Dihlatse tša Jehofa di Dumela Testamenteng ya Kgale?

Na Dihlatse tša Jehofa di Dumela Testamenteng ya Kgale?

Ee. Dihlatse tša Jehofa di dumela gore Beibele ka moka e ‘buduletšwe ke Modimo gomme e a hola.’ (2 Timotheo 3:16) Seo se akaretša Testamente ya Kgale le Testamente e Mpsha, go etša ge gantši di bitšwa bjalo. Gantši Dihlatse tša Jehofa di bitša dikarolo tšeo tša Beibele gore ke Mangwalo a Seheberu le Mangwalo a Bakriste a Segerika. Ka tsela ye, re phema go fetišetša kgopolo ya gore dikarolo tše dingwe tša ka Beibeleng di fetilwe ke nako goba ga di bohlokwa.

Ke ka baka la’ng Bakriste ba swanetše go bala Testamente ya Kgale le Testamente e Mpsha?

Moapostola wa Mokriste e lego Paulo o ile a budulelwa ke Modimo go ngwala gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta.” (Baroma 15:4) Ka gona, re hwetša tsebišo e bohlokwa go tšwa Mangwalong a Seheberu. Magareng ga dilo tše dingwe, a re botša dipego tše bohlokwa tša histori le keletšo e holago.

  • Dipego tše bohlokwa tša histori. Mangwalo a Seheberu a akaretša pego ka botlalo ya mabapi le tlholo le go wela ga batho sebeng. Ka ntle le tsebišo yeo, re be re tla hloka dikarabo tše di kgotsofatšago tša dipotšišo tše bjalo ka: Re tšwa kae? Ke ka baka la’ng batho ba ehwa? (Genesi 2:7, 17) Go oketša moo, Mangwalo a Seheberu a re botša ka ditirišano tša Jehofa Modimo le batho bao ba thabilego le ba nago le ditlhohlo tša go swana le tša rena.—Jakobo 5:17.

  • Keletšo e holago. Dipuku tša Beibele tša Diema le Mmoledi, tšeo e lego karolo ya Mangwalo a Seheberu, di re swaretše bohlale bjoo bo sa fetwego ke nako. Di re eletša kamoo re ka thabelago bophelo bja lapa (Diema 15:17), kamoo re ka bago le pono e lekalekanego ka mošomo wa boiphedišo (Diema 10:4; Mmoledi 4:6) le kamoo bafsa ba ka dirišago bofsa bja bona ka tsela yeo e ka ba tlišetšago lethabo (Mmoledi 11:9–12:1).

Go feta moo, re ka holwa ke go ithuta Molao wa Moshe ka ge o begilwe ka go Torah (dipuku tše hlano tša mathomo tša Beibele). Gaešita le ge Molao woo o sa tlame Bakriste, o swere melao e bohlokwa ya motheo yeo e ka re thušago gore re ipshine ka bophelo.—Lefitiko 19:18; Doiteronomio 6:5-7.

 

Ithute ka mo go oketšegilego

O Swanetše go Dira’ng Gore o Kwešiše Beibele?

Go sa šetšwe setlogo sa gago, o ka kgona go kwešiša molaetša wa Modimo wo o lego ka Mangwalong a Makgethwa.