Dlulela kokumunyethweko

Dlulela erhelweni elilandelako

Dlulela erhelweni leenhloko

AboFakazi BakaJehova

IsiNdebele

Incwadami Yeendaba ZeBhayibhili

INdaba 40: UMosisi Ubetha Idwala

INdaba 40: UMosisi Ubetha Idwala

KWADLULA iimnyaka eyi-10, iimnyaka eyi-20, iimnyaka eyi-30, iimnyaka eyi-39! Ama-Israyeli asesemangweni. Kodwana yoke iimnyaka le uJehova uyabatlhogomela abantu bakhe. Ubapha imana bona badle. Emini ubadosa phambili ngesika yelifu, ebusuku ngesika yomlilo. Kiyo yoke iimnyaka le, iimbatho zabo akhenge zirathuke neenyawo zabo akhenge zivuvuke.

Kwanje bekuyinyanga yokuthoma yeemnyaka eyi-40 batjhiye iGibhide. Ama-Israyeli nje bekahlala eKadeshi. La, kulapho egade bakhona lokha iinhloli eziyi-12 nezithunyelwa bona ziyokuhlola inarha yeKanana eemnyakeni epheze ibe yi-40 ngaphambili. Udadwabo kaMosisi uMiriyamu wafela eKadeshi. Njengaphambilini, inarha le beyinomraro.

Abantu akhenge bafumane amanzi. Ngalokho banghonghoyila kuMosisi bathi: ‘Bekuzokuba bhedere nangathana safa. Usikhupheleni eGibhide wasiletha enarheni embi le enganalitho elimilako? Akunakoroyi, akunamafeyi, akunamadiribe, akunamarharnada. Akukho ngitjho namanzi wokusela.’

UMosisi ubetha idwala

Lokha uMosisi no-Aroni bayokuthandaza etabarnakele, uJehova watjela uMosisi: ‘Hlanganisela abantu ndawonye. Phambi kwabo boke khuluma nedwalela. Kuzokuphuma amanzi alingeneko kilo wabantu neenlwana zabo zoke.’

Ngalokho uMosisi wahlanganisa abantu wathi kibo: ‘Lalelani nina eningamthembiko uZimu! Mina no-Aroni sizonikhuphela amanzi edwaleneli.’ UMosisi wabetha idwala kabili ngentonga, kwaphuma amanzi amanengi edwaleni. Kwaba namanzi aneleko wokusela babantu boke neenlwana.

Kodwana uJehova wakwatele uMosisi no-Aroni. Uyazi bonyana kubayini? Kungombana uMosisi no-Aroni bathe ngibo ngokwabo abazokukhupha amanzi edwaleni. Kodwana bekunguJehova owakwenzako. Ngombana uMosisi no-Aroni akhenge bakhulume iqiniso malungana nalokhu, uJehova wathi uzobajezisa. UJehova wathi kibo: ‘Anizokubangenisa abantu bami eKanana.’

Msinyana ama-Israyeli atjhiya iKadeshi. Ngemva kwesikhatjhana afika eNtabeni iHori. U-Aroni wafela lapho phezu kwentaba. Wafa aneemnyaka eyi-123. Ama-Israyeli atlhuwa khulu, begodu boke abantu balilela u-Aroni amalanga ayi-30. Indodanakhe u-Eliyazare waba mpristi omkhulu olandelako wesitjhaba sama-Israyeli.

Numeri 20:1-13, 22-29; Duteronomi 29:5.



Iimbuzo

  • UJehova wawatlhogomela njani ama-Israyeli lokha nakasemangweni?
  • Anghonghoyila athini ama-Israyeli nekaseKadeshi?
  • UJehova wabanikela njani amanzi abantu bakhe neenlwana?
  • Nawuqala esithombenesi, ngubani indoda ezikhombako le, begodu kubayini yenza njalo?
  • Kubayini uJehova akwatela uMosisi no-Aroni, begodu bathola siphi isibetho?
  • Kwenzekani eNtabeni iHori, begodu ngubani owaba mpristi omkhulu wama-Israyeli?

Iimbuzo engezelelekileko

  • Funda uNumeri 20:1-13, 22-29 noDuteronomi 29:5.

    Khuyini esiyifundako endleleni uJehova atlhogomela ngayo ama-Israyeli emangweni? (Dut. 29:5; Mt. 6:31; Heb. 13:5; Jos. 1:17)

    UJehova wakuqala njani ukubhalelwa kwakaMosisi no-Aroni nakufanele bamcwengise phambi kwama-Israyeli? (Num. 20:12; 1 Kor. 10:12; ISamb. 4:11)

    Khuyini esingakufunda endleleni uMosisi amukela ngayo isiyalo esivela kuJehova? (Num. 12:3; 20:12, 27, 28; Dut. 32:4; Heb. 12:7-11)