Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 114

Ko e Fakaotiaga he Tau Mena Kelea Oti Kana

Ko e Fakaotiaga he Tau Mena Kelea Oti Kana

KO E heigoa haau kua kitia hinei? E, ko e kautau i luga he tau solofanua po ke nua hina. Ka e mailoga ko e o mai i fe a lautolu. Kua tafepoi hifo mai he lagi e tau nua i luga he tau aolū! Fai nua mooli kia i luga he lagi?

Nakai, ai ko e tau nua mooli anei. Iloa e tautolu e mena nei ha kua nakai maeke e tau nua ke tafepoi i luga he tau aolū, mooli nakai? Ka kua tutala e Tohi Tapu hagaao ke he tau nua i luga he lagi. Iloa nakai e koe e kakano?

Ha ko e vahā fakamua ne fakaaoga lahi e tau nua ka latau. Ti talahau he Tohi Tapu e tau tagata kua heke he tau nua mai he lagi ke fakakite e tauaga he Atua mo e tau tagata he lalolagi. Iloa nakai e koe e higoa he matakavi he tauaga nei? Ko Amaketo. Ko e tauaga ia ke moumou e tau mena kelea oti kana he lalolagi.

Ko Iesu ko Ia ka takitaki e tauaga nei i Amaketo. Manatu, ko Iesu kua fifili e Iehova ke eke mo patuiki he fakatufono Haana. Ko e kakano a ia kua ha ha ia Iesu e foufouiki. Ti fakakite he pelu to tamate e ia e tau fī oti kana he Atua. Lata nakai a tautolu ke ofo na maeke e Atua ke moumou e tau tagata kelea oti kana?

Liu la ke onoono ke he Tala 10. Ko e heigoa haau ne kitia i ai? E, ko e Fakapuke lahi ne moumou e tau tagata kelea. Ko hai ne fakatupu e Fakapuke ia? Ko Iehova ko e Atua. Onoono la mogonei ke he Tala 15. Ko e heigoa e mena kua tupu i ai? Ko Sotoma mo Komora kua moumou he afi ne fakafano mai e Iehova.

Fuluhi ke he Tala 33. Kitia la e mena kua tupu ke he tau nua mo e tau kariota latau he tau Aikupito. Ko hai ne fakatupu e vai ke liu mai ki luga ia lautolu? Ko Iehova. Ne taute ai e ia ke puipui e tau tagata haana. Onoono la ke he Tala 76. To kitia e koe i ai kua fakaatā foki e Iehova e tau tagata haana, ko e tau Isaraela, ke moumou ha ko e ha lautolu a mahani kelea.

Ti kua nakai lata ia tautolu mogoia ke ofo ha kua fakafano mai e Iehova haana a tau kautau he lagi ke fakaotioti e tau mena kelea oti kana he lalolagi. Ka e manamanatu la ke he kakano he mena ia! Fufuke e lau tohi mo e o mai la ke kitia.