Kanganaya emyatsi eyirimo

Kanganaya emyatsi eyirimo

 OMWATSI W’ERIGHA 33

Erilubuka likakanganaya olwanzo, amenge, n’omutima w’erilindirira wa Yehova

Erilubuka likakanganaya olwanzo, amenge, n’omutima w’erilindirira wa Yehova

“Hasyabya erilubuka.”​—EMIB. 24:15.

OLWIMBO 151 Akasyabirikira

EBIKANDIKANIBWAKO *

1. Busananaki Yehova mwahangyika engebe?

MUHANABYA omughulu Yehova abya iyuwene. Aliwe mwatayowa inyali omo mbwera. Eribya n’obutseme, syabya alaghire oko mundu w’osi w’osi. Aliwe oMungu mwanza n’abandi nabo batsemere engebe. Olwanzo mulwaleka Yehova inyatsuka eribumba.​—Esy. 36:9; 1 Yoa. 4:19.

2. Omughulu Yehova abumba ebindi bindu, Yesu n’abamalaika mubayowa bati?

2 Oko nzuko, Yehova mwabumba mughala wiwe ye Yesu. Neryo erilabira Akambere kiwe, “ebindu byosi mubyabumbwa,” erihirako amamilioni w’ebihangyikwa by’amenge by’obunya-kirimu. (Kol. 1:16) Yesu mwatsema kutsibu erikola haghuma na Tata wiwe. (Emi. 8:30) Kandi n’abaghala b’oMungu abamalaika kutya nabo mubatsema. Omughulu Yehova n’Omukoli wiwe Mukulu bahangika olubula n’ekihugho, abamalaika babya ibanalangire. Abamalaika mubakolaki? “Mobuta obogo” busana n’obutseme. Kandi ahate n’eritika-tika mubalola emebere eritsemera obuli kihangyikwa kya Yehova kutsibu-tsibu abandu (Yobu 38:7; Emi. 8:31) Obuli kihangyikwa kikakanganaya ngoko Yehova awite olwanzo n’amenge.​—Esy. 104:24; Rom. 1:20.

3. Ngoko kikanganibye omo 1 Abanya Korinto 15:21, 22, embanulo ya Yesu yikaleka mwatsi wahi inyatokekana?

3 Yehova abyanzire abandu ib’ikala oko kihugho kibuya ibanatsemire kera na kera. Aliwe, omughulu Adamu na Eva bayisamambula oko Tata wabo w’olwanzo, erilolo n’oluholo mubyahika oko kihugho. (Rom. 5:12) Yehova mwakolaki? Aho-naho, mwatsuka erilengekania ngoko akandilamia abandu. (Enz. 3:15) Yehova mwateghekania embanulo busana n’erisabula abana ba Adamu b’omo lilolo n’oluholo. Neryo aho, kyangatokekene Yehova  inyaha engebe y’erikota oko buli mundu oyukasombola erimukolera.​—Yoa. 3:16; Rom. 6:23; Soma 1 Abanya Korinto 15:21, 22.

4. Ni mabulyo wahi agho tukanditsopolya omo mwatsi ono?

4 Hali mabulyo mangyi agho twangayibulya busana n’omulaghe wa Yehova ow’erilubukya abaholi. Ng’amabulyo ano: Erilubuka lyasyabya liti mbino? Omughulu abandu obo twabya twasi bakasyalubuka, tunemwendisyaminyabo kwehi? Erilubuka likasyatuletera obutseme bwahi? Kandi erilubuka likatukangirirayaki oko lwanzo lwa Yehova, amenge wiwe n’omutima wiwe w’erilindirira? Muleke tutsopolaye obuli ribulyo ry’oko mabulyo ayo.

ERILUBUKA LYASYABYA LITI MBINO?

5. Busanaki twikirirye ngoko Yehova syendisyalubukirya abaholi b’okughumerera?

5 Omughulu Yehova akasyalubukya amamilioni w’abandu erilabira mughala wiwe, alinga sy’endisyabalubukirya oko katambi kaghumerera. Busanaki? Kundi abandu ng’abo bamabilubasira kughumerera oko kihugho, ekyo ikyanganaleka emyatsi iyatatondekana kukyo ko ndeke. Kandi Yehova syalyatakola omwatsi n’omughuma omo nzira eyitatondekire. Anasi ngoko obuholo eribyaho oko mughulu muli, ritolere emyatsi iyatondekana ndeke. (1 Kor. 14:33) Omughulu Yehova abya akakola na Yesu akateghekanirya abandu b’ekihugho, Yehova abya w’amenge kandi ow’omutima w’erilindirira. Omo Butabali bw’iwe obw’emyaka elfu moya, Yesu akasyakangania emibere mighumerera eyo, akakola haguma n’abakasyasabuka oko Armagedoni bakateghekanirya ekihugho abakasyalubuka.

