Dlulela kokumunyethweko

Dlulela erhelweni elilandelako

Dlulela erhelweni leenhloko

AboFakazi BakaJehova

IsiNdebele

Buyela KuJehova

Incwadi Evela Emkhandlwini Onqophisako

Incwadi Evela Emkhandlwini Onqophisako

Mkhulekeli othandekako esikholwa naye:

Njengombana wazi, iBhayibheli liyincwadi ekhuluma khulu ngabantu. Abanengi babo bekumadoda nabafazi abathembekileko abaqalana nobudisi obufanako nobethu. ‘Bebabantu abafana nathi.’ (Jakopo 5:17) Abanye bebagandelelwa miraro namatshwenyeko. Abanye bazwiswa ubuhlungu obukhulu khulu malunga wemindenabo namkha ziinkhonzi abakunye nazo ebandleni. Kukulapho inengi litshwenywa yisazelo semitjhapho abayenzako.

Kghani abantu abanjalo bamtjhiye ngokupheleleko uJehova? Awa. Abanengi babo bebafana nomrhubi owathandaza wathi: ‘Ngiduke njengemvu elahlekileko. Yewufune incekwakho ngombana angikayikhohlwa imiyalwakho.’ (IRhubo 119:176) Kghani ubujamo bakho buyahlobana namezwi la?

UJehova akabakhohlwa abakhulekeli abadurhileko emhlambinakhe. Ngokuhlukileko, uyabafuna ngokusebenzisa abakhulekeli abakunye nabo. Ngokwesibonelo akhe sicabangele indlela uJehova asiza ngayo incekwakhe uJobho, owaqalana neentjhijilo ezinengi kunye nokubogaboga komnothwakhe, ukulahlekelwa babantu abathandako, kunye nemiraro yepilo. UJobho wabekezelela namezwi abuhlungu avela kilabo ebekufuze bamsekele ebudisini ebekaqalene nabo. Kodwana akhenge amlahle uJehova, nanyana ngesinye isikhathi abanomcabango ongakafaneli ngaye. (Jobho 1:22; 2:10) UJehova wamsiza njani uJobho ukuthi abuyele esigeni?

UJehova wasebenzisa u-Elihu, umkhulekeli okunye naye bona asize uJobho. Lokha uJobho nakaveza amatshwenyekwakhe, u-Elihu wamlalela begodu watjhukumiseleka bona akhulume. Bekazokuthini? Kghani bekazokunyefula uJobho namkha alinge ukumkhuthaza ngokusebenzisa isazelo namkha ihlazo? Kghani u-Elihu waziqala njengomkhulu kuJobho? Awa! U-Elihu nakatjhukunyiswa mumoya kaZimu, wathi: “Phambi kwakaZimu sengizifanela nawe, nami ngabunjwa ngomdaka.” Wabuye wamqinisekisa ngokuthi: “Ngalokho ukungesaba kungakwethusi, nesandla sami singakudisibezi.” (Jobho 33:6, 7) Kunokobana angezelele ebudisini bakaJobho, ngethando u-Elihu wakhupha iseluleko nesikhuthazo uJobho ebegade asitlhoga.

Sibawa wazi ukuthi incwajana le siyilungiselele ngomoya ofanako. Kokuthoma silalele, ngokutjheja okukhulu sacabangela ubujamo namazizo wenengi elidurhileko. (IzAga 18:13) Bese sahlolisisa imiTlolo, ngomthandazo sacabangela iindlela uJehova asiza ngazo iinceku zakhe zangaphambilini lokha naziqalene nobujamo obufana nebethu. Siphethe ngokuhlanganisa koke ukulandisa kwemiTlolo leyo kunye nezehlakalo zanamhlanjesi bona sikhuphe incwajana le. Sikumema ngethando bona uyifunde incwajana le. Sibawa uqiniseke ukuthi sikuthanda kwamambala.

UmKhandlu ONqophisako WaboFakazi BakaJehova