Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Go Gopola Kopano ya “Go Dikologa Lefase”

Go Gopola Kopano ya “Go Dikologa Lefase”

Nywaga e masomehlano e fetilego, Dihlatse tša Jehofa tše 583 di ile tša tšea leeto la dibeke tše lesome go dikologa lefase. Morero wa tšona e be e se go bona tlhago. Eupša e be e le go hwetša bogwera bjo bo matlafatšago bja Bokriste Dikopanong tša 1963 tša sehlogo se se rego: “Ditaba tše Dibotse tša Neng le Neng.” Ka ge baeng bao ba ile ba etela dinaga tša ka godimo ga tše 20 go kopana le Dihlatse tše dingwe, lelokelelo leo la Dikopano tša bona le ile la reelwa leina la “Go Dikologa Lefase.”

Selo seo se gopolwago kudu ka dikopano tšeo e be e le polelo ya sehlogo se se rego: “Ge Modimo a tla ba a Buša Lefase ka Moka.” Nathan Knorr, yo a bego a etšwa ntlongkgolo ya Dihlatse tša Jehofa, o ile a nea polelo yeo go bontši bja dikopano tšeo. O ile a hlalosa maemo a mpefalago a lefase gomme a bontšha phapano e tlago go ba gona ge go phethagala kholofetšo e kgolo ya Beibele ya go bušetša lefase gore e be Paradeise. Bao ba bilego gona polelong yeo lefaseng ka bophara e bile ba 580 509.

“Go Dikologa Lefase” ka Dibeke tše Lesome

Dikopano tše di thomile kua Milwaukee, Wisconsin, U.S.A. Go tloga moo baeng bao ba ile ba leba ka bohlabela. Ka morago ga kopano ya kua New York, ba ile ba fetela Engelane, Sweden, Jeremane le Italy. Lefelong le lengwe le le lengwe, ba ile ba hwetša sebaka sa go bolela le ba bangwe ka ditaba tše dibotse tša Beibele.

Batho ba bantši ba ditikologong tšeo ba ile ba thabela gore Dihlatse di ile tša ipha nako ya gore di ba etele. Kgarebe e nngwe ya kua Stockholm, Sweden, e ile ya re: “Nka se tsoge ke lebetše ketelo ye bophelong bja ka ka moka. . . . Le ra gore le tšere leeto le le kaakaa gore le tlo boledišana le nna ka tumelo ya lena go Modimo? Ba go swana le lena ba a hlokwa.”

Baeng ba ba ile ba nyamišwa ke selo se sengwe ge ba fihla Athene, kua Gerika. Baetapele ba bodumedi ba lefelong leo ba ile ba gapeletša mmušo gore o se sa dumelela Dihlatse go swara kopano lebaleng la kua Panathinaikos. Eupša seo ga se sa ka sa nyamiša Dihlatse tšeo tše di fišegago. Ge kgwedi ya August e eya mafelelong, batho ba ka bago ba 10 000 ba ile ba ba gona lenaneong leo, leo le ilego la swarelwa dintlong tša batho le diphuthegong tša tikologong yeo.

Ge ba tloga Athene, baeng bao ba ile ba leba Libanoni, Jorodane, Isiraele le Tsipero. Badumedigotee le bona ba ile ba ba amogela ka diatla tše pedi, ka dinako tše dingwe go be go direga dilo tša go segiša. Motseng wa Nicosia, kua Tsipero, moeng yo mongwe o ile a anega mohlolo woo o ilego wa direga ka dieta tša gagwe, o re: “Ka mehla ge ke boela moo ke bego ke robala gona gomme ke rola dieta . . . , di be di timelela . . . , ke moka ge di tšwelela ka morago ga metsotso e mehlano, di boa di pholišitšwe e bile di phadima!”

Dinaga tša mafelelo tšeo ba ilego ba di etela e bile kua Asia le Dihlakahlakeng tša Pacific. Dihlatse tše dingwe tše dikete le baeng bao ba ile ba amogelwa kua India, Burma (yeo ga bjale e bitšwago Myanmar), Thailand, Hong Kong, Singapore, Dihlakahlakeng tša Philippine, Indonesia, Australia, Taiwan, Japane, New Zealand, Fiji le Korea. Batho ba bantši ba ile ba dira maiteko a gore ba be gona kopanong, eupša maiteko ao a gopolegago kudu ke a lesogana le kgarebe bao ba bego ba tlo nyalana ba kua Yokosuka, Japane. Ge lesogana le le be le kgopela mong wa lona gore le se be gona mošomong gore le kgone go ya kopanong ya kua Kyoto, le ile la botšwa gore bašomi ba dumelelwa go se be gona mošomong ge feela ba eya lehung goba lenyalong. Ka ge ba be ba lokišetša go nyalana, ba ile ba rulaganya gore ba batametše letšatši la bona la lenyalo. Ba rile go fetša go nyalana ba leba kopanong!

Leeto le ile la felelela ka dikopano tšeo di swerwego mathomong a September kua Hawaii le California, U.S.A. Ge ba fihla kua Pasadena, California, palo ya bao ba bilego gona e be e le e ntši go feta kamoo ba bego ba naganne ka gona. Ka baka leo, ge lenaneo le fela, e be e le sephethephethe sa dikoloi. Go sa šetšwe se, kuranta ya lefelong leo e ile ya tsopola molaodi wa maphodisa a bitša kopano yeo gore ke “pokano e kgolokgolo ya batho ba go itshwara gabotse yeo nkilego ka e bona.”

Dilo Tšeo di sa Lebalegego

Mehola ya dikopano tšeo e sa dutše e le gona. Puku yeo e hlalosago Beibele yeo e bitšwago: ‘Mangwalo ka Moka a Buduletšwe ke Modimo Gomme a a Hola’ e ile ya lokollwa kopanong yeo gomme Dihlatse tša Jehofa di sa dutše di e diriša dibokeng tša tšona.

Harold King ka moragonyana ga ge a lokolotšwe kgolegong kua China

Kopanong ya kua New York go ile gwa bolelwa gore go na le kopelo e mpsha. E be e ngwadilwe ke Harold King, e lego Hlatse yeo e bego e lokolotšwe kgolegong ya kua China ka 1963. Kopelo yeo e be e na le sehlogo se se rego: “Ka Ntlo le Ntlo.” Harold King o ile a hlama kopelo ye ge a be a tswaleletšwe a nnoši kgolegong, le gona Dihlatse tša Jehofa di sa opela kopelo yeo e nyakilego e swana le yona yeo e sa dutšego e tsebja e le “Ka Ntlo le Ntlo.”

Lehono dikopano tša Dihlatse tša Jehofa ga di sa swana le tša kgale. Go kgethwa mafelo a manyenyane ao a dirago gore go se tlale batho. Ge go na le mafelo a mantši, seo se dira gore batho ba se tšee maeto a matelele go fihla dikopanong. Diphetogo tše le tše dingwe di thuša gore batho ba bantši ba kgone go theetša lenaneo. Dihlatse tša Jehofa tša ka godimo ga dimilione tše šupago le baeng ba tšona, di ba gona dikopanong ngwaga le ngwaga. Na o ka rata go ba le rena lenyaga? Hwetša lefelo la kopano leo le lego kgauswi le moo o dulago.

 

Ithute ka mo go oketšegilego

Ke ka Baka la Eng Dihlatse tša Jehofa di Eya Dikopanong tše Dikgolo?

Re ba le dikopano tše tharo ngwaga le ngwaga. O ka holwa bjang ke dikopano tše?