Abakasyasabuka amalwa we Armagedoni bakasyakangirirya obwami b’oMungu n’ebyalayiro bya Yehova oko abakasyalubuka (Lebaya enungu 6) *

6. Ngoko kiri omo Emibírí y’Abakwenda 24:15, abakasyalubukibawa mukasyabya n’abahi?

6 Eky’omughaso munene omo byosi, abakandisyasabuka oko Armagedoni bakasyawatikya abakasya lubuka eribakangirirya oko Bwami  b’oMungu n’ebighenderwako biwe. Busanaki? Kusangwa abangyi b’oko abakasyalubukibawa mukasyabya abo eBiblia yikahula mo “abatatunganene.” (Soma Emibírí y’Abakwenda 24:15.) Kikendisyatolera ibakola esyombinduka nyingyi imubabana emiyisa eyikasira omo mbanulo ya Yesu, kandi n’eribyaho kera na kera. Telilengekania oko mubírí munene ow’erikangirirya ekwenene oko mamilioni w’abandu abatasi ekyosi-kyosi oko Yehova owakendisyakolwa! B’anemwendisyakangiriribwa mo mughuma-mughuma ngoko tukanasondola amafunzo w’eBiblia munabwire? Banemwendisyaghabirwa omo sy’ondeko, n’eribegheribya eriwatikya abakandisyalubuka enyuma syabyo? Tukasya minyirayo. Aliwe, tunasi ngoko oko mwiso w’oButabali bwa Kristo bw’emyaka elfu moya, ‘ekihugho kyasyusulamo eriminya lya Yehova.’ (Isa. 11:9) Tukasyayira omubírí munene owakatsemesaya omo Butabali bw’emyaka elfu moya!

7. Busanaki abandu b’oMungu bakasyabya n’amalengekania maghuma bakakangirirya abakasyalubuka?

7 Omo Butabali bwa Yesu obw’emyaka elfu, abana ba Yehova bosi ab’omo kihugho bakandisyalola embere erikola esyombinduka batoke eritsemesya Yehova. Neryo abosi bakasyabya n’amalengekania maghuma bakawatikya abakasyalubuka erilekana n’emitsye mibi yabo n’erikolesya ebihano bya Yehova. (1 Pet. 3:8) Ahate n’eritika-tika abakasyalubukibawa, bakasyayiunga n’abandu ba Yehova abakayikehaya, abakasyabya nabo ‘ibakina berereraya erilama’ lyabo.​—Flp. 2:12.

TUNEMWENDISYAMINYA ABAKASYALUBUKA KWEHI?

8-9. Busanaki twanganabugha tuti abakasyakokaya abakasyalubuka bakasyaminya abanzwa babo?

8 Hali myatsi mingyi eyikaleka itwikirirya ngoko abakasyakokaya abakasyalubuka, bakasyaminya abanzwa babo. Tulebaye emyatsi ibiri ya kuyo. Ow’erimbere, erikwamana ngoko Yehova akola omughulu alubukaya abandi bandu bo kera, kitokekene omughulu akasyabumba abandu buhya buhya, bakasyalangirika, n’eribugha, n’erilengekania ngoko banabya biro bike embere sy’oluholo lwabo. W’ibuke ngoko Yesu mwasosekania oluholo ng’otughotseri, n’erilubuka ng’erilua omo tughotsiri. (Mat. 9:18, 24; Yoa. 11:11-13) Omughulu omundu akalua omo bughotseri akasosa ngoko analwe embere aghotsere, kandi akasubira amalengekania awanalue nagho. Tukanaye oko eky’erileberyako kya Lazaro. Mwabugha biro bini inyanaholire, neryo omubiri wiwe abya inyabiritsuka eritsanda. Kwenene, omughulu Yesu amulubukaya, abali babo mubalubamuminya, na Lazaro mwalunyabaminya.​—Yoa. 11:38-44; 12:1, 2.

