Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Na Dihlatse tša Jehofa di Fetošitše Beibele Gore e Dumelelane le Ditumelo tša Tšona?

Na Dihlatse tša Jehofa di Fetošitše Beibele Gore e Dumelelane le Ditumelo tša Tšona?

Aowa, ga se ra dira bjalo. Go e na le moo, ge re be re hwetša gore ditumelo tša rena di be di sa dumelelane ka mo go feletšego le Beibele, re ile ra di fetoša.

Re thomile go hlahloba Beibele nako e telele le pele ga ge re ka thoma go tšweletša Phetolelo ya Lefase le Lefsa ya Mangwalo a Makgethwa ka 1950. Re dirišitše phetolelo le ge e le efe yeo e bego e hwetšagala gomme ra dira gore ditumelo tša rena di sepedišane le Beibele. Ela hloko mehlala e sego kae ya ditumelo tša kgale tša Dihlatse tša Jehofa gomme o itirele phetho ya ge e ba ditumelo tšeo di dumelelana le seo ge e le gabotse Beibele e se rutago.

  1. Seo re se dumelago: Modimo ga se Boraro Botee. Tokollo ya July 1882 ya Zion’s Watch Tower e itše: “Babadi ba rena ba a tseba gore le ge re dumela go Jehofa, Jesu le Moya o mokgethwa, re gana ka mo go feletšego dithuto tše e sego tša mangwalo tše bjalo ka thuto ya gore go na le Medimo e meraro mothong o tee goba Modimo o tee bathong ba bararo go etša ge batho ba bangwe ba re’alo.”

    Seo Beibele e se bolelago: “Jehofa, Modimo wa rena ke Jehofa a nnoši.” (Doiteronomio 6:4, Phetolelo ya Kgale) “Wa rena Modimo ké o tee fêla, Yêna Tata wešo, Yêna thlaxô ya tšohle le boyô bya rena bohle. Le Mong wa rena ké o tee, Yêna Jesu Kriste Motšweletša-tšohle le rena.” (1 Bakorinthe 8:6, Beibele ya Sepedi) Jesu ka boyena o boletše gore: “Tate ke e mogolo go nna.”—Johane 14:28, Phetolelo ya Kgale.

  2. Seo re se dumelago: Batho ba ka se hlokofatšwe ka mo go sa felego mollong wa dihele. Ge tokollo ya June 1882 ya Zion’s Watch Tower e tsopola Baroma 6:23 go King James Version, sehlogong seo se rego, “Moputso wa Sebe ke Lehu,” e itše: “Mantšu a a kwagala. Ruri go a makatša gore batho ba bantši bao ba ipolelago gore ba dumela gore Beibele ke Lentšu la Modimo ba sa dutše ba ganetšana le mantšu a a kwagalago, le gona ba dumela gore moputso wa sebe ke go hlokofatšwa ka mo go sa felego gomme ba re le Beibele e ruta sona seo.

    Seo Beibele e se bolelago: “Moya o senyago wona o tlo hwa.” (Hesekiele 18:4, 20, Phetolelo ya Kgale) Kotlo ya mafelelo ya bao ba ganetšago Modimo ga se go tlaišwa ka mo go sa felego, eupša ke “thsenyêxô ye e sa felexo.”—2 Bathesalonika 1:9, Beibele ya Sepedi.

  3. Seo re se dumelago: Mmušo wa Modimo ke pušo ya kgonthe, ga o ka pelong ya motho. Ge e bolela ka Mmušo wa Modimo, tokollo ya December 1881 ya Zion’s Watch Tower, e itše: “Ruri go hlongwa ga mmušo wo go tla akaretša go fedišwa ga mebušo ka moka ya lefase.”

    Seo Beibele e se bolelago: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44, Beibele ya Sepedi.

Na Dihlatse tša Jehofa di ithekgile ka Phetolelo ya Lefase le Lefsa gore di thekge ditumelo tša tšona?

Aowa, ka gobane re tšwela pele re diriša diphetolelo tše dintši tša Beibele modirong wa rena wa go nea bohlatse. Ge e le gabotse, le ge re nea batho dikopi tša Phetolelo ya Lefase le Lefsa lenaneong la rena la mahala la go ruta batho Beibele, ga re na bothata go ithuta le bao ba ratago go diriša diphetolelo tše dingwe tša Beibele.

Ithute ka mo go oketšegilego

Na Borarobotee ke Thuto ya ka Beibeleng?

Dikereke tše dintši di ruta gore Modimo ke Borarobotee. Na se ke seo Beibele e se rutago?

Hele ke Eng? Na ke Moo Batho ba Tlaišetšwago sa Ruri?

Na badiradibe ba otlwa mollong wa dihele? Na hele ke moputso wa sebe? Bala Mangwalo gore o hwetše dikarabo tša dipotšišo tše.

Therešo ya Beibele e Ile ya Utollwa Lefsa Bjang?

Re ka tseba bjang gore re hweditše therešo yeo e lego ka Beibeleng?