Dlulela kokumunyethweko

Dlulela erhelweni elilandelako

Dlulela erhelweni leenhloko

AboFakazi BakaJehova

IsiNdebele

Iimfundo Ongazithola EBhayibhelini

 ISIFUNDO 41

UDavida NoSawula

UDavida NoSawula

UDavida nakaqeda ukubulala uGoliyadi, iKosi uSawula yambeka bona abe yinduna yebutho lakhe. UDavida wathumba izipi ezinengi, begodu waba mumuntu odumileko. Qobe uDavida angabuya epini, abafazi bebaphuma bagide bakhalele, bathi: ‘USawula umadlhe abaziinkulungwana, uDavida yena abaziinkulungwana ezimatjhumi!’ USawula waba nomona ngoDavida wafuna nokumbulala.

UDavida bekalibetha kamnandi tle irharibha. Ngelinye ilanga uDavida abethela uSawula irharibha, ikosi yarhwatjhabula umkhonto yamphosa ngawo. Kodwana uDavida wakutsa, umkhonto wahlaba emthangaleni. Ngemva kwalokho uSawula walinga amahlandla amanengi ukubulala uDavida. Emaswapheleni, uDavida wabalekela emmangweni.

USawula wathatha ibutho elinamadoda azi-3 000 wakhamba nalo ukuyokuzingela uDavida. Kwenzeka bona bangene emrhobeni lapho uDavida azifihle ngakhona.  Amadoda akhamba noDavida amhlebela athi kuye: ‘Leli lithuba lakho lokubulala uSawula.’ Kwathi uSawula nakasalele aphumulile, uDavida wamnanabela, waqunta umphetho wesambatho sakhe. USawula khenge ezwe litho. Nakaqeda ukwenza njalo, uDavida wazisola ngokuthi akakayihloniphi ikosi ekhethwe nguJehova. Akhenge avumele amadoda akhamba nawo bona abulale uSawula. Wabe wabiza uSawula wathi, bengingakubulala nangithandako njengombana benginethuba lokwenza njalo. Kghani lokho bekuzowutjhugulula na umcabango kaSawula?

Awa. USawula waraga nokuzingela uDavida. Ngobunye ubusuku uDavida nomzukulwanakhe u-Abhitjhayi bananabela ngekampeni kaSawula. U-Abineri ogada ikosi naye bekalapho alele. U-Abhitjhayi wathi: ‘Leli lithuba lethu! Ngivumela ngimbulale.’ UDavida waphendula wathi: ‘UJehova uzambona. Thina asithathe umkhontwakhe nomjekakhe wamanzi sikhambe.’

UDavida wakhwela intaba eseduze, engehla kwekampa kaSawula. Wamemeza wathi: ‘Abineri, kubayini ungakavikeli ikosakho na? Uphi umjeka nomkhonto kaSawula?’ USawula walemuka ukuthi liphimbo lakaDavida wathi kuye: ‘Bewungangibulala, kodwana akhenge wenze njalo. Ngiyazi ukuthi uzokuba yikosi elandelako yakwa-Israyeli.’ USawula wabuyela esigodlweni sakhe. Begodu uDavida bekangakahloywa ngiwo woke amalunga womndeni kaSawula.

“Nakukghonekako ngokusemandlenenu, philisanani ngokuthula nabo boke abantu. Bazalwana ningazibuyiseleli, kodwana nikelani itukuthelo kaZimu ithuba.”—Roma 12:18, 19