9 Tulangire omwatsi w’akabiri. Yehova akalagha ngoko omo Butabali bwa Kristo, sihendisyabya omundu oyukabugha ati “nyilwere.” (Isa. 33:24; Rom. 6:7) Neryo abakasyalubukibawa, bakasyabumbawa buhya-buhya n’emibiri eyitemo obukoni. Aliwe, sibandisyalubahika-hikana. Bamabisyalubukibwa ibanahika-hikene, alinga abandu b’omo kihanda kyabo n’abira babo isibandiminyabo. Alinga abandu bakandisyahika-hikana bolo-bolo omo Butabali bw’emyaka elfu bwa Yesu. Obutabali bw’emyaka elfu bwabihwa, Yesu akasyasubuliraya Tata wiwe Obwami. Neryo oBwami bukandisyabya ibwamabiberererya emibírí yabo yosi erihirako n’erikolya abandu b’okwihika-hikana.​—1 Kor. 15:25-28; Erib. 20:1-3.

ERILUBUKA LIKASYATULETERA OBUTSEME BWAHI?

10. Erilubuka likasyaleka iwayowa uti?

10 Telilengekania ngukasyayowa wuti ukatasyaramukya abanzwa baghu. Obutseme bwaghu bukasyakuletera amaseka kutse ekiriro?  Obutseme obo bunemwendisyakukuna erimbira Yehova n’erimupipa? Tukandisyanza kutsibu Tata wetu oyututsomene na mughala wiwe, abakasyaleka erilubuka ilyatokekana.

11. Erikwamana n’ebinywa bya Yesu ebiri omo Yoane 5:28, 29, bikasyabya biti oko bandu abakandisyakolesya esyokanuni sya Yehova esitunganene?

11 Telilengekania oko butseme obo abakasyalubuka bakasyabya nabo bakabindula emibere yabo ya kera n’erikolesya esyokanuni sy’oMungu esitunganene. Abakasyasuba oko mibere, bakasyalighirawa erisighala omo Paradiso kera na kera. Aliwe, oMungu syandisyalighira abatendisyasuba oko mibere erilola embere eritsambya-tsambya obuholo omo Paradiso​—Isa. 65:20; soma Yoane 5:28, 29.

12. Abosi abakandis’ikala oko kihugho bakasyatsumulawa bati na Yehova?

12 Abandu abakasyatabalawa n’oBwami b’oMungu bakasyalighirana n’ebinywa ebiri omo Emisyo 10:22 ebikabugha biti: ‘Omuyisa wa Yehova akaleta obutseme, naye syalitomeka obulighe okugho.’ Erilabira obuwatikya by’ekirimu kibuyirire, abandu b’oMungu bakasyabya bateke bunya-kirimu kandi bolo-bolo bakasyabya nga Kristo erilola embere erihikana. (Yoa. 13:15-17; Efe. 4:23, 24) Obuli kiro emibiri yabo yasyalolya embere erikalakala kandi basyabya bandu ab’uwene. Ka yikasyabya ngebe eyirimo obutseme! (Yobu 33:25) Nikwa erilengekania okw’ilubuka lyanganakuwatikya liti lino?

TUKIGHA KYAHI OKO LWANZO LWA YEHOVA?

13. Erisako ry’ Esyonyimbo 139:1-4, likakanganaya liti ngoko Yehova asi ndeke obuli mughuma w’okwitwe?

13 Ngoko tunalyalangira, umughulu Yehova akasyalubukaya abandu, bakasyabya n’amalengekania awo banabya nagho kandi bakasyabya ngoko banabya. Telilengekania nga bikasyabya biti! Yehova akwanzire kutsibu neryo anasi ebyosi ebyo ukalengekanaya, ebyo ukabugha, n’ebyo ukakola kandi ngoko ukayowa. Neryo amabikulubukya, isyangataluka na hake erikusubulirya amalengekania n’emibere yaghu, n’erikusubya ngoko wanabya. Omwami Dawidi mwayilangirira ngoko Yehova asi ndeke obuli mughuma w’okwitwe. (Soma Esyonyimbo 139:1-4.) Eriminya ngoko Yehova asi ndeke obuli mughuma w’okwitwe kikaleka itwayowa tuti lino?

