IsAmbulo 9:1-21

  • Ibhorompita yesihlanu (1-11)

  • Umaye munye udlulile, ababili bayeza (12)

  • Ibhorompita yesithandathu (13-21)

9  Ingilozi yesihlanu yabetha ibhorompitayo. Nje-ke ngabona ikwekwezi ewele ephasini ivela ezulwini, yanikelwa isilodlhelo somgodi onganamkhawulo.  Yavula umgodi onganamkhawulo, kwaphuma intuthu enjengeyomlilo omkhulu, ilanga nommoya kwenziwa kwaba mnyama yintuthu yomgodi loyo.  Kwaphuma iintethe entuthwini leyo zatjhinga ephasini, zanikelwa amandla, amandla afana nalawo abofezela bephasi abanawo.  Zatjelwa bona zingalimazi iimila zephasi namkha iintjalo ezihlaza namkha nanyana ngimuphi umuthi, kodwana zilimaze kwaphela labo abanganalo itshwayo lakaZimu eempandla zabo.  Iintethe zanikelwa bona zingababulali, kodwana zibahlunguphaze iinyanga ezihlanu, ukuhlunguphaza kwazo bekunjengokuhlunguphaza kwakafezela nakatinyela umuntu.  Emihleni leyo abantu bazokufuna ukufa kodwana angekhe bakufumane, bazokululukela ngamandla ukufa, kodwana ukufa kuzobabalekela.  Ngokuqaleka iintethe bezifana neenjomani ezilungiselelwe ipi; eenhloko zazo bekunokuthileko okufana neenhlohlo zegolide, ubuso bazo bebunjengobuso babantu,  iinhluthu zazo bezifana nezabafazi. Amazinyo wazo bewanjengewamabhubezi,  begodu bezineemvikelo zesifuba ezinjengezesimbi. Itjhada lamaphikwazo belinjengetjhada leenkarana ezidoswa ziinjomani ezigijimela epini. 10  Godu imisilazo itinyela njengabofezela, begodu emisilenazo zinamandla wokulimaza abantu iinyanga ezihlanu. 11  Zinekosi phezu kwazo, ingilozi yomgodi onganamkhawulo. NgesiHebheru ibizo layo ngu-Abadoni,* kodwana ngesiGirigi ibizo layo ngu-Apholiyoni.* 12  Umaye munye udlulile. Qala! Abanye abomaye ababili bayeza ngemva kwezintwezi. 13  Ingilozi yesithandathu yabetha ibhorompitayo. Ngezwa ilizwi linye livela eempondweni ze-aldara legolide eliphambi kwakaZimu 14  lithi engilozini yesithandathu ephethe ibhorompita: “Tjhaphulula iingilozi ezine ezibotjhwe emlanjeni omkhulu iYufrathe.” 15  Iingilozi ezine ebezilungiselelwe i-iri nelanga nenyanga nomnyaka zatjhatjhululwa bona zibulale ingcenye yesithathu yabantu. 16  Isibalo samabutho akhwele iinjomani besizi-20 000 eziphindwe nge-10 000;* ngasizwa isibalo sawo. 17  Nasi indlela engazibona zingayo iinjomani embonweni nalabo abazikhweleko: Bebaneemvikelo zesifuba ezibomvu njengomlilo, ezihlaza kwesibhakabhaka nezisarulana njengesibabuli, iinhloko zeenjomani bezinjengeenhloko zamabhubezi, emilonyenazo bekuphuma umlilo, intuthu nesibabuli. 18  Ingcenye yesithathu yabantu yabulawa ziimbetho ezintathwezi, ngomlilo nentuthu nesibabuli esiphume emilonyenazo. 19  Ngombana amandla weenjomanezi asemlonyeni nemisilenazo, ngombana imisilazo injengeenyoka begodu ineenhloko, imisila le ngiyo ezilimaza ngayo. 20  Kodwana abantu abaseleko abangakhenge babulawe ziimbethwezi akhenge batjhuguluke emisebenzini yezenzo zabo; akhenge balise ukulotjha amadimoni neenthombe zegolide, zesiliva, zekhopha, zelitje nezekhuni, ezingakghoni ukubona, ukuzwa namkha ukukhamba. 21  Akhenge batjhuguluke ekubulaleni kwabo, ekwenzeni izinto zobungoma, ekwenzeni izenzo zomseme ezisisono* nekwebeni.

Imitlolo Ephasi

sAm 9:11  Okutjho ukuthi “ukutjhatjalaliswa.”
sAm 9:11  Okutjho ukuthi “Umtjhabalalisi.”
sAm 9:16  Kutjho, 200 000 000.
sAm 9:21  NgesiGirigi yi-por·neiʹa. Qala Ihlathululo.