Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 115

Ko e Parataiso Foou he Lalolagi

Ko e Parataiso Foou he Lalolagi

ONOONO la ke he tau akau loloa, tau fiti fulufuluola mo e tau mouga tokoluga nā. Fulufuluola mitaki nakai a ē? Kitia la e aila kua kai mai he alolima he tama taane tote. Ti ono foki ke he tau leona mo e tau nua ne tutū i kunā he fonua. Fia manako nakai a koe ke nofo he fale ne toka he matakavi tuga a ē?

Manako e Atua ki a koe ke moui tukulagi he lalolagi parataiso. Ti nakai manako a ia ki a koe ke mamahi mo e uhu tuga e tau tagata kua matematekelea he vahā nei. Ko e maveheaga anei he Tohi Tapu ki a lautolu ka momoui he parataiso foou: ‘To fakalataha e Atua mo lautolu. To nakai fai mate po ke tagi po ke mamahi. Ha kua mole atu e tau mena fakamua.’

To eketaha a Iesu ke fakahoko e hikiaga ofoofogia nei. Iloa nakai e koe ko e magaaho fe? E, ka mole e holoholo kehe e ia e lalolagi he tau mena kelea oti kana mo e tau tagata kelea. Manatu, he magaaho ne nofo a Iesu he lalolagi ne fakamalolō e ia e tau tagata ne lauia he tau vahega gagao oti, ti liu fakatutū mai foki e ia e tau tagata mamate. Ne taute e Iesu e mena nei ke fakakite e mena ka taute e ia ke he lalolagi katoa ka eke a ia mo Patuiki he kautu he Atua.

Manamanatu la ke he lahi he monuina ofoofogia ka nonofo ke he parataiso foou he lalolagi! Ko Iesu mo e falu kua fifili e ia, ka pule i luga he lagi. To leveki he tau pule nei e tau tagata oti kana he lalolagi mo e eketaha ke fiafia a lautolu. O mai la ke kumikumi e mena ha tautolu kua lata ke taute ke iloa mooli to foaki mai he Atua ki a tautolu e moui tukulagi he parataiso foou haana.