14. Omughulu tukalengekanaya ngoko Yehova asi ndeke obuli mughuma w’okwitwe tukayowa tuti?

14 Omughulu tukalengekanaya ngoko Yehova atwasi ndeke itwe bosi, silitolere itwabya n’obuba. Busanaki? W’ibuke ngoko Yehova atutsomene kutsibu. Akalangira obuli mughuma w’okwitwe mo w’obughuli embere siwe. Akayiteghereraya ebyosi ebyo twabirilabamo omo ngebe yetu, ebikaleka itwabya ngoko tuli. Ka kikasikaya mutima! Silitolere itwayowa n’ahake nga tuli itw’ibene. Mughulu wosi Yehova akabya inyane netu akalangira ng’akendituwatikya ati.​—2 Emy. 16:9.

TSEMERA AMENGE WA YEHOVA

15. Erilubuka likakanganaya liti amenge wa Yehova?

15 Erisagha oluholo nikyamano ky’amalwa ekikalire. Abandu abakasondolawa na Sitani bakakolesaya obuba obo erikuna abandu erikola emyatsi eyo banasi ndeke ngoko siyuwene kutse n’erighana abira babo. Aliwe itwe, obuba obo sibwangatuyira kindu. Tunasi ngoko esyonzighu syetu syamatwita, Yehova inyakasyatulubukya. (Erib. 2:10) Tunasi ngoko sihali ekindu kyosi-kyosi ekyo bangakola ekyatatughaba na Yehova. (Rom. 8:35-39) Yehova abirikangania ngoko awite amenge manene erituha amaha w’erilubuka! Amaha ayo akatuwatikaya eritendyubaha omughulu abandu abakasondolawa na Sitani bakabugha bati bakenditwitwa twamatendikola ebyo bakabugha, kandi akaleka itwabya n’obutubaha n’erisighala bataleghula oko Yehova.

Eriyisogha lyaghu likanakanganaya ngoko uli n’erikirirya omo kyalaghiro kya Yehova eky’erikuha ebyo ulayireko? (Lebaya enungu 16) *

16. Nimabulyo wahi owo utolere iwayibulya, kandi erisubirya lyaghu oko mabulyo ayo lyangakuwatikya liti eriminya nga uyiketere Yehova omo lulengo lwahi?

 16 Esyonzighu sya Yehova syamak’ubahya siti sikendikwita, un’ikirirye ngoko Yehova inyakendisyakulubukya kwehi? Wanganaminya uti ngo wanganayiketera Yehova omo mughulu ng’oyo? Enzira nguma eyangakuwatikya ry’eriyibulya uti: ‘Eriyisogha lyaye omo miatsi mike-mike obuli kiro, likanakanganaya ngoko niyiketere Yehova kwehi?’ (Luka 16:10) N’erindi ribulyo lyalino: ‘Ngoko ngakolesaya endambi n’esyofranga syaghe kikanakanganaya ko niyiketere omulaghe wa Yehova w’eriniha ebyo nilaghireko namahira oBwami bwiwe by’embere?’ (Mat. 6:31-33) Wamasubirya oko mabulyo abiri ayo uti inga, aho ighuyiketere Yehova kwenene, kandi unayiteghekire erikinda obuli mwatsi owangakuhikira omo biro ebikasa.​—Emi. 3:5, 6.

SIMA YEHOVA BUSANA N’OMUTIMA WIWE W’ERILINDIRIRA

17. (a) Erilubuka likakanganaya liti omutima wa Yehova w’erilindirira? (b) Twangakangania tuti Yehova y’erisima lyetu busana n’omutima wiwe w’erilindilira?

17 Yehova abirihiraho ekiro n’endambi eyeribughaho ekihugho kibi kino. (Mat. 24:36) Syandisyaluha erilindirira endambi eyo. Ali n’omuhwa munene w’erilubukya abaholi, anamulindirira endambi eyo. (Yobu 14:14, 15) Anemulindilira endambi yihike alubukayebo. (Yoa. 5:28) Tuwite emyatsi mingyi eyikaleka itwasima Yehova busana n’omutima wiwe w’erilindirira. Talengekania oko kino: Busana n’omutima w’erilindirira wa Yehova, abandu bangyi, netu ituneko, babiri bana akanya ‘ky’eribindula emitima yabo.’ (2 Pet. 3:9) Yehova anzire abandu bosi kyamatokekana ibabana engebe y’erikota. Neryo, tutolere itwamusima busana n’omutima wiwe w’erilindirira. Tuti? Tukayikasa kutsibu erisondya abandu “abayisoghawa busana n’engebe y’erikota” n’eribawatikya eryanza Yehova kandi n’erimukolera. (Emib. 13:48) Neryo, n’abo ibakandibana endundi busana n’omutima wa Yehova w’erilindirira ng’atwe.

