Dlulela kokumunyethweko

Dlulela erhelweni elilandelako

Dlulela erhelweni leenhloko

AboFakazi BakaJehova

IsiNdebele

IsiThala (Esifundwa Ebandleni)  |  Oktoba 2012

IsiKhuthazo ‘EsiVela EMlonyeni WabaNtwana’

IsiKhuthazo ‘EsiVela EMlonyeni WabaNtwana’

NgoDisemba 2009, iKhotho ePhakemeko yeRussia yakhipha isiqunto sokobana kuvalwe ihlangano yekolo yendawo yaboFakazi bakaJehova eTaganrog, eRussia, kuthathwe iWolo lomBuso kwamemezelwa nokobana iincwadi zethu ezi-34 ziyeqisa. Isehlakalo esithusakwesi safakwa kunZinzolwazi esemthethweni yaboFakazi bakaJehova neenthombe zaboFakazi abathintwa siquntweso, kuhlanganise nabantwana.

Abantwana be-Australia

Iinyanga ezimbalwa ngemva kwalokho, iGatja eliNqophisako laboFakazi bakaJehova eRussia lafumana ibhoksi nencwadi elandelako evela emndenini waboFakazi eQueensland, e-Australia, owabona umbiko wesiqunto seKhotho: “Banakwethu abathandekako, Abantwabethu uCody noLarissa, libathinte khulu ikholo neenlingo zabangani abaseRussia. Batlole amakarada neencwadi, begodu senze izipho ezincazana esingathanda ukuzithumela ebantwaneni beTaganrog, ukubazisa bona kude le, kunabanye abantwana abakhonza uJehova ngokuthembeka abacabanga ngabo. Babathumela ithando labo elikhulu.”

Ngemva kokufumana iziphwezi, abantwana beTaganrog batlolela umndeni we-Australia iincwadi zokuthokoza ezidwebiweko. Atjhukunyiswa mamezwi wesikhuthazo avela ‘emlonyeni wabantwana,’ uFakazi okhonza egatjeni leRussia watlolela uCody noLarissa wathi: “Ningacabanga bona kubuhlungu kangangani kokubili ngabantwana nangabantu abadala nebajeziselwa into abangakayenzi. Abanakwethu nabodade beTaganrog abakenzi litho elimbi, kodwana bathathelwe iWolo lomBuso labo. Lokhu kubadanise khulu. Kuzobakhuthaza kwamambala ukwazi bona kunabathileko kwenye ingcenye yephasi abacabanga ngabo. Siyanithokoza khulu ngomoyenu omuhle wokupha!”—Rha. 8:2.

Abantwana beRussia abamukela izipho ezivela ebantwaneni be-Australia

Kwamambala siyingcenye yobuzalwana bephasi loke, begodu ithando lethu ngomunye nomunye lisisiza bona siqalane neenlingo neentjhijilo zokuphila. Emakhotho nekuphikiswana ngokobana iincwadi zaboFakazi bakaJehova zikhuthaza ihloyo, abantwana bethu babonisa buthule indlela abakhathalela ngayo ihlalakuhle yabanye, beqe ngale kwemikhawulo yobutjhaba namasiko batjengise bona aliqiniso amezwi kaJesu athi: “Nanithandanako, boke abantu bazakwazi bona nibafundi bami.”—Jwa. 13:35.