Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA 102

Kua Moui a Iesu

Kua Moui a Iesu

ILOA nakai e koe ko hai e fifine mo e tau tagata taane tokoua nei? Ko e fifine ko Maria Makatala, ko e kapitiga ha Iesu. Ti ko e tau tagata tapulu tea ko e tau agelu. Ko e poko tote nei ne onoono a Maria ki loto ko e poko ne tuku e tino ha Iesu he mole e mate haana. Ne fakahigoa ko e tukuaga. Ka kua galo tuai e tino mogonei! Ko hai ne uta? O mai la ke kitia.

He mole e mate ha Iesu, ne pehē e tau ekepoa ki a Pilato: ‘He magaaho ne moui a Iesu ne pehē a ia to liu fakatū mai a ia ka mole e tolu e aho. Ati poaki ai ke leoleo e tukuaga. Ti nakai maeke mogoia e tau tutaki haana ke kaiha e tino haana mo e pehē kua liu fakatū mai a ia he mate!’ Ne tala age a Pilato ke he tau ekepoa ke fakafano e tau kautau ke leoleo e tukuaga.

Ka e he kamataaga he aho ke toluaki he mole e mate a Iesu ne hau agataha e agelu ha Iehova. Ne poka kehe e ia e maka mai he tukuaga. Ne matakutaku lahi e tau kautau ti nakai maeke ia lautolu ke lutu. He magaaho ne onoono atu a lautolu ki loto he tukuaga, kua galo tuai e tino! Ne o atu falu kautau ke he maaga mo e tala age ke he tau ekepoa. Iloa nakai e koe ko e heigoa he tau ekepoa kelea ne taute? Ne totogi e lautolu e tau kautau ke pikopiko. ‘Pehē ko e tau tutaki ne o mai he pō, he momohe a mautolu, ti kaiha e tino,’ he tala age he tau ekepoa ke he tau kautau.

Ka ko e mogoia foki ko e tau kapitiga fifine ha Iesu kua o atu ke he tukuaga. Ne ofomate a lautolu ha kua gatigati ai! Ne amanaki ni ti tutū mai tokoua e agelu ne kikila e tau tapulu. ‘Ko e ha kua kumi a mutolu ki a Iesu he mena nei?’ he hūhū e laua. ‘Kua liu fakatu mai tuai a ia. O atu fakamafiti ke tala age ke he tau tutaki haana.’ Ko e mafiti ha ia he tau fifine he tafepoi! Ka e he magahehala ne fakatū he taha tagata taane a lautolu. Iloa nakai e koe ko hai a ia? Ko Iesu a ia! ‘O atu mo e tala age ke he tau tutaki haaku,’ he ui e ia.

Magaaho ne tala age he tau fifine ke he tau tutaki kua moui tuai a Iesu ti kua kitia e lautolu a ia, ne uka he tau tutaki ke talitonu. Ne tafepoi atu a Peteru mo Ioane ke he tukuaga ke kitia, ka kua gatigati e tukuaga! Magaaho ne ō a Peteru mo Ioane, ne nofo ni a Maria Makatala. Ko e magaaho ia ne ono atu a ia ki loto ti kitia ua e agelu.

Iloa nakai e koe ko e heigoa ne tupu ke he tino ha Iesu? Ne utakehe ai he Atua. Ne nakai fakatū mai he Atua a Iesu ke he moui he tino tuai haana ne mate ai a ia. Ne foaki e Ia ki a Iesu e tino foou fakaagaaga, tuga e tau agelu i luga he lagi. Ka e ke fakakite ke he tau tutaki haana kua moui a ia, na maeke ia Iesu ke hiki e tino ke kitia he tau tagata, tuga ka fakaako a tautolu ki ai.