IsAmbulo 5:1-14

  • Umsongo onamatshwayo alikhomba (1-5)

  • IMvana ithatha umsongo (6-8)

  • IMvana iyakufanelekela ukuvula amatshwayo (9-14)

5  Ngabona ngesandleni sokudla saloyo ohlezi esihlalweni sobukhosi umsongo otlolwe mahlangothi womabili,* uvalwe waqiniswa ngamatshwayo alikhomba.  Godu ngabona ingilozi enamandla irhuwelela ngelizwi elinamandla ithi: “Ngubani ofanelekela ukuvula umsongo namatshwayo wawo?”  Akakho namunye ezulwini namkha ephasini namkha ngaphasi kwephasi owakghona ukuvula umsongo namkha ukubona ngaphakathi kwawo.  Ngalila khulu ngombana akakho owafunyanwa afanelekela ukuvula umsongo namkha ukubona ngaphakathi kwawo.  Kodwana omunye wabadala wathi kimi: “Lisa ukulila. Qala! IBhubezi lekoro yakwaJuda, umrabhu kaDavida, lihlulile bona livule umsongo namatshwayo wawo alikhomba.”  Godu ngabona kujame hlangana nesihlalo sobukhosi neembunjwa ezine eziphilako nahlangana kwabadala imvana ebeyibonakala ngasuthi ihlatjiwe, ineempondo ezilikhomba namehlo alikhomba, begodu amehlo atjho imimoya elikhomba kaZimu ethunyelwe ephasini loke.  Ngaphandle kokuriyada yeza yawuthatha esandleni sokudla saloyo ohlezi esihlalweni sobukhosi.  Nayithatha umsongo, iimbunjwa ezine eziphilako nabadala abama-24 baguqa phambi kweMvana, ngamunye aphethe isidonodono nezitja zegolide ebezizele ipepho. (Ipepho itjho imithandazo yabacwengileko.)  Babhina ingoma etja, bathi: “Uyakufanelekela ukuthatha umsongo nokuvula amatshwayo wawo, ngombana wahlatjwa begodu ngeengazi zakho wathengela uZimu abantu kizo zoke iinkoro, amalimi, abantu neentjhaba, 10  wabenza baba mbuso nabaphristi kuZimethu, begodu bazokubusa njengamakhosi phezu kwephasi.” 11  Godu ngabona, begodu ngezwa ilizwi leengilozi ezinengi ezibhode isihlalo sobukhosi neembunjwa eziphilako nabadala, begodu isibalo sazo besimatjhumi weenkulungwana eziphindwe ngamatjhumi weenkulungwana neenkulungwana zeenkulungwana, 12  bezithi ngelizwi elikhulu: “IMvana eyahlatjwako iyakufanelekela ukwamukela ilawulo, ubunjinga, ukuhlakanipha, amandla, idumo, iphazimulo nesibusiso.” 13  Ngezwa godu zoke iimbunjwa ezisezulwini nezisephasini nangaphasi kwephasi neziselwandle, nazo zoke izinto ezikizo, zithi: “Kiloyo ohlezi esihlalweni sakhe sobukhosi neMvaneni akube sibusiso, idumo, iphazimulo namandla bekube phakade naphakade.” 14  Iimbunjwa ezine eziphilako bezithi: “Amen!” Nabadala baguqa balotjha.

Imitlolo Ephasi

sAm 5:1  NgesiGirigi “ngaphakathi nangaphandle.”