Skip to content

Skip to table of contents

Tau Fakamoli a Iehova

Fifili e vagahau Faka-Niue

 Tala 106

Fakatokanoa Mai he Fale Puipui

Fakatokanoa Mai he Fale Puipui

ONOONO ke he agelu hinei kua hafagi e gutuhala he fale puipui. Ko e tau tagata kua fakatokanoa mai e ia ko e tau aposetolo ha Iesu. O mai la ke kumikumi ke he mena ne tupu ati tuku a lautolu he fale puipui.

Ne nakai la leva he mole e liligi hifo e agaaga tapu ke he tau tutaki ha Iesu. Ti hanei e mena ne tupu: Ne o atu a Peteru mo Ioane ke he faituga i Ierusalema he taha pale laā. Tata ke he gutuhala i ai, ko e tagata taane ne kulikuli he moui katoa haana. Ne tamai he tau tagata a ia he tau aho oti ki hinei ke maeke ia ia ke kaiole tupe ki a lautolu kua o mai ke he faituga. Magaaho ne kitia e ia a Peteru mo Ioane, ne ole a ia ke age taha mena ma haana. Ko e heigoa he tau aposetolo ka taute?

Ne tutū a laua ti onoono ke he tagata nofogati. ‘Ai fai tupe au,’ he ui e Peteru, ‘ka e atu e au ki a koe e mena kua ha ha ia au. Ke he higoa ha Iesu, matike a mo e fano!’ Ne totō e Peteru e lima matau he tagata, ti hopo agataha a ia ki luga mo e kamata ke fano. Magaaho ne kitia he tau tagata e mena nei, ne ofomate a lautolu ti fiafia lahi ke he mana ofoofogia nei.

‘Ko e malolō he Atua, ne liu fakatu mai a Iesu mai he mate, ne taute e maua e mana nei,’ he ui e Peteru. He tutala agaia a ia mo Ioane, ne o mai e falu takitaki lotu. Ne ita a lautolu ha kua tala age e Peteru mo Ioane ke he tau tagata hagaao ki a Iesu ne liu fakatu mai he mate. Ti tapaki e lautolu a laua mo e tuku he fale puipui.

He aho hake, ne lahi e fono he tau takitaki lotu. Ne tamai ai a Peteru mo Ioane, mo e tagata ne fakamaulu e laua. ‘He malolō fe ne taute e mua e mana nei?’ he hūhū he tau takitaki lotu.

Ne tala age e Peteru ki a lautolu ko e malolō he Atua, ko ia ne liu fakatu mai a Iesu mai he mate. Ne nakai iloa he tau ekepoa e mena ke taute, ha kua nakai fakatikai e lautolu kua tupu mooli e mana ofoofogia nei. Ati hataki ai e lautolu e tau aposetolo ke nakai liu tutala foki hagaao ki a Iesu, ti fakatoka atu e lautolu a laua ke ō.

He mole atu e tau aho ne matutaki e tau aposetolo ke fakamatala hagaao ki a Iesu mo e fakamalolō a lautolu kua gagao. Ne holofa e tala ke he tau mana nei. Ti kua o mai foki e tau moto tagata mai he tau taone ne tata ki Ierusalema ke tamai e tau tagata gagao ke fakamalolō he tau aposetolo. Ne mahekeheke e tau takitaki lotu ha ko e mena nei, ti tapaki e lautolu e tau aposetolo mo e tuku a lautolu he fale puipui. Ka kua nakai nonofo loa a lautolu i ai.

He pō, ne hafagi he agelu he Atua e gutuhala he fale puipui, tuga ne kitia e koe he mena nei. Ne pehē e agelu: ‘O atu mo e tutū ke he faituga, ti fakatumau ke vagahau atu ke he tau tagata.’ He pogipogi hake, mogo ne fekau he tau takitaki lotu e tau tagata taane ke o ke he fale puipui ke tamai e tau aposetolo, kua o tuai a lautolu. He mogo fakamui ne moua he tau tagata taane a lautolu kua fakaako he faituga ti tamai a lautolu ke he fale Saneheturini.

‘Ne poaki malolō a mautolu ki a mutolu ke ua liu foki ke fakaako hagaao ki a Iesu,’ he talahau he tau takitaki lotu. ‘Ka kua fakapuke e mutolu a Ierusalema aki e tau fakaakoaga ha mutolu.’ Ti tali he tau aposetolo: ‘Kua lata ia mautolu ke mua e omaoma ke he Atua ko e pule ke he omaoma ke he tau tagata.’ Ti matutaki ni a lautolu ke fakaako e “tala mitaki.” Nakai kia ko e fakafifitakiaga mitaki lahi a ia ma tautolu ke muitua?