Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 116

Puhala kua Maeke ia Tautolu ke Moui Tukulagi

Puhala kua Maeke ia Tautolu ke Moui Tukulagi

ILOA nakai e koe ko e heigoa he tama fifine tote mo e tau kapitiga haana kua totou? E, ko e tohi nei hane totou e koe​—Tohi Haaku he Tau Tala Tohi Tapu. Ti kua totou foki a lautolu he tala ia kua totou ai e koe​—“Puhala kua Maeke ia Tautolu ke Moui Tukulagi.”

Iloa nakai e koe ko e heigoa ha lautolu kua fakaako? Fakamua, kua lata ia tautolu ke iloa hagaao ki a Iehova mo e haana Tama ko Iesu kaeke kua manako a tautolu ke momoui tukulagi. Pehē e Tohi Tapu: ‘Ko e puhala anei ke moui tukulagi. Fakaako hagaao ke he Atua mooli tokotaha ni, mo e haana Tama ne fakafano mai e ia ke he lalolagi, ko Iesu Keriso.’

Maeke fēfē a tautolu ke fakaako hagaao ki a Iehova ko e Atua mo e haana Tama ko Iesu? Taha puhala ko e totou e Tohi Haaku he Tau Tala Tohi Tapu mai he kamataaga ke hoko ke he fakaotiaga. Kua talahau ai e tau mena loga hagaao ki a Iehova mo Iesu, pihia nakai? Kua talahau foki ai e tau mena loga kua fitā he taute e laua mo e tau mena kua nakaila taute ia e laua. Ka kua lata ia tautolu ke lahi atu e mena ka taute he totou hokoia ni he tohi nei.

Kitia nakai e koe e taha tohi foki i kelekele nā? Ko e Tohi Tapu a ia. Ole age ke he taha ke totou atu ki a koe e tau vala mai he Tohi Tapu kua fakavē ki ai e tau tala he tohi nei. Kua foaki mai he Tohi Tapu ki a tautolu e vala tala katoa kua lata ma tautolu, ti maeke ia tautolu oti ke fekafekau ki a Iehova he puhala hako mo e moua e moui tukulagi. Ti kua lata ia tautolu ke fakamahani ke kumikumi tumau e Tohi Tapu.

Ka kua nakai koēnaia ke fakaako ni hagaao ki a Iehova ko e Atua mo Iesu Keriso. Liga maeke ia tautolu ke iloa lahi mahaki hagaao ki a laua mo e tau fakaakoaga ha laua, ka e nakai moua e moui tukulagi. Iloa nakai e koe ko e heigoa foki kua lata?

Kua lata foki ia tautolu ke moui fakatatau ke he tau mena ne fakaako e tautolu. Manatu nakai e koe a Iuta Isakariota? Ko ia taha he toko 12 ne fifili e Iesu ke eke mo tau aposetolo haana. Ne lahi e iloaaga ha Iuta hagaao ki a Iehova mo Iesu. Ka ko e heigoa ne tupu ki a ia? Fai magaaho ne fulukovi fakahaga a ia, mo e ne afo e ia a Iesu ke he tau fī haana ma e 30 e tupe ario. Ti to nakai moua e Iuta e moui tukulagi.

Manatu nakai e koe a Kehasi, ko e tagata ne fakaako a tautolu ki ai he Tala 69? Ne manako a ia ke he falu tapulu mo e tau tupe ne nakai ko e haana. Ti talahau e ia e tala pikopiko ke moua aki e tau mena nei. Ka kua fakahala he Atua a ia. Ti to fakahala foki e ia a tautolu ka nakai omaoma a tautolu ke he tau fakatufono haana.

Ka kua tokologa foki e tau tagata mitaki ka fekafekau tumau mo e tua fakamooli ki a Iehova. Manako a tautolu ke tuga a lautolu, pihia nakai? Ko e tama tote ko Samuela ko e fakafifitakiaga mitaki ke muitua. Manatu, tuga ne kitia e tautolu he Tala 55, ne liga ko e fā po ke lima laia e tau haana he kamata a ia ke fekafekau ki a Iehova he faituga. Ti pete ni he tote a koe, kua nakai tote lahi a koe ke fekafekau ki a Iehova.

Ka e mooli, ko e tagata kua manako a tautolu oti ke muitua ki ai ko Iesu Keriso. Pete he tama tote agaia a ia, tuga ne fakakite mai he Tala 87, kua nofo a ia he faituga mo e tutala ke he falu hagaao ke he haana Matua he lagi. Kia mumuitua a tautolu ke he fakafifitakiaga haana. Kia tala age ke he tokologa e tau tagata kua fahia a tautolu ki ai hagaao ke he ha tautolu a Atua ofoofogia ko Iehova mo e haana Tama ko Iesu Keriso. Ka taute e tautolu e tau mena nei, to maeke ia tautolu ke moui tukulagi he parataiso foou he Atua kua ha ha he lalolagi.