• Ithumna mirinhi khina da khuirakhala? (1) nao khuikatā? (1)
  • Christianbingna āthumhi ka̱lā kashi mashokhavai ningngaserda ot saya kachi kāthāda theingasakhala? (2)
  • Sā sākathathi yonla? (3)
  • Mirinli khayākashi makhalei otsakbing chi khimameikhala? (4)
  • Āsheewui maramli varewui ain kathāda leikhala? (5)
  • Hāngda khalei hili āshee kakāpwui maramla zanglā? (6)

1 Jehovah kharingawui urana. Okthuida khalei saikora āthumwui kharing pangshap varivarāwuili lei. (Laa 36:9) Mirinhi varewuili katharana. Mapharārang kaja ava̱wui wuklungli khalei nao eina tangda -varivarāwuili āman saklāk kahaina. -Masākapaiwuivāngna da ava̱wui wuklungli haksangda khalei āngāngnao ākha khuitākahaihi varewui mangāli yonlāk kahaina.—Shongza 21:22, 23; Laa 127:3.

Vareli ningyāng ungkhavai ithum āshee makhuiphalungmara, makathara otli masāmasuiphalungmara kala maram machāla kakhanang samkaphang hikathā hila masāphalungmara

2 Khamashung Christianbinga ka̱la kashi mashok khavai ning ngasharda ot sai. Āthumva āthumna singda khalei gari kala pamvaida khalei shim kathā hi ka̱la kashi malei khavai ning ngaserlāk eina sai. (Khalatlui 22:8) Varewui otram khangatha̱bing phasāwui ringphākhavaivāng māngwui eina khalatta ka̱la shikapai ot kathāhi masamana. Chiwuivāng eina āthuma mili sāza̱kapai zakshilāk kahai khangareo kathā hili mazangmana. Āthumva khangashao otli kakatoma khangareo-lumshilao kathā hila masāmana.—Laa 11:5; John 13:35.

3 Sāyurbing hila kasā ākhavāwuili katharana. Christian ākhana kashak-kazā kala kashan-kachonwuivāng maningakha kazāt kala ka̱la shikapaiwui eina ngākshok khavaivāng sā sāthatpai. (Haokaphok 3:21; 9:3; Shongza 21:28) Kha khangareo -maningakha phasāwui ringphākhavai sāda -sāyurbingli sāshida kasā hi mamashungmana.—Chansam 12:10.

4 Meikachi kashei, kowāthei kashai kala phasā ringphākhavai āri kashai hikathathā hi Christianbingwui maningmana. Hikathā otsakbinghi mamashungmana marama (1) hibing hina ithumli rao sāngsaka (2) hibing hina ithumwui phasā simān ngasaka kala (3) hibing hi khamakhaowa ot serra. (Rome 6:19; 12:1; 2 Corinth 7:1) Sāmasuikahai ot hi chihohaokida saklāka. Kha Jehovahli ningyāng ungkhavai ithum hikathā otbinghi masāphalungmara.

5 Ashee hila varewuili katharana. Biblena hānga chiya manglā maningakha kharingwui pangshaphi āsheewuili lei. Chiwui vāng eina āshee mathāda mashokla kathi sā kashai hila mamashungmana. Ashee mashokla kathi sā maningakha khalenli manlaga thihairakasā hila mashaiphalungmara. Kazeina tokathat maningakha naomei eina kāpkathat hila shaikhavaivāngna chiākha ngalāngda khaina reolaga ashee shokngasakphalungra.—Haokaphok 9:3, 4; Pāngmonshi 17:13, 14; Otsak 15:28, 29.

6 Āshee kakāphi yonlā? Phaningunglu kaja Jehovahna ithumli āshee makhuiluda hānghaida lei. Hiwui kakhalatta -ithumwui phasāli mi khangateiwui āshee maningākha masāwui eina khuishoklaga haikasā āsheeranu kachi kathā āpong ākha eina kalikha masangpailākmara kachina. (Otsak 21:25) Hithādasāda khamashung Christianbinga āshee kakhui hi masāphalungmara. Khangatei āpong eina kazāt khangahā kaja ashee makhaninga ākhana āsheewui mahut sāda kakāp hikathā hiya sāpai. Āthumla ringngaiya, kha ringkhavaivāngda vareiwui ain sākakhai hiya masāphalungki kachina.—Mathew 16:25.