Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 111

Tama Taane ne Pulumohea

Tama Taane ne Pulumohea

OI! OI! Ko e heigoa kua tupu hinei? Kua pakia lahi kia e tama taane ne takoto he kelekele? Kitiala! ko e taha he tau tagata taane ne o mai ki fafo he fale ko Paulo! Kitia foki nakai e koe a Timoteo i ai? Tō hifo kia e tama taane he pū fakamaama?

E, ko e mena haia ne tupu. Ne lauga a Paulo ke he tau tutaki hinei i Tiroa. Ne iloa e ia to leva lahi ato liu ke kitia a lautolu ha kua lata a ia ke fano he toga he aho hake. Ti matutaki a ia ke tutala ti hoko ke he tuloto pō.

Ko e tama taane nei ko Eutuko ne nofo he pū fakamaama, ti mohe a ia. Ne tō hifo a ia ki fafo he pū fakamaama, tolu e fata he fale ke he kelekele i lalo! Ko e mena ia ati kitia e koe e tau tagata kua tupetupe lahi. Magaaho ne lagaki hake he tau tagata taane e tama taane, ne mooli ni e manatu tupetupe ha lautolu. Kua mate tuai a ia!

Magaaho ne kitia e Paulo kua mate tuai e tama taane, ne takoto hifo a ia i luga haana ti kaputi mai a ia. Ti pehē a ia: ‘Ua tupetupe. Mitaki a ia!’ Ti kua mitaki mooli e tama! Ko e mana a ia! Kua liu a Paulo fakamoui a ia! Ne tupu lahi e fiafia ke he tau tagata.

Ti liliu hake a lautolu oti ki luga mo e kai. Ne matutaki a Paulo ke tutala ti hoko ke he aho. Ka kua iloa mooli e koe ne nakai liu a Eutuko ke mohe! Ti o atu a Paulo, Timoteo mo lautolu kua fenoga mo laua ki luga he toga. Iloa nakai e koe ko e ō a lautolu ki fe?

Ko e oti laia e fenoga fakamatala ke toluaki ha Paulo, ti kua liu atu a ia ki kaina. He fenoga nei ne nofo a Paulo tolu e tau he maaga i Efeso ni hokoia. Ti kua loa atu e fenoga nei ke he fenoga ke uaaki haana.

He o kehe mai i Tiroa, ne tū fakakū e toga i Mileto. Ha kua gahoa ni e maila ki Efeso, ne poaki e Paulo ke he tau patu he fakapotopotoaga ke o mai ki Mileto ke maeke a ia ke tutala fakahiku ki a lautolu. Ti he hoko e mogo ke fano e toga, ko e momoko ha ia ha lautolu ke kitia a Paulo kua fano!

Fakahiku ai ne liu e toga hoko atu ki Kaisaria. He nofo a Paulo he fale he tutaki ko Filipo, ne hataki he perofeta ko Akapo a Paulo. Pehē a ia to eke a Paulo mo pagotā ka fina atu a ia ki Ierusalema. Ti mooli ni, ne pihia e mena ne tupu. He mole e ua e tau he tuku he fale puipui i Kaisaria, ne fakafano atu a Paulo ki Roma ke he fakafiliaga he pule Roma ko Kaisara. O mai la ke kitia ko e heigoa ka tupu he fenoga ki Roma.