18. Busanaki kitolere itwakangania omutima w’erilindirira oko bandi?

18 Yehova akasyakanganaya omutima w’erilindirira erihika oko nduli y’emyaka elfu moya imwatughanza mo abahika-hikene. Erihika oko ndambi eyo, Yehova akasyabya inyanemughanyira amalolo wetu. Kwenene, tutolere itwakwama eky’erileberyako kiwe, itwabya tukalangira emibere eyuwene eyabandi n’eribakangania omutima w’erilindirira. Tulangire  eky’erileberyako kya mwali wetu oyo omulume wiwe mwabya n’erihangya-hangya erikalire, neryo mumbya n’eriya oko mihindano. Akabugha ati: “Ekyo mukyaniletera amaligho manene. Engebe yaghe muyabinduka kitsumbukirania kandi mututasyakola emyatsi eyo twabya itwabiriyisogha erikola.” Mwali wetu mwalola embere erikangania olwanzo n’omutima w’erilindirira oko mulume wiwe. Mwayiketera Yehova kandi mwatalwika. Nga Yehova, mwali wetu mwatahira amalengekania oko maligho wiwe, aliwe mwalola embere erilangira ebibuya oko mwira wiwe. Akabugha ati, “Omulume waghe awite emibere mibuya, kandi anemuyikasa bolo-bolo atoke erikinda erihangya-hangya liwe.” Ni ky’omughaso kundu erikangania omutima w’erilindirira oko bandu b’ekihanda kyetu, n’oko baghala n’abali betu abakalaba omo myatsi eyikalire.

19. Wamayisogha erikolaki?

19 Yesu n’abamalaika mubatsema omughulu ekihugho kyatsuka erihangikwa. Neryo terilengekania obutseme obo bakasyabya nabo bakalangira ekihugho kikusulamo abandu abahika-hikene, abanzire Yehova kandi abakamukolera. Terilengekania obutseme obo abakasyatabala na Yesu bakasyabya nabo bakalangira abandu bakabana emiyisa omo kasi kabo. (Erib. 4:4, 9-11; 5:9, 10) Kandi terilengekania ngoko emisonia y’amaghali yikasyabinduka mo misonia y’obutseme kandi omughulu eryaghalwa n’erisusumana siryendisyabya. (Erib. 21:4) Tukalindirira emiyisa eyo, tuyisoghe kundu erigha Tata wetu ow’olwanzo, w’amenge, kandi n’ow’omutima w’erilindirira. (Yak. 1:2-4) Wamabikola utya, isiwangaherya obutseme bwaghu n’omo erilengwako ryanganakuhikira. Tutsemire kundu busana n’omulaghe wa Yehova ono: “Hasiabya erilubuka”!​—Emib. 24:15.

OLWIMBO 141 Ekitiko-tiko ky’engebe

^ par. 5 Yehova ni Tata w’amenge, w’olwanzo kandi ow’omutima w’erilindirira. Twanganalangira emibere yosi eyo tukayiteghererya ngoko ahangyika ebindu byosi kandi n’omulaghe wiwe w’erilubukya abaholi. Omo mwatsi ono, tukendikania oko mabulyo agho twanganayibulya okwilubuka, kandi akanditukangya ngoko twangasima Yehova busana n’olwanzo lwiwe, amenge w’iwe n’omutima wiwe w’erilindirira.

^ par. 58 ERIKANIA OKO SYOPITSA: Omuamerika embutirwa ye India oyuwahola hamabihwa emyaka mingyi amabilubuka omo Butabali bwa Yesu by’emyaka elfu moya. Mughala wetu oy’ulyasabuka oko malwa we Armagedoni anamukangirirya n’obutseme omulume oy’ulyalubuka eky’angakola atoke eribana emiyisa erilabira embanulo ya Yesu.

^ par. 60 ERIKANIA OKO SYOPITSA: Mughala wetu anamubwira omupatiro wiwe ati, hali ebiro ebyate angakolamo omubírí enyuma sy’esyosaha sy’omubírí. Anemubwira omupatiro wiwe oyo ati, omo righolo-gholo ringyi akateghekanaya emyatsi ey’obunya-kirimu. Nomo kine kitya, mughala wetu oyo akanaligha erikola akasi enyuma sy’esyosaha sy’omubírí.