Dlulela kokumunyethweko

Dlulela erhelweni elilandelako

Dlulela erhelweni leenhloko

AboFakazi BakaJehova

IsiNdebele

Incwadami Yeendaba ZeBhayibhili

Indaba 29: Okwabangela UMosisi Abaleke

Indaba 29: Okwabangela UMosisi Abaleke

QALA uMosisi uyabaleka eGibhide. Uyawabona amadoda amgjimisako la? Uyazi bona kubayini afuna ukubulala uMosisi? Akhe sibone bona singayithola ipendulo na.

UMosisi ubaleka iGibhide

UMosisi wakhulela endlini kaFaro umbusi weGibhide. Waba yindoda ehlakaniphileko begodu neqakathekileko. UMosisi bekazi bona akasuye umGibhide, kodwana ababelethi bakhe gade baziingqila ezima-Israyeli.

Langelinye nakaneemnyaka eyi-40 ubudala, uMosisi wakhamba wayokubona bona abantu bekhabo baphila bunjani. Beyibuhlungu indlela egade baphathwa ngayo. Wabona umGibhide abetha isigqila esim-Israyeli. UMosisi waqala ngapha nangapha, wabona kunganamuntu omqalileko, wabetha umGibhide wambulala. UMosisi wafihla isidumbu sakhe ehlabathini.

Ngelanga elilandelako uMosisi wakhamba wayokubona abantu bekhabo godu. Bekacabanga bona angabarhelebha bona bangasaba ziingqila. Kodwana wabona amadoda wama-Israyeli amabili alwa, ngalokho uMosisi wathi endodeni egade inephoso: ‘Kubayini ubetha umnakwenu?’

Indoda leyo yathi: ‘Ngubani okwenze umbusi nomgwebethu? Unqophe ukungibulala na njengombana wabulala umGibhide?’

Njeke uMosisi wasaba. Wabona bonyana abantu gade sele bazi ngalokho akwenzileko kumGibhide. Ngitjho noFaro wakuzwa lokho, begodu wathumela amadoda bonyana abulale uMosisi. Ngikho uMosisi kwafuneka abaleke eGibhide.

Lokha uMosisi nekakhambako eGibhide, waya kude khulu, enarheni yakwaMidiyani. Lapho wahlangana nomndeni kaJetiro, begodu watjhada nomunye wamadodakazi wakhe ibizo lakhe bekunguZiphora. UMosisi waba umalusi watlhogomela izimvu zakaJetiro. Wahlala enarhane yakwaMidiyani iimnyaka eyi-40. Nje, gade sele aneemnyaka eyi-80 ubudala. Langelinye, lokha uMosisi nekatlhogomela izimvu zaka- Jetiro, kwenzeka into erarako eyatjhintjha koke ukuphila kwakaMosisi. Akhe sibone bona yini into erarako leyo.

Eksodosi 2:11-25; IZenzo 7:22-29.



Iimbuzo

  • Wakhulela kuphi uMosisi,kodwana khuyini akwazi ngababelethi bakhe?
  • Khuyini lokho uMosisi akwenza lokha neka neemnyaka eyi-40 ubudala?
  • UMosisi wathini endodeni emIsrayeli egade ilwa, begodu indoda le yaphendula yathini?
  • Kubayini uMosisi abalekela iGibhide?
  • UMosisi wabalekela kuphi, begodu wahlangana nobani lapho?
  • Bekenzani uMosisi phakathi neemnyaka eyi-40 abalekile eGibhide?

Iimbuzo engezelelekileko

  • Funda u-Eksodosi 2:11-25.

    Namtjhana uMosisi afunda ngokuhlakanipha kwebe-Gibhide iimnyaka eminengi, uMosisi watjengisa njani bona uthembekile kuJehova nasebantwini bekhabo? (Eks. 2:11, 12; Heb. 11:24)

  • Funda Izenzo 7:22-29.

    Ngisiphi isifundo esingasifunda kuMosisi sokulinga ukutjhaphulula ama-Israyeli ngokwakhe ebugqilini beGibhide? (IZenzo 7:23-25; 1 Pit. 5:6, 10)